ކޮވިޑާ ހެދި އިންޑިއާ ސިނާމާގެ އާ ފެށުން ފެނަށް

އާ އަހަރާ އެކު އިންޑިއާގެ ސިނަމާތަކުގެ ވިޔަފާރީ ރަނގަޅުވާނެ ކަމަށް ލަފާކޮށްފައި އޮއްވާ، މި އަހަރުގެ އެންމެ އުންމީދީ ފިލްމު "އާރްއާރްއާރް"، އަންނަ ހުކުރު ދުވަހު ދައްކަން ފަށާ ގޮތަށް އޮއްވައި ކޮވިޑްގެ ބިރާ ހެދި އެ ފިލްމު ފަސްކުރަން ޖެހިއްޖެ އެވެ.

ރިލީޒްކުރުމުގެ ފަހުގެ ތައްޔާރީތަކާ އެކު ޕްރޮމޯޝަނަލް ހަރަކާތްތައް ވެސް ވަރަށް ފޯރީގައި ކުރިއަށް ގެންދިއުމަށް ފަހު، ފިލްމުގެ ޓީމުން މިހާރު ވަނީ ހުކުރު ދުވަހު ފިލްމު ރިލީޒްނުކުރާނެ ކަން އިއުލާންކޮށްފަ އެވެ.

އިންޑިއާގެ ބޮކްސް އޮފީހުގައި އާ ރެކޯޑްތަކެއް ހެދި "ބާހުބަލީ" ގެ ދެ ފިލްމަށް ފަހު، ޑައިރެކްޓަރު އެސްއެސް ރާޖަމޯލީ ގެނެސްދޭ "އާރްއާރްއާރް" ފަސްކުރަން ނިންމާފައި ވަނީ ފިލްމާ ގުޅުން ހުރި ހުރިހާ ފަރާތްތަކުގެ މަޝްވަރާ އާއި ލަފާގެ މަތިންނެވެ. އެހެންވެ ދެން ފިލްމު އަޅުވާނެ ރަނގަޅު ދަނޑިވަޅެއް ބަލާފައި އާ ތާރީހެއް އިއުލާންކުރާނެ ކަމަށް ބުންޏެވެ.

އިންޑިއާގައި މިހާރު ވަރަށް ބާރަށް ކޮވިޑްގެ އާ ވޭރިއަންޓް، އޮމިކްރޯން ފެތިރެމުން ދާތީ ބައެއް ހިސާބުތަކުގެ ސިނަމާތައް ވަނީ ބަންދުކޮށްފަ އެވެ. މިދިޔަ ހަފުތާގައި ވެރިރަށް ނިއު ދިއްލީގެ ހުރިހާ ސިނާމަތަކެއްގައި ވަނީ ބަންދުކޮށްފަ އެވެ.

ބެލުންތެރިން ވަރަށް އިންތިޒާރުގައި ތިބި، "އާރްއާރްއާރް" އަކީ އެންމެ ފުރަތަމަ، ޖުލައި 2020 ގައި ރިލީޒްކުރާ ގޮތަށް އޮތް ފިލްމެކެވެ. އެކަމަކު މީގެ މަސައްކަތްތަކަށް ހުރަސް އެޅުނީ ކޮވިޑާ ހެދި އެވެ. ޖުމްލަ 53.69 މިލިއަން ޑޮލަރުގެ ބަޖެޓަކުން ހަދާފައިވާ މި ޕީރިއަޑް އެކްޝަން ޑްރާމާގެ މައިގަނޑު ކާސްޓުންނަކީ ރާމް ޗަރަން، އެންޓީއާރް ޖޫނިއާ، އާލިއާ ބަޓް އަދި އަޖޭ ދޭވްގަނެވެ.

މި ފިލްމު ފަސްކުރުމާ އެކު މި އަހަރުގެ ފިލްމީ ކަލަންޑަރަށް އަނެއްކާ ވެސް ބޮޑެތި ބަދަލެއް އަންނާނެ ކަމަށް ބެލެވެ އެވެ. މި އާ އަހަރު ގެނެސްދޭން ނިންމާފައިވާ ވަރަށް ގިނަ ފިލްމުތަކުގެ ތާރީހުތައް މިހާރު ހުރީ އިއުލާން ވެސް ކޮށްފަ އެވެ.

ކޮވިޑާ ހެދި، މިދިޔަ އަހަރު ވެސް ނިންމައިލަން ޖެހުނީ ޑިސެމްބަރު 31 ގައި ރިލީޒްކުރަން އޮތް ޝާހިދު ކަޕޫރްގެ "ޖާޒީ" މި އަހަރަށް ފަސްކޮށްލައިފަ އެވެ.