ޕިންޓްރެސްޓް "ޝޮޕިން މޯލަކަށް" ބަދަލުކޮށްލަނީ

ޕިންޓްރެސްޓް އާ ސީއީއޯގެ އެންމެ ބޮޑު މަގުސަދަކީ އެ އެޕް "ޝޮޕިން މޯލްއަކަށް" ބަދަލުކޮށްލުން ކަމަށް ރިޕޯޓްތައް ބުނެފި އެވެ.

އެ ކުންފުނީގެ ކުރީގެ ސީއީއޯ ބެން ސިލްބާމަން ވަނީ މިދިޔަ އަންގާރަ ދުވަހު އިސްތިއުފާ ދީފަ އެވެ. އޭނާގެ ބަދަލުގައި އެ މަގާމަށް ހަމަޖެއްސީ ގޫގުލްގެ ކޮމާސް، ޕޭމަންޓް އެންޑް ނެކްސްޓް ބިލިއަން ޔޫސާގެ އިސްވެރިޔަކަށް މީގެ އަހަރުތަކެއް ކުރިން ހުންނެވި ބިލް ރެޑީ އެވެ.

ސީއީއޯ ކަމުން އިސްތިއުފާ ދިން ސިލްބާމަން މިހާރު ވަނީ ޕިންޓްރެސްޓްގެ އެގްޒެކެޓީވް ޗެއާމަން ކަމަށް ހަމަޖައްސައިފަ އެވެ.

ރިޕޯޓްތައް ބުނި ގޮތުގައި، އާ ސީއީއޯ، ރެޑީއާ އެކު ޕިންޓްރެސްޓްގެ އެންމެ ބޮޑު މަގުސަދަކަށް ވާނީ އެއީ އިންވެސްޓަރުންނަށް ފުރުސަތު ހުޅުވާލާއި، އެއީ ފައިސާ ވަންނަ އެއްޗަކަށް ހެދުމެވެ. އެ އެޕް މެދުވެރިކޮށް، މަޝްހޫރު އެކި ބްރޭންޑްތަކަށް ވިޔަފާރީކުރުމުގެ ފުރުސަތު ހުޅުވާލާނެ ކަމަށް ބުންޏެވެ.

ރެޑީ ވަނީ ކުރިން ވެސް ވިޔަފާރިއާ ގުޅޭ މަގާމުތަކެއް އަދާކޮށްފަ އެވެ. ފައިސާގެ މުއާމަލަތްކުރާ "ވެމޯ" އާއި "ޕޭޕަލް" ގެ ޓޮޕް އެގްޒެކެޓީވްގެ މަގާމު އޭނާ އަދާކުރެއްވި އެވެ." ގޫގުލް ޝޮޕިން" ގެ ހިދުމަތް ދިނުމުގައި ވެސް އޭނާ އިސްކޮށް އުޅުއްވި އެވެ.

ފޮޓޯ ޝެއާކުރާ ސޯޝަލް މީޑިއާ އެޕެއް ކަމަށްވާ "ޕިންޓްރެސްޓް" މަޝްހޫރުވެފައި ވަނީ އެކި ކަހަލަ ކަންކަމުގައި އައިޑީއާސް ހޯދުމަށް ބޭނުންކުރާ އެއްޗެއްގެ ގޮތުގަ އެވެ.