ޗާގޮސް މައްސަލަ: ނަޝީދަށް ފައްޔާޒުގެ ރައްދެއް

ޗާގޮސް އަކީ ރާއްޖޭގެ ތަނެއް ކަމަށާއި އެހެންވެ އެތަން ދޫކުރެވެން ނެތް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދެއްކެވި ވާހަކަފުޅަށް އިކޮނޮމިކް މިނިސްޓަރު ފައްޔާޒު އިސްމާއިލް ވަރުގަދަ ރައްދެއް ދެއްވައިފި އެވެ.

ޗާގޮސް މައްސަލާގައި ސަރުކާރުގެ ސިޔާސަތު ކުއްލިއަކަށް ބަދަލުވީ ކަމަށް ބުނެ މަޑުއްވަރީ ދާއިރާގެ މެމްބަރު އާދަމް ޝަރީފް އިއްޔެ ހުށަހެޅުއްވި ކުއްލި މައްސަލައާ ގުޅިގެން ބަހުސްކުރައްވަމުން ދަނިކޮށް ރިޔާސަތުގައި އިންނަވައި ނަޝީދު ވަނީ އެކަމާ ގުޅޭ ގޮތުން ވާހަކަ ދައްކަވައިފަ އެވެ.

ނަޝީދު ވިދާޅުވީ 2009ގައި އެމަނިކުފާނު ވެރިކަމުގައި ހުންނެވިއިރު އިނގިރޭސިވިލާތަށް ކުރެއްވި ދަތުރުފުޅެއްގައި ވެސް އެގައުމުގެ ސަރުކާރާ ބައްދަލުކޮށް ޗާގޮސްއަކީ ރާއްޖޭގެ ތަނެއް ކަމަށް ވިދާޅުވެފައިވާނެ ކަމަށެވެ.

އެތަނުގެ ސަގާފަތާއި ތާރީހަކީ އެކަމުގެ ހެއްކެއްކަން ފާހަގަކުރައްވާ ނަޝީދު ވިދާޅުވީ ރާއްޖޭގެ ސަރަހައްދުން އެއްވެސް ތަނެއް ގެއްލޭ ފަދަ ކަމެއް ކުރުމަކީ ރާއްޖެއިން ކުރާނެ ކަމެއް ނޫން ކަމަށް ވެސް ދަންނަވާފައިވާ ކަމަށެވެ.

ނަޝީދުގެ އެ ވާހަކަތަކަށް ރައްދުދެއްވައި އެމްޑީޕީގެ ޗެއާޕާސަން، ފައްޔާޒު ކުރެއްވި ޓްވީޓެއްގައި ވަނީ ޗާގޮސްއަކީ ރާއްޖޭގެ ބައެއް ކަމަށް ދެކިވަޑައިގަންނަވާ ނަމަ، ނަޝީދު ވެރިކަމުގައި ހުންނެވިއިރު ޗާގޮސްއާ ރާއްޖެއާ މެދު އިން ވަކިކުރުމަށް މޮރިޝަސްއާ އެއްބަސްވީ ކީއްވެތޯ ސުވާލު އުފައްދަވައިފަ އެވެ.

އިތުރު ޓުވީޓެއްގައި ފައްޔާޒު ވަނީ 1992 ގައި އޭރުގެ ބަންޑާރަ ނައިބު އިނގިރޭސިވިލާތާ އެކު ރާއްޖެއާ ޗާގޮސްގެ ބައުންޑަރީ ކަނޑައެޅުމަށް ވާހަކަ ދެކެވުނީ ކީއްވެތޯ ވެސް ސުވާލު އުފައްދަވައިފަ އެވެ.

އިނގިރޭސި ސަރުކާރުން ޗާގޮސް އަކީ ހިމާޔަތްކޮށްފައިވާ ތަނެއްގެ ގޮތުގައި 2010 ގައި ކަނޑައެޅިއިރު ނަޝީދު ވިދާޅުވީ އެތަނުގެ އިން ފާހަގަ ނުކުރާ ކަމަށާއި ޖެހިގެން އައި އަހަރު މޮރިޝަސް ސަރުކާރާ އެކު ކުރި މަޝްވަރާގައި ދެ ގައުމުން ގުޅިގެން އިނގިރޭސި ސަރުކާރާ އެކު މަޝްވަރާކޮށްގެން އެ މައްސަލާގައި ހައްލެއް ހޯދަން ނިންމި ކަމަށެވެ.

އައިސީޖޭން ފެބުރުއަރީ 2019 ގައި ވަނީ އިނގިރޭސިވިލާތުން ޗާގޮސް އިސްތިއުމާރުކޮށްފައި އޮތުން ނިމުމަކަށް ގެނެސް އެތަން ވީއެންމެ އަވަހަކަށް މޮރިޝަސްއާ ހަވާލުކުރަން ޖެހޭ ކަމަށް ކަނޑައަޅައިފަ އެވެ.

ހަ މަސް ދުވަހުގެ ތެރޭގައި ޗާގޮސް މޮރިޝަސްއާ ހަވާލުކުރުމަށް ގޮވާލައި، އދ. ގެ އާންމު މަޖިލީހުގައި މެއި 22، 2019 ގައި ފާސްކޮށްފައިވާއިރު އެ ގަރާރު ނެރެފައި ވަނީ 116 ގައުމެއްގެ ތާއީދާ އެކު އެވެ. ރާއްޖެއިން އެއާ ދެކޮޅަށް ވޯޓު ދީފައި ވަނީ ރާއްޖޭގެ ކޮންޓިޓެންޓަލް ޝެލްފް 200 ނޯޓިލަކް މޭލަށް ވުރެ އިތުރުކުރުމަށް ރާއްޖެއިން ސީއެލްސީއެސްއަށް ޖުލައި 26، 2010 ގައި ހުށަހެޅި ހުށަހެޅުމަށް މޮރިޝަސް ދެކޮޅު ހެދުމުންނެވެ.

އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) ގައި މިހާރު ކުރިއަށްދާ އަޑުއެހުންތަކުގައި ޗާގޮސްގެ ރަށްތައް އިނގިރޭސި ވިލާތުން މޮރިޝަސްއާ ހަވާލުކުރަން އދ. އިން ނިންމި ނިންމުމަށް ވޯޓު ދޭނެ ކަމަށް ރާއްޖެއިން ހާމަކުރުމާ އެކު ރާއްޖޭގެ ކަނޑުގެ ބައެއް ދޫކޮށްލަން އެއްބަސްވީ ކަމަށް ބުނެ ސަރުކާރަށް ވަރަށް ބޮޑަށް ދަނީ ފާޑުކިޔަމުންނެވެ. އިއްޔެ މަޖިލީހުގެ ތެރޭގައި އެމްޑީޕީގެ މެމްބަރުން ވެސް ސަރުކާރުގެ އެ އަމަލުގެ ސަބަބުން ރާއްޖޭގެ ކަނޑުން ބައެއް ގެއްލޭނެ ކަމަށް ބުނެ ވާހަކަ ދައްކައިފަ އެވެ.

ނަމަވެސް ސަރުކާރުން ބުނެފައި ވަނީ މިއީ މުޅިން ތަފާތު ދެ މައްސަލައެއް ކަމަށެވެ.