މަސްތުވާތަކެތި ބޭނުންކުރުމުގެ ކުށުގައި ޖަލަށް ލާން ކުރި ހުކުމް ފަސްކޮށް، ފަރުވާއަށް ބަދަލުކޮށް މިނިވަންވިތާ ހަތް އަހަރު ވެފައި ވަނިކޮށް، ވައްކަމުގެ މައްސަލައެއްގައި ކޮށްފައިވާ ހުކުމަކުން ތަންފީޒު ނުވެ އޮތް 23 ދުވަހާ ހެދި ވަޒީފާ ގެއްލިއްޖެ އެވެ.
06 މާޗް 2022
މަސްތުވާތަކެތި ބޭނުންކުރުމުގެ ކުށުގައި ޖަލަށް ލާން ކުރި ހުކުމް ފަސްކޮށް، ފަރުވާއަށް ބަދަލުކޮށް މިނިވަންވިތާ ހަތް އަހަރު ވެފައި ވަނިކޮށް، ވައްކަމުގެ މައްސަލައެއްގައި ކޮށްފައިވާ ހުކުމަކުން ތަންފީޒު ނުވެ އޮތް 23 ދުވަހާ ހެދި ވަޒީފާ ގެއްލިއްޖެ އެވެ.
ޅ. ނައިފަރު، މިސްކިތު މަސައްކަތުގެ މީހެއްގެ ވަޒީފާ ލިބުނުތާ މަހެއް ފަހުން އިބްރާހިމް ރަޝީދު ވަކިކުރީ ކައުންސިލުން ކުށުގެ ރެކޯޑު ސާފުކުރި އިރު އެ 23 ދުވަސް ތަންފީޒުކުރަން ޖެހޭ ކަމަށް އޮތުމުންނެވެ.
މާފުށީ ޖަލަށް 2013 ގައި އޭނާ ލީ ވައްކަމުގެ މައްސަލައެއްގަ އެވެ. އެއީ ދެ އަހަރަށް ޖަލަށް ލުމަށް ނައިފަރު މެޖިސްޓްރޭޓް ކޯޓުން ކޮށްފައި އޮތް ހުކުމެކެވެ. އެކަމަކު އޭގެ ފަހުން ޑައިމޯފިން ބޭނުންކުރުމުގެ މައްސަލައެއްގައި ޖަލަށް ލާން ހުކުމްކުރި ނަމަވެސް މަސްތުން ސަލާމަތްވާން ބޭނުންވެ ކުށަށް އިއުތިރާފްވުމުން އޮތީ މަސްތުވާތަކެތީގެ މައްސަލާގައި ކުރި ހުކުމް ފަސްކޮށް، ފަރުވާގެ ހުކުމެއް ކޮށްފަ އެވެ.
އިބްރާހިމް ރަޝީދު "މިހާރު" އަށް ބުނީ މަސްތުވާތަކެތީގެ ފަރުވާ ފުރިހަމަކުރުމަށް ފަހު 2015 ގައި އެއްވެސް ޝަރުތަކާ ނުލައި ދޫކޮށްލި ފަހުން މިހާތަނަށް އެއްވެސް މައްސަލައެއްގައި އޭނާއާ ސުވާލުކޮށްފައި ނުވާ ކަމަށެވެ. އިސްލާހުވާން އަޒުމް ކަނޑައަޅައިގެން ކުރި މަސައްކަތުން ޖަލުން ނުކުމެވި ފަރުވާ ފުރިހަމަކުރި ފަހުން ވެސް މިހާތަނަށް އުޅުނީ ވަޒީފާ އަދާކޮށްގެން ކިޔެވުމުގައި ކަމަށް ބުންޏެވެ.
