އިންޑިއާ ފަސްޓުން އިންޑިއާ އައުޓަށް: މުޅި އިންޑިއާ ގޯސްވީ ކީއްވެ؟

އޮކްޓޯބަރު 2015ގެ ތެރޭގައި އިންޑިއާގެ ކުރީގެ ފޮރިން މިނިސްޓަރު ސުޝްމާ ސްވަރާޖް ރާއްޖެ އަށް ކުރެއްވި ދަތުރަށް ފަހު އެ ގައުމުގެ ސަރުކާރުން އާންމު ކުރި ނޫސް ބަޔާނުގައި ވެ އެވެ؛

"ރާއްޖޭގެ ހާރިޖީ ސިޔާސަތަކީ އިންޑިއާ ފަސްޓް ޕޮލިސީ ކަމުގެ ޔަގީންކަން ރައީސް އަބްދުﷲ ޔާމީން ދެއްވާފައިވާތީ އުފާކުރަމެވެ."

ޗައިނާ އާ ގުޅުން ބަދަހި ކުރުމުގެ ކުރިން، އޭރުގެ ރައީސް އަބްދުﷲ ޔާމީންގެ ވިސްނުންފުޅު އޭރު ހުރީ އިންޑިއާ ފަސްޓް ޕޮލިސީ އަށެވެ. ހާރިޖީ ސިޔާސަތާ ބެހޭ ގޮތުން އޭރު އިދިކޮޅުން ދެއްކި ހުރިހާ ވާހަކަތަކަކަށް އޭރުގެ ވަޒީރުން ވެސް ދެއްވި ރައްދަކީ ޔާމީން ގެންގުޅުއްވާ "އިންޑިއާ ފަސްޓް ޕޮލިސީ" އެވެ.

އެކަމަކު މައިދާން އެނބުރި، އިދިކޮޅު ލީޑަރެއްގެ ގޮތުގައި ޔާމީން މަގުމައްޗަށް ނުކުމެވަޑައިގެންނެވި އިރު، އެމަނިކުފާނު ތުރުކުރައްވައިގެން ހުންނަވާ ޓީޝާޓުގައި ބޮޑު އަކުރުން މިހާރު ޖަހާފައި އޮންނަނީ "އިންޑިއާ އައުޓް" އެވެ. މިއީ ވޭތުވެދިޔަ ދެތިން ދުވަހަކު އެންމެ ގަދައަށް ބަހުސް ކުރި އެއް މައްސަލަ އެވެ. އަދި މިވަރުގެ ކަމެއް 2023 ގެ ރިޔާސީ އިންތިހާބަށް ތައްޔާރަށް ހުންނެވި ސިޔާސީ ލީޑަރަކު ކުރައްވަން ހެޔޮވާނެތޯ، މިއީ ވެސް އާންމު ސުވާލެކެވެ.

އެއްވެސް ޝައްކެއް ނެތް މިންވަރަށް އެނގޭ ކަމަކީ އިންޑިއާގެ ސިފައިން ރާއްޖޭގައި އެބަތިބި ކަމެވެ. އެކަމަކު މި ސަރުކާރުން ދައްކަން ބޭނުންވި ވާހަކައެއް ވެސް ނޫނެވެ. އިންޑިއާގެ އެއްބަސްވުންތަކުގައި ޝަރުތުކޮށްފައި އޮތް ގޮތަށް އެކަން ފޮރުވައިގެން ތިބެ، "ޓެކްނިކަލް މީހުން" ނޫން ބައެއް ނެތޭ އެތައް ފަހަރަކު މީޑިއާ ކުރިމަތީގައި ވެސް މި ސަރުކާރުން ބުންޏެވެ. ފަހު ގަޑީގައި މަޖިލީހަށް ވައްދައި، މައްސަލަ ހޫނު ކޮށްލުމުން 70 އަށް ވުރެ ގިނަ ސިފައިން ރާއްޖޭގައި ތިބި ކަމަށް ޑިފެންސް މިނިސްޓްރީ އާއި ދިވެހި އަސްކަރިއްޔާ އިން އެއްބަސްވި އެވެ.

މިކަމަކީ ޔާމީން އާއި ޕީޕީއެމް/ޕީއެންސީގެ ލީޑާޝިޕުން ވަކި އެއްޗެއް ނުބުނެ، ވަކި ސްޓޭންޑެއް ނެގުމުގެ މާ ކުރިން ވެސް އެތައް ބައެއްގެ ކަންބޮޑުވުން އޮތް މައްސަލަ އެކެވެ. މި މައްސަލައިގައި އާންމުން ދޭތެރެއަކުން ކަންބޮޑުވުން ފާޅުކުރަމުން ދިޔަ އެވެ.

