ސްނައިޑާގެ ބޮޑު ފިލްމެއްގެ ޝޫޓިން ފަށައިފި

އެމެރިކާގެ މަޝްހޫރު ޑައިރެކްޓަރު ޒެކް ސްނައިޑާގެ ބޮޑު ސައިންސް ފިކްޝަން ފިލްމު "ރެބެލް މޫން"ގެ ޝޫޓިން ފަށައިފި އެވެ.

ނެޓްފްލިކްސް އާ ގުޅިގެން ސައިންސް ފިކްޝަން ބޮޑު ފިލްމެއް ފަށާނެ ކަމަށް ސްނައިޑާ އިއުލާންކޮށްފައި ވަނީ މިދިޔަ އަހަރުގަ އެވެ. އެއަށްފަ ހު އެ ޕްރޮޖެކްޓަކީ "ރެބެލް މޫން" ކަމަށް އިއުލާނު ކުރީ މި އަހަރު ކުރީކޮޅުގަ އެވެ.

އޭގެ ފަހުން އެ ފިލްމާ ގުޅޭ އެކި މައުލޫމާތުތައް އޭނާ އައީ ހިއްސާކުރަމުންނެވެ. އެ ފިލްމުގެ ޝޫޓިން މިދިޔަ ބުދަ ދުވަހު ފެށިއިރު، އެ ފިލްމުގެ ފަސްޓް ލުކް ވެސް މިހާރު ވަނީ އާންމުކޮށްފަ އެވެ.

އެ ފިލްމު ރިލީޒްކުރާނެ ދުވަހެއް އަދި ހާމަކޮށްފައި ނުވިޔަސް، އަންނަ އަހަރު އެ ފިލްމު ބެލުންތެރިންނަށް ފެންނާނެ ކަމަށް އޭނާ އުއްމީދުކުރެ އެވެ.

ޝޫޓިން އަދި ކިރިޔާ ފެށިޔަސް "ރެބެލް މޫން"ގެ ޕްރޮޖެކްޓަށް ސްނައިޑާ މަސައްކަތް ކުރަމުން އަންނަތާ 10 އަހަރު ވެއްޖެ އެވެ. އެ ޕްރޮޖެކްޓް އެންމެ ފުރަތަމަ ވުޖޫދަށް އައިސްފައި ވަނީ މަޝްހޫރު ފްރެންޗައިޒް "ސްޓާ ވޯސް"ގެ ސީރީޒް އެއްގެ ގޮތުގަ އެވެ.

ސްނައިޑާ ބޭނުންވީ "ރެބެލް މޫން"އާ އެކު، ސްޓާ ވޯސް އިތުރަށް "ޑާކް" ތީމަކަށް ބަދަލުކުރާށެވެ. ނަމަވެސް، އެ ޕްރޮޖެކްޓް ކެންސަލްކޮށްލުމުން ސްނައިޑާ ވާހަކަ ބަދަލުކުރީ މުޅިން އާ ފިލްމެއްގެ ގޮތުގަ އެވެ.