ރޯދަމަހު ސަރުކާރުގެ ރަސްމީ ގަޑިއަކީ ހެނދުނު 9 އިން މެންދުރު 1 އަށް

އަންނަ ރޯދަމަހު ސަރުކާރުގެ ރަސްމީ ގަޑިއަކީ ހެނދުނު 9:00 އިން މެންދުރު 1:00 އަށް ކަމަށް ރައީސް އިބްރާހިމް މުހައްމަދު ސޯލިހު މިއަދު ކަނޑައަޅުއްވައިފި އެވެ.

ރައީސް އޮފީހުން ބުނީ، ރޯދަ މަހަށް ފަހު، ހަ ރޯދައިގެ ދުވަސްވަރު ވެސް [ޝައްވާލު މަހުގެ ފުރަތަމަ ހަތް ދުވަސް] ސަރުކާރުގެ ރަސްމީ މަސައްކަތު ގަޑިއަކީ ހެނދުނު 9:00 އިން މެންދުރު 1:00 އަށް ކަމަށް ރައީސް ނިންމަވާފައިވާ ކަމަށެވެ.

"ވީމާ، އެ ދުވަސްތަކުގައި މި ދެންނެވި ވަގުތަށް ފައްތަވައިގެން މަސައްކަތްތައް ރޭއްވެވުމަށް ހާއްސަ ސަމާލުކަމެއް ދެއްވުމަށް ދަންނަވަން ރައީސުލްޖުމްހޫރިއްޔާ ވިދާޅުވި އެވެ،" ރައީސް އޮފީހުގެ ދެންނެވުމުގައި ވެ އެވެ.

މި އަހަރުގެ ރޯދަމަސް ފެށެނީ ކަލަންޑަރުގައިވާ ގޮތުން އަންނަ މަހުގެ ދެވަނަ ދުވަހު އެވެ.