އެމްއެންޔޫގެ ފޮތް މައުުރަޒު އަންނަ މަހު

ފޮތް އުފައްދާ މީހުންނާއި ފޮތް ވިއްކާ މީހުންގެ ފޮތްތައް ހިމަނައިގެން ގައުމީ ޔުނިވާސިޓީން ފޮތް މައުރަޒެއް ބާއްވަން ނިންމައިފި އެވެ.

އެމްއެންޔޫ އިން ބުނީ މިއީ ފޮތް އުފައްދާ ވިއްކާ މީހުންނާއި ގަންނަ މީހުންގެ ބާޒާރެއް ކަމަށެވެ. ދިވެހި ލިޔުންތެރިންނަށް އެ މީހުންގެ ހުނަރު އާއްމުނަށް ދައްކާލުމުގެ ފުރުސަތު ފަހިކޮށްދިނުމަކީ މި މައުރަޒުގެ މަގްސަދު ކަމަށް އެ ޔުނިވަސިޓީން ބުންޏެވެ. މީގެ އިތުރުން، ޕަބްލިޝް ނުކުރެވި ހުރި އާ ފޮތްތައް އާއްމުންނަށް ފޯރުކޮށްދިނުމުގެ ފުރުސަތު ލިޔުންތެރިންނަށް ދިނުމަކީ ވެސް މި މައުރަޒު ބޭއްވުމުގެ އެއް ބޭނުން ކަމަށް ބުންޏެވެ.

އެމްއެންޔޫ އިން ބުނީ ފޮތް ވިއްކަން ބޭނުންވާ ލިޔުންތެރިންނަށް އެ ފުރުސަތު މި މައުރަޒުގައި ލިބޭނެ ކަމަށެވެ. މިއީ އާއްމުންގެ މެދުގައި ފޮތް ކިޔުމަށް ހިތްވަރު ދީ އެކަމަށް ބާރުއެޅުމަށް އެ ޔުނިވާސިޓީން ކުރަމުން އަންނަ މަސައްކަތްތަކުގެ ބައެއް ކަމަށް އެތަނުން ބުންޏެވެ.

އެމްއެންޔޫއިން ވަނީ މިދިޔަ އަހަރު ވެސް ފޮތް މައުރަޒެއް ބާއްވައިފަ އެވެ. ޔުނިވަސިޓީން ބުނީ އެ މައުރަޒަށް އާއްމުންގެ ބޮޑު ތަރުހީބެއް ލިބުނު ކަމަށެވެ.

އެމްއެންޔޫގެ ފޮތް މައުރަޒު ބޭއްވުމަށް ހަމަޖެހިފައި ވަނީ އަންނަ މަހުގެ 11 އިން 13 އަށެވެ. މައުރަޒު އޮންނާނީ މެންދުރު 2:00 އިން ރޭގަނޑު 10:00 އަށެވެ.