މިހާރު އިންޑިއާ އައުޓް ލޯގޯ ޖެހި ބަޔާންތަކާއި ޕާޓީގެ ހަރަކާތްތަކުގައި އެ ސްލޯގަންގެ ޓީޝާޓުތައް ބޭނުންކޮށް އިންޑިއާ އައުޓް ހަރަކާތްތައް ފުޅާ ކުރި ނަމަވެސް، ޔާމީން މިނިވަންވުމުގެ ކުރިން "މިހާރު"އާ ވާހަކަ ދެއްކެވި އިދިކޮޅު ލީޑާޝިޕްގެ އިސް ބޭފުޅަކު ވެސް ވިދާޅުވި ގޮތުގައި އޭނާ "އިންޑިއާ އައުޓް" ކެމްޕެއިނާ ވަރަށް ދެކޮޅެވެ.

އިދިކޮޅުން ކުރަނީ "އިންޑިއާ މިލިޓަރީ އައުޓް" ކެމްޕެއިނެވެ. އެ ގައުމާ ގުޅުން އޮތުމަކީ މައްސަލައެއް ނޫން ކަމަށް އޭނާ ތަކުރާރުކޮށް ވިދާޅުވި އެވެ.

"އިންޑިއާ އައުޓް އެކޭ ނުކިޔާނަން ދުވަހަކު ވެސް. އިންޑިއާ މިލިޓަރީ އައުޓް އަކީ ރަނގަޅު ގޮތް،" އޭނާ ވިދާޅުވެފައި ވެ އެވެ.

ނަމަވެސް ޔާމީން މިނިވަންވުމަށް ފަހު އިދިކޮޅު ހަރަކާތްތަކުގެ މިސްރާބު ވަރަށް ފާޅުގައި އަނެއްކާވެސް "އިންޑިއާ އައުޓް" އާ ދިމާލަށް އެނބުރިއްޖެ އެވެ. އަދި މިހާރު އެ ޕާޓީގެ ޖަލްސާތަކުގައި ދައްކަނީ ވެސް ހަމައެކަނި އިންޑިޔާ ސިފައިން ރާއްޖޭގައި ތިބޭ މައްސަލައެއް ނޫނެވެ.

ޔާމީން ނާކާމިޔާބުވި 2018 ވަނަ އަހަރުގެ ރިޔާސީ އިންތިހާބު "ވަގަށް ނެގީ އިންޑިއާގެ އެހީތެރިކަމާ އެކީ" ކަމަށް ދިމާލަށް ބުނެފި އެވެ. އެ އަހަރުގެ ފެބްރުއަރީ 1 ގައި ސުޕްރީމް ކޯޓުން އަމުރު ނެރުމުގެ ފަހަތުގައި ވެސް އޮތީ އިންޑިއާގެ އެހީތެރިކަން ކަމަށް ތުހުމަތު ކުރެ އެވެ. ނޮވެމްބަރު 3 ގެ ހަމަލާއަކީ ވެސް އިންޑިއާ ފަހަތުގައި އޮވެގެން ކުޅުނު ގޭމެއް ކަމަށް ވެސް ތުހުމަތު ކޮށްފި އެވެ.

"އަސްލު މައްސަލައަކީ އިންޑިއާ ސިފައިން ތިބުން. އެކަމަކު އިދިކޮޅުގެ ވާހަކަތައް މި ހުންނަ ގޮތުން ހީވަނީ އެހެން ހަސަދައެއް ސީދާ އެ ގައުމާ އޮންނަހެން. ބޭނުމަކީ ސިފައިން މި ގައުމުން ނެރުން. އިންޑިއާ އާ ގުޅުން ކަނޑާލުމެއް ނޫން،" ހާރިޖީ ދާއިރާގެ ވަރަށް ސީނިއާ ލެވަލެއްގައި މަސައްކަތް ކުރެއްވި ބޭފުޅަކު ވިދާޅުވި އެވެ.

އެހެންކަމުން ޕީޕީއެމް އިން ކުރިން އެންޑޯޒް ކުރި "އިންޑިޔާ މިލިޓަރީ އައުޓް" ކެމްޕެއިން މިހާރު "އިންޑިޔާ އައުޓް" ކެމްޕެއިނަށް ބަދަލުވީ ކީއްވެތޯ ސާފުކޮށްދޭން ޖެހެ އެވެ. ޕީޕީއެމް އަށް މައްސަލައަކަށް ވަނީ ހަމައެކަނި އިންޑިޔާ ސިފައިން ތިބުންތޯ ނޫނީ އިންޑިޔާތޯ އެ ޕާޓީން ނުބުންޏަސް އެބަ ސާފުވެ އެވެ.

