ކޮމަންޑޫ ދާއިރާގެ އިންތިހާބު ރާޝިދަށް

ކެމްޕޭންގެ ވާދަވެރި ކަމުން މުޅި ރާއްޖޭގެ އަމާޒު ހުއްޓިފައިވާ ކޮމަންޑޫ ދާއިރާގެ ބައި އިލެކްޝަނުގެ ވޯޓުލުން މިއަދު ހެނދުނު ފަށައިފި އެވެ.

މި ދާއިރާގައި ހިމެނޭ ކޮމަންޑު އާއި މަރޮއްޓާއި ފޯކައިދޫގެ އިތުރުން މާލޭގައި ވެސް ވޯޓުލުން ކުރިއަށް އެބަދެ އެވެ. ވާދަވެރި މި އިންތިހާބުގެ ވޯޓުލުން ފެށިއިރު ހުރިހާ ވޯޓު ފޮއްޓެއްގެ ކައިރީގައި ވަނީ ކިޔޫ ހަދައިފަ އެވެ.

ތިން ޕާޓީއަކުން މި އިންތިހާބުގައި ވާދަކުރެ އެވެ. އެއީ، ސަރުކާރު ހިންގާ ކޯލިޝަންގެ މައި ޕާޓީ، އެމްޑީޕީން މުހައްމަދު ރާޝިދާއި ޕީޕީއެމުން މޫސާ ފަތުހީގެ އިތުރުން އެމްއެންޕީން އަބްދުލް ހަންނާނެވެ.

ވޯޓުލުމުގެ ހައްގު 3،309 އަށް ވުރެން ގިނަ މީހުންނަށް ލިބެ އެވެ.

ކޮމަންޑޫ: 1،406

މަރޮށި: 703

ފޯކައިދޫ: 1،201

ކޮމަންޑު އާއި ފޯކައިދޫގައި ވޯޓުލާން ދެ ފޮށި ބަހައްޓާފައިވެ އެވެ. މަރޮށީގައި ބެހެއްޓީ އެއް ފޮއްޓެވެ. މީގެ އިތުރުން މާލޭގައި ދިރިއުޅޭ މި ތިން ރަށުގެ މީހުންނަށް ފޮށިތައް ވެސް ބަހައްޓާފައިވެ އެވެ.

ރައްޔިތުންގެ މަޖިލީހުން ގޮނޑިއެއް ހުސްވެ ބާއްވަން ޖެހުނު ބައި އިލެކްޝަންތަކުގައި މިހާ ވާދަވެރި، އިންތިހާބެއް ނުދެ އެވެ. އިންތިހާބު އިއުލާންކުރުމާ އެކު ތިން ޕާޓީގެ ވެސް އިސް ބޭފުޅުން ދާއިރާގެ ރަށްތަކަށް ވަޑައިގެން ގިނަ ދުވަސްތަކެއް ވަންދެން ތިއްބަވައި ކެމްޕޭން ކުރެއްވި އެވެ.

މި ބައި އިލެކްޝަނެއް ބާއްވަން ޖެހުނީ އެ ގޮނޑި ފުރުއްވި އެމްޑީޕީގެ މެމްބަރު ހުސެއިން ވަހީދު ކެންސަރު ބަލީގައި އަވަހާރަވުމާ ގުޅިގެންނެވެ.