ކުރީގެ އަންހެނުން ކިރަންގެ އާ ފިލްމު އާމިރު ޕްރޮޑިއުސް ކުރަނީ

ކުރީގެ އަންހެނުން ކިރަން ރާއޯ މިހާރު އަނެއްކާ ވެސް ފިލްމެއް ޑައިރެކްޓްކުރަން ތައްޔާރުވަމުން އަންނާތީ އެ ފިލްމުގެ ޕްރޮޑިއުސަރެއްގެ ގޮތުގައި އާމިރު ޚާން ބައިވެރިވާނެ ކަމަށް ރިޕޯޓްތައް ބުނެފި އެވެ.

އާމިރާއި ކިރަންގެ 16 އަހަރުވީ ކައިވެނި ރޫޅާލީ މިދިޔަ އަހަރު އެވެ. ކައިވެނީގެ ގުޅުން ނިމުނަސް، އެ ދެ މީހުންގެ ދޭތެރޭ އޮތް ޕްރޮފެޝަނަލް ގުޅުމަކަށް އެއްވެސް ބަދަލެއް ނާދެ އެވެ. އާމިރުގެ ކުރިއަށް އޮތް ފިލްމު "ލާލް ސިންގް ޗައްޑާ" ގައި ވެސް ކިރަން ޕްރޮޑިއުސަރެއްގެ ގޮތުގައި ހިއްސާވާ އިރު، އެ ފިލްމުގެ މަސައްކަތުގައި އޭނާގެ ދައުރު ބޮޑެވެ.

މީޑިއާތަކުން ބުނީ 2010 ގައި ޑައިރެކްޓްކުރި "ދޯބީ ގާތު" އަށް ފަހު ކިރަން ޑައިރެކްޓްކުރަން ހަމަޖެހިފައިވާ ފިލްމުގެ ވާހަކަ އާމިރަށް ކިޔައިދިނުމާ އެކު، ވަގުތުން އޭގެ ޕްރޮޑިއުސަރެއްގެ ގޮތުގައި ބައިވެރިވާން ނިންމާފައިވާ ކަމަށެވެ.

ކުރީގެ ފިލްމާ ހިލާފަށް ކޮމާޝަލް ހުރިހާ ރަހަތަކެއް ހިމަނައިގެން ހަދަން ނިންމާފައިވާ ފިލްމުގެ ކާސްޓުންނަށް ނަގާފައި ވަނީ މަޝްހޫރު ނޫން ޒުވާން ކާސްޓެކެވެ. އެއީ ނެޓްފްލިކްސްގެ ސީރީޒް "ޖަމްތާރާ: ސަބް ކާ ނަމްބަރު އާއޭގާ" ގެ ބަތަލު ސްޕާޝް ސްރިވަސްތާވް އާއި ސިލްސިލާ "ގުރުބާން ހުއާ" ގެ ބަތަލާ ޕްރަތިބާ ރަތުނާގެ އިތުރުން ސިލްސިލާ "ޕޭޝްވާ ބަޖިރާއޯ" ގެ އިތުރުން ބައެއް ފިލްމުތަކުގައި ވެސް މަސައްކަތްކޮށްފައިވާ ނިތާންޝީ ގޮއެލް އެވެ.

ޕިންކްވިލާ އިން ބުނި ގޮތުގައި ނަން އަދި އިއުލާން ނުކުރާ ކިރަންގެ އާ ފިލްމަކީ ބިޕްލާ ގޮސްވާމީގެ ވާހަކައަކަށް ސްނޭހާ ދެސާއި ސްކްރީންޕްލޭ ލިޔުނު އެއްޗެކެވެ. އަދި މީގެ މިއުޒިކް ރާމް ސަމްޕަތާ ހަވާލުކޮށްފައިވާ އިރު، ލަވަތަކުގެ ޅެން ލިޔުނީ އަމީތާބް ބަޓަޗާރިއާ އެވެ.

ކޮވިޑްގެ ހާލަތަށް ރިއާޔަތްކޮށް މި މަހުގެ 20 ގައި ފިލްމުގެ ޝޫޓިން ފެށޭތޯ ކިރަން އާއި އޭނާގެ ޓީމުން މަސައްކަތްކުރަމުން އަންނަ ކަމަށް މީޑިއާތަކުން ބުންޏެވެ. އަމާޒަކީ އެޕްރީލް މަހުގެ ތެރޭގައި ޝޫޓިން އެއްކޮށް ނިންމުމެވެ.

ކިރަންގެ ފުރަތަމަ ފިލްމު "ދޯބީ ގާތު" އަކީ އާމިރު ވެސް ރޯލެއް ކުޅުނު، އެކަމަކު ވިޔަފާރީގެ ގޮތުން މާ ކާމިޔާބު ފިލްމެއް ނޫނެވެ. އެ ފިލްމަކީ 65 ވަނަ ބާފްޓާ އެވޯޑަށް ވެސް ފޮނުވި އެއްޗެކެވެ.