އެކަމާ ގުޅޭ ގޮތުން ކުރީގެ ޕޮލިސް ކޮމިޝަނަރުގެ މަގާމް އަދާ ކުރެއްވި އަދި އެމްއެންޕީގެ ނައިބު ރައީސް ތިމަރަފުށީ ދާއިރާގެ މެންބަރު އަބްދުﷲ ރިޔާޒް "މިހާރު" އަށް ވިދާޅުވި ގޮތުގައި އިންޑިޔާ އައުޓްއަކީ ސީދާ ޔާމީންގެ އިނީޝިއޭޓިވްއެއް ކަމަށް އެމަނިކުފާނު އަމިއްލަފުޅަށް ވިދާޅުވެ އެވެ. އެހެންކަމުން އެއީ ކުރިޔަށް އޮތް ތަނުގައި އެމަނިކުފާނުގެ ގިނަ ޝަރީއަތްތަކެއް އޮތުމުން ސަރުކާރަށް ޕްރެޝަރު ކުރަން ކުރައްވާ ކަމެއް ކަމަށް ރިޔާޒް ވިދާޅުވި އެވެ.

"އަޅުގަނޑަށް ގަބޫލު ކުރެވެނީ މިއީ ވައްކަމުގެ ގިނަ މައްސަލަތަކެއް އަދި ޝަރީއަތްތަކެއް ކުރިއަށް އޮތީމަ ސަރުކާރަށް ޕްރެޝާ ކުރުމުގެ ނިޔަތުގައި ކުރާ ކަމެއްގެ ގޮތުގައި. އިތުރު ކަމެއް މިއަކު ނެތް،" އޭނާ ވިދާޅުވި އެވެ.

އިންޑިއާ، ޗައިނާ، އެމެރިކާ، ރަޝިޔާ ނުވަތަ ކޮންމެ ގައުމެއް ވިޔަސް އަބަދުވެސް ބޭނުން ވާނީ ދުނިޔޭގައި އެ ގައުމެއްގެ އޮންނަ ސަރަހައްދުގައި ނުފޫޒާއި ބާރު ގަދަކުރުމަށެވެ. އެ ނުފޫޒުގެ ދަށަށް ގައުމެއް ވަނުމަކީ އެ އިރެއްގައި ވެރިކަމުގައި ހުންނަ މީހާގެ މައްސަލައެއް ކަމަށާއި ވަކި ގައުމެއް ނުބައި ނުކުރެވޭނެ ކަމަށް ރިޔާޒް ވިދާޅުވި އެވެ.

"މައްސަލައަކީ އެހެން ގައުމުތަކެއް ނޫން. މި ގައުމު ހިންގަން ތިބި މީހުން. އެ މީހުންގެ ނާގާބިލް ކަން. މި ސަރުކާރުން އިންޑިއާ އަށް ބަރޯސާވޭ. ޔާމީން ބަރޯސާވީ ޗައިނާ އަށް. ހަމަ އެއްތާކު މި ޖެހެނީ." ރިޔާޒް ވިދާޅުވި އެވެ.

ޔާމީން ވެރިކަމުގައި ހުންނެވިއިރު ވެސް އިންޑިއާ އާއެކު އެއްބަސްވުންތަކުގައި ސޮއި ކުރެއްވި ކަމަށް ރިޔާޒް ވިދާޅުވި އެވެ. އަދި އޭރު ވެސް އިންޑިއާގެ ސިފައިން ރާއްޖޭގައި ތިއްބެވެ. ހެލިކޮޕްޓަރުތައް ވެސް އޮޕަރޭޓް ކުރި އެވެ. އެކަމަކު އޭރު "އިންޑިއާ އައުޓް ކުރަން ނޫޅުނީ ކީއްވެތޯ" އޭނާ ސުވާލު އުފެއްދެވި އެވެ.

އެ ސުވާލަށް ޖަވާބު ދެއްވަމުން ޔާމީން ސަރުކާރުގެ ޑިފެންސް މިނިސްޓަރު ކަން ކުރެއްވި އަދި މިހާރު މަޑުއްވަރީ ދާއިރާގެ މެންބަރު އާދަމް ޝަރީފް އުމަރު "މިހާރު" އަށް ވިދާޅުވި ގޮތުގައި ޔާމީން ވެރިކަމުގައި ފުރަތަމަ ދުވަހުން ފެށިގެން އިންޑިއާ ސިފައިން ތިބުމުގެ ކަންބޮޑުވުން އޮތެވެ.

