ބޮމުގެ ހަމަލާ: ނަޝީދުގެ ފަރާތުން ޝަރީއަތް އޮބްޒާވްކުރަން ފުރުސަތަށް އެދެފި

ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ބޮމުގެ ހަމަލާގެ ޝަރީއަތް ހިނގާ ގޮތް ބަލަން އެމަނިކުފާނުގެ ފަރާތްޕުޅުން ހަމަޖައްސަވާ އޮބްޒާވަރުންނަށް ފުރުސަތު ދޭން ކްރިމިނަލް ކޯޓުގައި އެމަނިކުފާނުގެ ވަކީލުން މިއަދު އެދެފި އެވެ.

މިދިޔަ އަހަރު މެއި މަހު ނަޝީދަށް އަމާޒުކޮށް ދިން ބޮމުގެ ހަމަލާއާ ގުޅިގެން 10 މީހެއްގެ މައްޗަށް ކުރާ ދައުވާތައް ކްރިމިނަލް ކޯޓުގައި ދަނީ ހިނގަމުންނެވެ.

ނަޝީދުގެ ކޮއްކޯފުޅު އަދި އެމަނިކުފާނުގެ ވަކީލް ނާޒިމް ސައްތާރު ކްރިމިނަލް ކޯޓަށް ފޮނުއްވި ސިޓީގައިވަނީ އެ ޝަރީއަތްތައް ހިނގާ ގޮތް ބަލަން ކޮންމެ އަޑުއެހުމަކަށް ނަޝީދުގެ ފަރާތްޕުޅުން މަދުވެގެން ދެ އޮބްޒާވަރުންނަށް ފުރުސަތު ދޭން އެދޭ ކަމަށެވެ.

އޮބްޒާވަރުންގެ ތެރޭގައި ރާއްޖޭގައި ތިން ވަކީލަކާއި އެ މައްސަލައަށް ނަޝީދު އައްޔަން ކުރެއްވި އިނގިރޭސިވިލާތުގެ ވަކީލަކު ވެސް ހިމެނެ އެވެ.

ނަޝީދަށް އަމާޒުކޮށް ބޮން ގޮއްވާލުމުގައި އަމަލީ ގޮތުން ބައިވެރިވި އަދުހަމް މުހައްމަދުގެ މައްޗަށް 23 އަހަރުގެ ޖަލު ހުކުމެއް މިދިޔަ މަހު ވަނީ އިއްވައިފަ އެވެ. އެއީ އޭނާ ކުށަށް އިއުތިރާފްވުމުންނެވެ.