އިބްރާހިމް ރަޝީދަށް މި ވަޒީފާ ހަމަޖެހުނީ ވަގުތީ މުވައްޒަފެއްގެ ގޮތުގައި އޭނާ މަސައްކަތް ކުރި މުއްދަތު ހަމަވެފައި ވަނިކޮށް އެ މަގާމަށް ދާއިމީ މީހަކު ހޯދަން އިއުލާންކުރުމުން ކުރިމަތިލުމުންނެވެ. ކުށުގެ ރެކޯޑް ސާފުކުރަން ކައުންސިލުން ފޮނުވީ ޕްރޮބޭޝަންގެ މުއްދަތުގެ ތެރޭގަ އެވެ.
"އަޅުގަނޑު މި އަންނަނީ ސަރުކާރުގެ ހިލޭ ޑިގްރީއަށް ކިޔަވަމުން، އެ 23 ދުވަހާ ހެދި މި ފުރުސަތު ވެސް ބަންދުވެދާނެ،" އޭނާ ބުންޏެވެ.
ކައިވެންޏެއްކޮށް ދަރިއަކު ވެސް ލިބިފައިވާ އިބްރާހިމް ރަޝީދު، ކިޔަވަމުން އަންނަނީ އަރަބި ޓީޗިން އެވެ.
"ޖަލުން ފަރުވާއަށް ބަދަލުކޮށް، އެ ޕްރޮގްރާމް ނިންމައި އެއްވެސް ޝަރުތަކާ ނުލައި އަޅުގަނޑު މިނިވަންކުރީ. އޭގެ ފަހުން ހަތް އަހަރު ވި އިރު، އެ މުއްދަތު ތަންފީޒުކުރަން އަޅުގަނޑެއް ނުގެންދޭ. އެ 23 ދުވަސް އަޅުގަނޑު ޖަލުގައި އޮންނާކަށް އުނދަގުލެއް ނޫން. އެކަމަކު، އަޅުގަނޑު ވަޒީފާ ގެއްލިއްޖެ. ޑިގްރީ ހުއްޓިދާނެ ކަމުގެ ބިރު އޮތީމަ ދެރަވަނީ،" އޭނާ ބުންޏެވެ.
މާފުށީ ޖަލު: އެތަނުގައި އިބްރާހިމް ރަޝީދު އެންމެ ފަހުން ތަންފީޒުކުރީ ވައްކަމުގެ މައްސަލައެއްގައި އިއްވި ހުކުމެއް.-- ފޮޓޯ: މިހާރު ފައިލް ފޮޓޯ
ކަރެކްޝަނަލް ސާވިސްގެ މީޑިއާ އޮފިޝަލަކު ވިދާޅުވީ އިބްރާހިމް ރަޝީދު ތަންފީޒުކުރަން ޖެހޭ 23 ދުވަސް އެބައޮތް ކަމަށެވެ. މަސްތުވާތަކެތީގެ މައްސަލާގައި ކުރި ހުކުމް ބާތިލްކޮށްފައި ވިޔަސް ވައްކަމުގެ މައްސަލައިގެ ހުކުމުގެ ބާކީ މުއްދަތު ތަންފީޒުކުރަން ހަވާލުކޮށްދޭން ފުލުހުންނަށް ނޮވެމްބަރު، 21، 2015 ގައި ކަރެކްޝަނަލް ސާވިސް އިން އަންގާފައި އޮތް ކަމަށް ވެސް އޮފިޝަލް ވިދާޅުވި އެވެ.
އިބްރާހިމް ރަޝީދު ބުނި ގޮތުގައި އޭނާގެ ހުކުމުގެ ބާކީ 23 ދުވަސް އޮތަސް ދޫކޮށްލި ގޮތުން، ތަންފީޒުކުރަންޖެހޭ ކަމެއް ނޭނގެ އެވެ.
އިބްރާހިމް ރަޝީދު ބުނީ މައިންބަފައިން ވަކިވެ ދިމާވި ގޮތުން މަސްތުވާތަކެތީގެ ތެރެއަށް އުމުރުން ނުވަ އަހަރުގައި ވަދެވި ކުށުގެ މާހައުލުން އަރައިނުގަނެވި އުޅުން ދުވަސްތަކުގެ މަތިން މިހާރު ހަނދާން ވެސް ކުރަން ބޭނުން ނުވާ ކަމަށެވެ. ހަޔާތުން ގެއްލުނު އެ ދުވަސްތަކާ މެދު އޭނާ ދެރަވެ އެވެ. މަސްތުވާތަކެތި ބޭނުންކުރުމާއި ވިއްކުމާއި މާރާމަރީ އާއި ވައްކަންތަކަކީ އޭނާގެ ހިތްދަތި މާޒީ އެވެ.
