މާލޭގައި ބިދޭސީންތަކެއްގެ މެދުގައި މާރާމާރީއެއްގައި ހިންގައި، އެކަކަށް އަނިޔާވެއްޖެ

މާލޭގައި ބިދޭސީންތަކެއްގެ މެދުގައި މިރޭ މާރާމާރީ ހިންގައި، އެކަކަށް އަނިޔާވެގެން ފަރުވާދޭން ފަށައިފި އެވެ.

ފުލުހުން ބުނީ މިރޭ ސޯސަންމަގުގައި ބިދޭސީންތަކެއްގެ މެދުގައި މާރާމާރީއެއް ހިންގައިގެން އުޅޭކަމުގެ މައުލޫމާތު ލިބިގެން އެ ސަރަހައްދުގައި ހަރަކާތްތެރިވަމުން އަންނަ ކަމަށެވެ. އެ މާރާމާރީގައި ބިދޭސީއަކަށް އަނިޔާވެފައިވާ ކަމަށް ފުލުހުން ބުންޏެވެ.

ފުލުހުން ބުނީ އެ މާރާމާރީއާ ގުޅިގެން އުމުރުން 37 އަހަރުގެ ބިދޭސީއަކު ފިރިހެނަކު ހައްޔަރު ކޮށްފައިވާ ކަމަށެވެ.

ބިދޭސީންތަކެއްްގެ މެދުގައި މާރާމާރީ ހިންގިއިރު، މިއަދު ހަވީރު ހުޅުމާލޭގެ ހާންޖީ ރެސްޓޯރެންޓެއްގައި ޕާކިސްތާނުގެ މީހަކާއި ބަންގްލަދޭޝްގެ މީހަކާ ދެމެދުގައި ހިންގި މާރާމާރީއެއްގައި އެކަކު ވަނީ މަރާލައިފަ އެވެ. އެ މާރާމާރީގައި ވަޅިން ދިން ހަމަލައިގައި މަރުވީ ބަންގަލްދޭޝްގެ މީހާ އެވެ.

އޭނާއަށް ހަމަލާދިން ކަމުގެ ތުހުމަތު ކުރެވޭ ޕާކިސްތާނު މީހާ ފިލާފައިވާއިރު، އޭނާ ހޯދުމުގެ މަަސައްކަތް ފުލުހުން ދަނީ ކުރަމުންނެވެ.