ޑެންގީ ހުން ގިނަވަނީ، އިތުރު ކުއްޖަކު އައިސީޔޫގައި

ޑެންގީ ހުން ޖެހިގެން އިތުރު ކުއްޖަކަށް އައިޖީއެމްއެޗްގެ އައިސީޔޫގައި ފަރުވާ ދޭން ފަށައިފި އެވެ.

އެ ހޮސްޕިޓަލްގެ ކުޑަކުދިންގެ ބަލިތަކުގެ ޑޮކްޓަރު، ޑރ. އަހުމަދު ފައިސަލް ކުރެއްވި ޓްވީޓުގައި ވިދާޅުވީ ޑެންގީ ހުން ޖެހިގެން އަހަރެއް ނުވާ ކުއްޖަކަށް ރޭ އައިސީޔޫގައި ފަރުވާ ދޭން ފެށި ކަމަށެވެ.

އެ ކުއްޖާ ހޮޑުލާއިރު ލޭ އަންނާތީ ލޭ އަޅަން ވެސް ޖެހުނު ކަމަށް އޭނާ ވިދާޅުވި އެވެ.

ޑެންގީ ހުން ޖެހިގެން ހާލު ބޮޑުވި ދެ ކުއްޖަކަށް މި ފަހުން އައިޖީއެމްއެޗުގެ އައިސީޔޫގައި ފަރުވާ ދިނެވެ. އެކަމަކު، ފައިސަލް ވިދާޅުވީ އެ ކުދިންގެ ހާލު ރަނގަޅުވަމުން އަންނާތީ ވޯޑަށް ބަދަލުކޮށް ފަރުވާ ދެމުން އަންނަ ކަމަށެވެ.

އޭގެ ފަހުން އޭނާ ކުރެއްވި އެހެން ޓްވީޓެއްގައި ވިދާޅުވީ ޑެންގީގައި ހާލު ސީރިއަސްވާ ކުދިންގެ އަދަދު ފާއިތުވި ތިން އަހަރަށް ވުރެ މި އަހަރު ގިނަ ކަމަށެވެ. ގިނަ ކުދިންނަށް އައިސީޔޫގައި ފަރުވާ ދޭން ޖެހި، ލޭ އަޅަން ޖެހިފައިވާ ކަމަށް އޭނާ ވިދާޅުވި އެވެ.

މިއީ ވިއްސާރަ ދުވަސްވަރަކަށް ވާތީ މި ދުވަސްވަރު ޑެންގީ ހުން އިތުރެވެ. އޭގެ އިތުރުން ވައިރަލް ހުމާއި ބޭރަށް ހިނގުން ވެސް މި ދުވަސްވަރު ގިނަ ކަމަށް ޑޮކްޓަރުން ވިދާޅުވެ އެވެ.

މަދިރިން ރައްކާތެރިވުމަށް ހަށިގަނޑު ރަނގަޅަށް ނިވާވާ ގޮތަށް ހެދުން އަޅާ މަދިރި ލޯޝަން ފަދަ ތަކެތި ބޭނުން ކުރުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ އިލްތިމާސްކޮށްފަ އެވެ. އަދި ފަތިސްގަޑި އާއި އިރުއޮއްސޭ ވަގުތު ގޭގެ ދޮރުތައް ލައްޕާ މަގު މައްޗަށް ފެން ހެދޭނެ ގޮތަށް ފުޅިފަދަ ތަކެތި އުކާނުލުން ފަދަ ކަންކަމަށް މި ދުވަސްވަރު ސަމާލުވުމަކީ ވެސް ޑެންގީ ހުން މަދުކުރެވޭނެ ކަމެއް ކަން ކަމާބެހޭ އިދާރާތަކުން ހަނދާންކޮށްދެ އެވެ.