މިކަންކަމާ ދުރުވެ، 2015 ގައި ޖަލުން މިނިވަންވީ ފަހުން އިބްރާހިމް ރަޝީދު އަންނަނީ ރަނގަޅު ދިރިއުޅުމަކަށް މަސައްކަތް ކުރަމުންނެވެ. ވޭތުވެދިޔަ ހަތް އަހަރުގެ ތެރޭގައި އޭނާ އިސްލާހުވެއްޖެ ކަން ބަހާއި އަމަލުން އަންނަނީ ދައްކަމުންނެވެ.
"ޖަލުން ނުކުތީމަ ވަޒީފާއެއް ދޭނެ މީހަކު ނުވި. އެހެންވެ ދިޔައީ މަހަށް. އެ ފައިސާ އިން ފެށީ ކިޔަވަން،" އޭނާ ބުންޏެވެ.
އިބްރާހިމް ރަޝީދު ބުނި ގޮތުގައި ކުޑަކުއްޖެއްގެ ގޮތުގައި ހުރެ ކުރި ކުށްތަކުގެ އަދަބު ޖުވެނައިލް ކޯޓުން ލުއިކޮށްދިނީ އޭނާ އިސްލާހުވެ މުޖުތަމައަށް ނުކުތުމުގެ ފުރުސަތަކަށް ކަން ހަނދާނުގައި ހުރެ އެވެ. ފަރުވާ އިން ސަލާމަތްވާން ކުރި މަސައްކަތް ފުރަތަމަ ކާމިޔާބެއް ނުވި އެވެ. އެކަމަކު 2013 ގައި މާފުށީ ޖަލަށް ލުމާ އެކު އިސްލާހުވުން ނޫން ވިސްނުމެއް ނުގެންގުޅޭ ކަމަށް އިބްރާހިމް ރަޝީދު ބުންޏެވެ.
"އުނދަގޫވި އަރައިގަންނަން. ފުރަތަމަ ވިސްނެން ފެށީ އަހަރެން ދެން [މަސްތުވާތަކެތި] ބޭނުމެއް ނުކުރާނަމޭ، ވިއްކާނީއޭ. އެއީ ވެސް ރަނގަޅު ގޮތެއް ނޫންކަން ވިސްނެން ވެސް ދުވަސްތަކެއް ހޭދަވި،" އޭނާ ކިޔައިދިނެވެ.
އިސްލާހުވާން ޖަލުގައި މާބޮޑު ފުރުސަތުތަކެއް ނެތުމުން، އޭނާ ބުނި ގޮތުގައި، އިހްތިޔާރުކުރީ އަޅުކަމެވެ. ގަވާއިދުން ނަމާދު ކުރަން ނިޔަތް ގަނެ ފެށިއަސް ދޫކޮށްލެވޭ ފަހަރުތައް ވެސް ދިޔަ އެވެ. އެކަމަކު ފަހުން އޭނާއަށް ނަމާދެއް ވައްޓާނުލައި ޖަލުގެ ދުވަސްތައް އަމާންވި ކަމަށް ބުންޏެވެ.
ހިންމަފުށީގައި ހުންނަ ރިހެބަށް އިބްރާހިމް ރަޝީދު ބަދަލުކުރީ ދެ އަހަރުގެ ހުކުމުން ބާކީ 23 ދުވަސް އޮއްވަ އެވެ.
"މި ދެތިން ހަފުތާއާ ހެދި ހުރިހާ ކަމެއް ހުއްޓުން ބަލައެއް ނުގަނެވޭ. މީހަކާ އިނދެ ދަރިއެއް ލިބި ރަނގަޅު ވަޒީފާއެއް ލިބިގެން އުޅެ އުޅެ ހުއްޓައި، ދެރަވަނީ ކޯސް ވެެސް ދޫކޮށްލަން ޖެހިދާނެތީ،" އިބްރާހިމް ރަޝީދު ބުންޏެވެ.
