އުރީދޫ ކަސްޓަމަރުންނަށް އިންޓަނެޓް ބޭނުންކުރުމުގައި ދަތިތަކެއް ދިމާވެދާނެ

އުރީދޫ ކަސްޓަމަރުންނަށް އިންޓަނެޓް ބޭނުން ކުރުމުގައި ދަތިތަކެއް ދިމާވެދާނެ ކަމަށް އެ ކުންފުނިން ބުނެފި އެވެ.

އެ ކުންފުނިން ކުރި ޓްވީޓެއްގައި ބުނީ އިންޓަނެޓް ހިދުމަތަށް ބުރޫ އަރާނެ ކަމަށް ލަފާކުރެވެނީ އެ ކުންފުނީގެ ބައިނަލްއަގުވާމީ އައިއެސްޕީ ޕާޓްނަރަކަށް ދިމާވި މައްސަލައަކާ ގުޅިގެން ކަމަށެވެ. އައިއެސްޕީ ޕާޓްނަރުންނަކީ ކުންފުނިތަކާ ގުޅިގެން އިންޓަނެޓް ހިދުމަތް ދޭ ބައިނަލްއަގުވާމީ ކުންފުނިތަކެވެ.

މި މައްސަލަ ހައްލުކުރުމަށް އެ ޕާޓްނަރާ އެކު އުރީދޫން މަސައްކަތް ކުރަމުން އަންނަ ކަމަށާއި މައްސަލަ ހައްލުވިހާ އަވަހަކަށް ހިދުމަތް މެދުނުކެނޑި ލިބެމުންދާނެ ކަމަށް އުރީދޫން ބުންޏެވެ.

މިކަމުގެ ސަބަަބުން ކަސްޓަމަރުންނަށް ދިމާވާ ދަތިތަކަކަށް އުރީދޫން ވަނީ މައާފަށް އެދިފަ އެވެ.