އިންޑިއާގެ އެހީ އަފްގާނަށް ފޮނުވާނީ ޕާކިސްތާނުގެ ތެރެއިން

އަފްގާނިސްތާނުގެ ރައްޔިތުންނަށް މިހާރު ކުރިމަތިވެފައިވާ ކާބޯތަކެތީގެ ދަތިކަމަށް ލުޔެއް ދިނުމުގެ ގޮތުން އިންޑިއާ އިން ހަދިޔާކުރާ ގޮދަން، އަފްގާނިސްތާނަށް ގެންދިއުމުގައި ޕާކިސްތާނުގެ ސަރަހައްދު ބޭނުންކުރުމުގެ ހުއްދަ ޕާކިސްތާނުން ދީފި އެވެ.

އިންޑިއާ އިން އަފްގާނިސްތާނަށް ހަދިޔާކުރަން ނިންމީ 50 ހާސް ޓަނުގެ ގޮދަނެވެ. މި ތަކެތި އެއްގަމު މަގުން އަފްގާނިސްތާނަށް ގެންދިއުމުގައި ޕާކިސްތާނުގެ ސަރަހައްދު ބޭނުންކުރުމަށް އެ ގައުމުން ހުއްދަ ދިނީ، މިދިޔަ އަހަރުގެ ނޮވެމްބަރު މަހުގެ ތެރޭގައި އިންޑިއާ ސަރުކާރުން އެކަމަށް އެދުމުންނެވެ.

ޕާކިސްތާނު ސަރުކާރުން ބުނާ ގޮތުގައި އިންޑިއާ އިން ދޭ ގޮދަންތައް ބަލައި އެ ގައުމަށް ދާނީ އަފްގާނިސްތާނުގެ ލޮރީތަކެވެ. އެ ލޮރީތައް އިންޑިއާ އަށް ގޮސް ގޮދަން ބަރުކޮށްގެން ޕާކިސްތާނުގެ ވަގާހް ބޯޑަރު ހުރަސްކޮށް ޕާކިސްތާނުގެ ތެރެއިން ލާފައި ދަތުރުކުރާނީ އަފްގާނިސްތާނުގެ އިރުމަތީ ސަހަރެއް ކަމަށްވާ ޖަލާލް އާބާދަށެވެ.

އިންޑިއާ ސަރުކާރުން ބުނާ ގޮތުގައި އިންޑިއާ އާއި ޕާކިސްތާނު ގުޅޭ ސަރަހައްދީ ރޮނގު ކައިރީގައި އޮންނަ އައްޓާރީ އަވަށުން ގޮދަން ބަރުކުރާ ލޮރީތަކުގެ ފުރަތަމަ ގާފިލާ އަފްގާނިސްތާނަށް ދިއުމަށް ފުރާނީ މި މަހުގެ 22 ވަނަ ދުވަހު އެވެ. އިންޑިއާ އިން އަފްގާނިސްތާނަށް ހަދިޔާކުރާ ގޮދަންތަކާ ހަވާލުވަނީ، އަފްގާނިސްތާނުގެ ޖަލާލް އާބާދުގައި ތިބޭ އދ.ގެ ކާނާއާ ބެހޭ ޕްރޮގްރާމްގެ މުވައްޒަފުންނެވެ.

އަފްގާނިސްތާނުގެ ރައްޔިތުންނަށް ގޮދަން ބެހުމުގެ މަސައްކަތް ކުރާނީ އެ އިދާރާގެ ފަރާތުންނެވެ. މި މަސައްކަތް އދ.ގެ ކާނާއާ ބެހޭ ޕްރޮގްރާމާ ހަވާލުކުރުމުގެ އެއްބަސްވުމުގައި އިންޑިއާ ސަރުކާރާއި އެ އިދާރާއާ ދެމެދު ސޮއިކުރީ މިދިޔަ ހުކުރު ދުވަހު އެވެ.