ބާ ރަންވޭ އަށް އަލްވަދާއު ކީ ޓާކިޝް އެއާލައިންގެ ފްލައިޓެއް

ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ރޭ 11:07 ގައި ފުރި ޓާކިޝް އެއާލައިނަށް އަލްވަދާއު ކިޔަން، އެ ވަގުތު އެއާޕޯޓުގައި ތިބި މުވައްޒަފުންތަކެއް ނުކުތީ އެއީ ތާރީހީ ފްލައިޓަކަށް ވާތީ އެވެ. އެންމެ ފަހުގެ އަލްވަދާއު ކިޔުން އެއާޕޯޓުގެ 56 އަހަރުގެ ދިގު ތާރީހުގައި ލިޔެލާށެވެ.

ޓާކިޝް އެއާލައިންގެ އެ ބޯޓު (TK731) ތާރީހުގެ ތެރެއަށް ވަނީ އެއީ މިދިޔަ 41 އަހަރު ބޭނުންކުރި ވީއައިއޭގެ ރަންވޭ އިން ފުރި އެންމެ ފަހުގެ ބޯޓު ކަމަށް ވާތީ އެވެ. ފަހަކަށް އައިސް ދިވެހިން އެންމެ ގިނައިން ދާ އެއް ގައުމުގެ ބޯޓު ފުރުމާއެކު، ކުރީގެ ރައީސް މައުމޫން އަބްދުލްގައްޔޫމުގެ ސަރުކާރުން 1981 ގައި ބޭނުންކުރަން ފެށި ރަންވޭ ބަންދުވީ އެވެ. މިއަދުން ފެށިގެން ދެން ބޭނުންކުރަނީ މައުމޫންގެ އެއްބަފާ ކޮއްކޯފުޅު އަދި ކުރީގެ ރައީސް އަބްދުﷲ ޔާމީންގެ ސަރުކާރުން 2018 ގައި ރަސްމީކޮށް ހުޅުވި ވީއައިއޭގެ އާ ރަންވޭ އެވެ.

އެހެންވެ، ނޮވެމްބަރު 25، 2012 ގައި ރާއްޖެ އަށް ދަތުރުތައް ފެށި ޓާކިޝް އެއާލައިނަށް ކުރީގެ ރަންވޭ އިން އަލްވަދާއު ކިޔުމަށް، އެއާޕޯޓުގެ ޑިއުޓީގައި އޭރު ތިބި މުވައްޒަފުން ނުކުމެ އެކަން ފާހަގަކުރި އެވެ. ބާ ރަންވޭ އަށް ޓާޓާ ކިޔައި، ޓާކިޝް އެއާލައިންގެ ބޯޓު ފުރުމާއެކު، ރަންވޭގެ މައްޗަށް މުވައްޒަފުން އެރި އެވެ. އެ ފްލައިޓާ އެކު ފޮޓޯ ނެގި އެވެ. ބޯޓު ފުރުމާއެކު، ބާ ރަންވޭ އޮތީ ހުސްކޮށްފަ އެވެ. ޓެކްސީވޭ އަކަށް ބޭނުންކުރުމަށް ޓަކަ އެވެ.

މިއަދު ރަސްމީކޮށް ހުޅުވި އާ ރަންވޭ އަކީ 3400 މީޓަރުގެ ދިގު، 60 މީޓަރުގެ ފުޅާ ޒަމާނީ ރަންވޭއެކެވެ. އެ ރަންވޭ ބޭނުން ކުރަން ފެށުމުން ކޮންމެ ތިން މިނެޓަކުން ބޯޓެއް ކްލިއާކޮށްލެވޭނެ ކަމަށް އެމްއޭސީއެލުން ބުނެ އެވެ.

ވީއައިއޭގެ ފްލައިޓް އޮޕަރޭޝަންސް އަށް ބޮޑު ބަދަލެއް އަންނާނެ އާ ރަންވޭ ރަސްމީކޮށް މިއަދު ބޭނުންކުރަން ފެށުމުގެ ގޮތުން ފުރަތަމަ ޖެއްސީ އެމިރޭޓްސްގެ މަތިންދާބޯޓެކެވެ.