އޭސީސީގެ މެމްބަރުން އުސޫލާ ހިލާފުވާ ކަމަށް ތުހުމަތުވާ މައްސަލަ ނުބަލަން ނިންމައިފި

އެންޓި ކޮރަޕްޝަން ކޮމިޝަން (އޭސީސީ)ގެ މެމްބަރުން ވަކިކުރުމުގެ މަރުހަލާ ފަށައި ޖަވާބުދާރީވުމުގެ ފުރުސަތު ދީފައި ވަނިކޮށް، އެ މުއްދަތުގެ ތެރޭގައި މެމްބަރުން، ކޮމިޝަންގެ އުސޫލާ ހިލާފަށް އަމަލުތަކެއް ހިންގަމުންދާ ކަމަށް ތުހުމަތުކުރި މައްސަލަ ނުބަލަން ރައްޔިތުން މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން މިރޭ ފާސްކޮށްފި އެވެ.

މި މައްސަލަ ނުބަލަން ނިންމީ ކޮމިޓީ އަށް ހާޒިރުވި ނުވަ މެމްބަރުންގެ ވޯޓުން، މައްސަލަ ކުރިއަށް ގެންދަން ތާއީދު ނުލިބުންނެވެ.

ކޮމިޓީގައި ވާހަކަދައްކަވަމުން ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް ތުހުމަތުކުރެއްވި ގޮތުގައި، އޭސީސީގެ މެމްބަރުން ވަކިކުރުމުގެ މަރުހަލާގައި ޖަވާބުދާރީވާން ފުރުސަތު ދީފައި ވަނިކޮށް، އެ ކޮމިޝަނުން ސަރުކާރުގެ ބައެއް މިނިސްޓަރުންނަށް މެސެޖުކުރަމުންދާ ކަމަށާއި، އެކަން ކޮށްފައި ވަނީ އެ މިނިސްޓަރުންނާ ގުޅޭ އެއްވެސް މައްސަލައެއް މީގެ ކުރިން ކޮމިޝަނަށް ހުށަހަޅާފައި ވެސް ނެތްއިރު ކަމަށެވެ.

"އިންވެސްޓިގޭޝަންތައް ނުކުރާކަށް ނުބުނަން. ކޭސް މެނޭޖުމަންޓް ސިސްޓަމެއް މެދުވެރިކޮށް އެބޭފުޅުން މައްސަލަތައް ނަގައި މައްސަލަތައް ބަލާއިރު އެއާ ހިލާފަށް އާ ކަންތައްތަކެއް ފެށިގެން އައީމަ އެއީ މި ދަނޑިވަޅުގައި އެންމެ ރަނގަޅަށް ދާ ކަމެއްގެ ގޮތުގައި ފާހަގައެއް ނުވޭ،" އޭނާ ވިދާޅުވި އެވެ.

މި ކޮމިޓީ ބައްދަލުވުން މިރޭ ބާއްވާ އުޅޭކަން ނޫސްތަކުގައި ޖެހުމުން އޭސީސީގެ ރައީސް މަރިޔަމް ޝިއުނާ، އެ ކޮމިޓީގެ މުގައްރިރު އައްޑޫ މީދޫ ދާއިރާގެ މެމްބަރު ރޮޒެއިނާ އާދަމަށް މެސެޖުކުރައްވައި، އޭނާ ވަނީ މި ތުހުމަތުތަކަށް އިންކާރުކުރައްވައިފަ އެވެ.

މަގާމުން ވަކިކުރުމުގެ ކުރިން ލިއުމުން ޖަވާބުދާރީވާން އޭސީސީގެ މެމްބަރުންނަށް ދިނީ ފަސް ދުވަހުގެ މުއްދަތެކެވެ. އެ މުއްދަތު ހަމަވާނީ އަންނަ އާދީއްތަ ދުވަހަށެވެ.

އޭސީސީގައި މިވަގުތު ތިއްބެވީ ކޮމިޝަންގެ ރައީސް ޝިއުނާ އާއި ނައިބު ރައީސް ފާތުމަތު އަނޫލާގެ އިތުރުން އައިޝަތު އަބްދުﷲ އެވެ. ފަސް މެމްބަރުން ތިއްބަވާ ކޮމިޝަނުން އިބްރާހިމް ޝަކީލް އާއި އަލީ އަޝްރަފް ވަނީ އިސްތިއުފާ ދެއްވައިފަ އެވެ.

އޭސީސީގެ މެމްބަރުން ވަކިކުރުމުގެ މަސައްކަތް ކުރިއަށް ގެންދަން މިނިވަން މުއައްސަސާތަކާ ބެހޭ ކޮމިޓީން ނިންމީ މައްސަލަތައް ނުބެލި ލަސްވާކަމުގެ ކަންބޮޑުވުންތަކާ އެކުގަ އެވެ. މިކަމުގައި އެތައް ފަހަރަކު ކޮމިޓީއަށް ހާޒިރުކޮށް ސުވާލުކޮށްފައިވެ އެވެ.