އިންޑިއާގައި ރޭޕް ގިނަވަނީ ބުރުގާ ނާޅާތީ: ޒަމީރު

އިންޑިއާއަކީ ދުނިޔޭގެ ނިސްބަތުން ވެސް، އަންހެނުން ރޭޕްކުރާ އަދަދު ގިނަ ގައުމެއް ކަމަށާއި، އެ ފަދަ ހާދިސާތައް ރެކޯޑް މިންވަރަކަށް އިތުރުވަމުން ދަނީ އަންހެނުން ބުރުގާ ނާޅާތީ ކަމަށް، އިންޑިއާގެ ކަރްނާޓަކާ ސްޓޭޓްގެ ކޮންގްރެސް ޕާޓީގެ ލީޑަރު ޒަމީރު އަހްމަދު ވިދާޅުވެއްޖެ އެވެ.

ކަރްނާޓަކާ ސްޓޭޓްގެ ސްކޫލްތަކާއި ކޮލެޖްތަކުގެ މުސްލިމް އަންހެން ދަރިވަރުން ބުރުގާ އަޅައިގެން ކްލާސްތަކަށް ހާޒިރުވުން މަނާކުރުމާ ވިދިގެން، އެ ސްޓޭޓްގައި އުފެދިފައިވާ ހަމަނުޖެހުންތަކާ ގުޅިގެން ސްކޫލްތަކާއި ކޮލެޖްތައް ބަންދުކޮށްފައިވާތާ ތިން ދުވަސްވީ އެވެ. ގްރޭޑް 10 އިން ދަށުގެ ކްލާސްތަކުގެ ކިޔެވުން މިއަދު އަލުން ފެށުމަށް ހަމަޖެހިފައިވާ އިރު، ކޮލެޖްތަކާއި ޑިޕްލޮމާ ކޯސްތަކުގެ ކިޔެވުން މެދުކަނޑާލާފައިވާ މުއްދަތު މިހާރު ވަނީ މި މަހުގެ 16 ވަނަ ދުވަހާ ހަމައަށް އިތުރު ކޮށްފަ އެވެ.

ކްލާސްތަކުން ބޭރުކުރި ބައެއް އަންހެން ދަރިވަރުން އެ މައްސަލަ އެ ސްޓޭޓްގެ ހައި ކޯޓަށް ހުށަހަޅާފައިވާ އިރު، ހައި ކޯޓުގެ އިސް ފަނޑިޔާރު ހިމެނޭ ގޮތަށް ތިން ފަނޑިޔާރުންގެ ބެންޗަކުން މިހާރު އަންނަނީ އެ މައްސަލަ ބަލަމުންނެވެ. އެ މައްސަލައިގެ އަޑުއެހުންތައް މިއަދު އަލުން ފަށާނެ އެވެ.

"އަންހެން ކުދިން ބޮޑެތިވެގެން އަންނަ އިރު، އެކުދިންގެ ޒީނަތްތެރިކަން ފޮރުވުމަށްޓަކައި ބުރުގާ އަޅައި އެކުދިންގެ މޫނު ނިވައިކުރަންޖެހޭނެ. އަހަންނަށް ހީވާ ގޮތުގައި މުޅި ދުނިޔޭގައި ވެސް އަންހެނުން އެންމެ ގިނައިން ރޭޕްކުރަނީ އިންޑިއާގައި. ސަބަބަކީ ކޮބާ؟ އެކަމުގެ ސަބަބަކީ، އަންހެނުން އެ މީހުންގެ މޫނު ނިވައި ނުކުރުން. ހިޖާބް އެޅުމަކީ މަޖުބޫރުކަމެއް ނޫންކަމަށް ދެކި އެގޮތަށް އަމަލު ކުރަމުން އަންނަތާ މިހާރު އެތައް އަހަރެއް ވެއްޖެ،" ކަރްނާޓަކާ ސްޓޭޓްގެ ކޮންގްރެސް ލީޑަރު ޒަމީރު ވިދާޅުވި އެވެ.

ކަރްނާޓާކާ ސްޓޭޓްގެ ސަރުކާރުން، ސްކޫލްތަކާއި ކޮލެޖްތަކުގެ ދަރިވަރުން ބުރުގާ އެޅުން މަނާކުރުމާ ގުޅިގެން، ޖަންމޫ އާއި ކަޝްމީރުގެ ކުރީގެ ދެ ޗީފް މިނިސްޓަރުން ކަމަށްވާ، މަހްބޫބާ މުފްތީ އާއި ފާރޫގު އަބްދުﷲ ވެސް އިއްޔެ ވަނީ، ވެރިކަންކުރާ ބާރަތިޔާ ޖަނާތާ ޕާޓީ (ބީޖޭޕީ) އަށް ވަރަށް ބޮޑަށް ފާޑު ވިދާޅުވެފަ އެވެ. ޕީޕަލްސް ޑިމޮކްރެޓީކް ޕާޓީގެ ވެރިޔާ މަހްބޫބާ މުފްތީ ވިދާޅުވީ، ބުރުގާއާ ހަމައިން ބީޖޭޕީ އަދި ހުއްޓައިނުލާނެ ކަމަށެވެ.

"މުސްލިމުންގެ އެހެން ޝިއާރުތަކުގެ ފަހަތުން ވެސް އެމީހުން (ބީޖޭޕީ) އަދި އަންނާނެ، އައިސް އެ ޝިއާރުތައް ވެސް ނައްތައިލާނެ. އިންޑިއާގެ މުސްލިމުންނަކީ ހަމައެކަނި އިންޑިއާ ރައްޔިތުން ކަމުގައި ވުމަކުން މިހާރު ނުފުދޭ. ސަލާމަތް ވާން ބޭނުމިއްޔާ، އެމީހުންނަކީ ބީޖޭޕީގެ މެމްބަރުން ކަމުގައި ވެސް ވާން އެބަޖެހޭ،" މަހްބޫބާ މުފްތީ ވިދާޅުވި އެވެ.

ނޭޝަނަލް ކޮންފަރެންސްގެ ރައީސް ފާރޫގު އަބްދުﷲ ވިދާޅުވީ އެމީހަކު ބޭނުން ގޮތަކަށް ކައިބޮއެ އަދި ހެދުން އަޅައި އެމީހަކު ގަބޫލުކުރާ ދީނީ އަގީދާއަކާ އެއްގޮތަށް އުޅުމަކީ ކޮންމެ މީހަކަށް ވެސް ލިބިގެންވާ މިނިވަންކަމެއް ކަމަށެވެ. ނަމަވެސް ރައްޔިތުންގެ މެދުގައި ބައިބައިވުން އުފައްދައިގެން އިންތިހާބުގައި ކުރި ހޯދުމަށްޓަކައި، ހަރުކަށި ފިކުރެއްގެ ބަޔަކު ދީނަށް ހަމަލާ ދެމުންދާ ކަމަށް ވެސް އޭނާ ވިދާޅުވި އެވެ.

ކަރްނާޓަކާ ސްޓޭޓްގެ ސަރުކާރުން ނިންމާފައިވަނީ، މުސްލިމް އަންހެން ކުދިން ބުރުގާ އަޅައިގެން ކްލާސްތަކަށް ހާޒިރުވާ ނަމަ، ކްލާސްތަކަށް ނުވައްދާށެވެ. އެ ސްޓޭޓްގެ ސަރުކާރުން ބުނާ ގޮތުގައި ބުރުގާއަކީ ސްކޫލްތަކުގެ ރަސްމީ ޔުނީފޯމުގައި ހިމެނޭ ބައެއް ނޫނެވެ.