އިބްރާހިމް ރަޝީދު ބުނި ގޮތުގައި ވަޒީފާ ގެއްލުމުން ކުރިމަތިވީ ހިތްދަތި ކަމުގައި، ސިޔާސީ ފަރާތްތަކާ ވެސް އޭނާ އެ ވާހަކަ ހިއްސާކޮށްފި އެވެ. ބޭނުންވަނީ އިންސާފުވެރި ގޮތެއް އެކަމަށް ހޯދުމަށެވެ.
"އަޅުގަނޑަކީ ސިޔާސީ މީހެއް ނޫންވީމަ، ނޫނީ އެއްވެސް ޕާޓީއެއްގައި ނޫޅޭ މީހަކަށް ވާތީ އަދި އެއްވެސް ގޮތެއް ނުފެނޭ. ކަމާބެހޭ އިދާރާތަކުގައި ވެސް ވާހަކަ ދައްކައިގެން ގޮތެއް ނުފެނުނީމަ ފޭސްބުކްގައި ލިއުނީ،" އޭނާ ބުންޏެވެ.
މިކަމުގައި މިހާތަނަށް އިބްރާހިމް ރަޝީދަށް ގޮތެއް ނުފެނެ އެވެ. ޖަލަށް ގެންގޮސްފި ނަމަ ލޯނަށް ޝަރުތު ހަމަނުވެ، އޭނާގެ ކިޔެވުން ހުއްޓޭނެ އެވެ.
"ކިޔެވުމުގެ އެ ފުރުސަތެއް ވެސް އަޅުގަނޑަކަށް ނުލިބޭނެ އަލުން،" އޭނާ ބުންޏެވެ.
ފޭސްބުކްގައި ލިއުމުން، އިބްރާހިމް ރަޝީދުގެ މައްސަލައަށް މިހާރު އޮތީ ކަރެކްޝަނަލް ސާވިސްގެ މާބޮޑު ސަމާލުކަމެއް ލިބިފަ އެވެ. އޭނާއާ މެދު އެތަނުން އަމަލުކުރާނެ ގޮތެއް އަދި ސާފެއް ނޫނެވެ.
އެކަމަކު ކަރެކްޝަންސުން ބުނީ އެގޮތަށް ދިމާވެފައި ތިބި މީހުންނަށް ހައްލެއް ހޯދަން މަސައްކަތް ކުރަމުން އަންނަ ކަމަށެވެ.
އޮފިސަރުންގެ މައްސަލަ:އެންމެން ދޫކޮށްލަން ޕީޖީން އެދެފި
މަނާތަކެތި ވައްދާ ނެޓްވޯކްގެ ފަސް އޮފިސަރަކަށް ދައުވާ!
"ފުލުހުން މައުލޫމާތުދެނީ ކޯޓާ ޗެލެންޖު ކުރާކަށް ނޫން"
ހުސޭނުބޭގެ އެއް ގާތިލު، ޑޮކްޓަރުގެ ލަފާގެމަތިން ގެއަށް
އަޑުބަރޭ ރާއްޖޭގައި ނެތް ކަމަށް ފުލުހުން އަންގައިފި
"ގެއްލުނު" އަޑުބަރޭ ހޯދަން ބަލަންޖެހޭ ކަންކަން ބަލަނީ
ހުކުމްކުރިއިރު، އަޑުބަރޭ ރާއްޖެއަކު ނެތް!
މަހްލޫފްގެ ޝަރީއަތް ކެންސަލްކޮށްފި
1.7 ކިލޯ ޑްރަގް އެތެރެކުރުމުގެ ދައުވާ ސާބިތެއް ނުވި
ޑްރަގް ޑީލަރުން ދޫވުން: "ގަސްތުގައި ގޯހެއް ނުހަދާނެ"