އިންޑިޔާ ސިފައިން ރާއްޖެ އައީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ވެރިކަމުގައި ގެނައި ފުރަތަމަ ހެލިކޮޕްޓަރާ އެކު އެވެ. އަދި ދެވަނަ ހެލިކޮޕްޓަރު ގެނައީ ޑިފެންސް މިނިސްޓަރުގެ މަގާމުގައި މިހާރުގެ ދަނގެތީ ދާއިރާގެ މެންބަރު ކާނަލް މުހައްމަދު ނާޒިމް އިސްވެ ހުންނަވައިގެން ކަމަށް އާދަމް ޝަރީފް ވިދާޅުވި އެވެ.

"ދެވަނަ ހެލިކޮޕްޓަރު ނެގިއިރު ވެސް އަޅުގަނޑުމެން ހަމަ ދަންނަވައިފައި އޮންނާނީ ބޭނުންވަނީ ޑޯނިއާ ފްލައިޓެކޭ ހެލިކޮޕްޓަރުތައް ގެންގޮސްފައި މިގޮތަށް ހަމަޖައްސައިދޭން،" އާދަމް ޝަރީފް ވިދާޅުވި އެވެ.

އާދަމް ޝަރީފް ވިދާޅުވި ގޮތުގައި އަސްކަރީ ބަޔަކު ތިބި ނަމަވެސް އަވަށްޓެރި ގައުމަކަށް ވާތީ އެ މީހުން ބޭރު ކުރުމަށް ޑިޕްލޮމެޓިކް ހަމަތަކުގެ މަތިން އެތައް ފަހަރަކު ގިނަ މަސައްކަތްތަކެއް ކުރީ ސަރުކާރުން ކުރި އެވެ. ގިނަ މަޝްވަރާތަކަށް ފަހު ވެސް އެ މީހުން ފައިބަން ދެކޮޅު ހެދުމުން އިންޑިއާ ސިފައިންގެ ވިސާ ވެސް އާ ނުކުރަން ނިންމި ކަމަށާއި އޭގެ ފަހުން އެ މީހުން ތިބީ ވެސް ގަވައިދާ ހިލާފަށް ކަމަށް އާދަމް ޝަރީފް ވިދާޅުވި އެވެ.

އިންޑިއާ އަކީ އަވަށްޓެރި ގައުމަކަށް ވާތީ ޑިޕްލޮމެޓިކް އުސޫލުން އެކަން ކުރެވޭތޯ ވަރަށް މަސައްކަތް ކުރެއްވި ކަމަށް އޭނާ ވިދާޅުވި އެވެ. އެގޮތަށް އެކަން ނުވުމުން އިންޑިއާ ސިފައިންގެ ވިސާ ކަނޑާލި އެވެ. އަދި އެ މީހުން ތިބީ ވެސް ގަވައިދާ ހިލާފަށެވެ. ފުރައިގެން ދާން ޖެހޭ ކަމަށް ބުނެ ސީދާ ސިޓީ ވެސް ފޮނުވި އެވެ. އެވަރުން ވެސް ނުފޭބި ކަމަށް އާދަމް ޝަރީފް ވިދާޅުވި އެވެ.

"އަޅުގަނޑު ގަބޫލު ކުރަނީ ޑިޕްލޮމެޓިކް އުސޫލުން ބަލައިފި ކަމަށް ވެއްޖިއްޔާ ގައުމަކުން އަނެއް ގައުމަކަށް އެންގޭނެ އެންމެ ހަރުދަނާ އުސޫލެއްގެ މަތިން ވާނީ އިންޑިއާ ސިފައިން ފައިބަން އަންގާފައި،" އާދަމް ޝަރީފް ވިދާޅުވި އެވެ.

ދެން އޮތީ ގަދަކަމުން އިންޑިއާ ސިފައިން ބޭލުވުން ކަމަށް އޭނާ ވިދާޅުވި އެވެ. އޭގެ ކުރިން އިންޑިއާ އާއެކު ގިނަ މަޝްވަރާތަކާއި ޑައިލޮގްތައް ބާއްވަން ޖެހޭ ކަމަށް އޭނާ ވިދާޅުވި އެވެ. އަދި ދެވަނަ ދައުރެއް ޔާމީނަށް ލިބިވަޑައިގަތް ނަމަ އިންޑިއާ ސިފައިން ރާއްޖޭގައި ނުތިބެވޭނެ އުސޫލުތައް ހަމަޖައްސަވާ އެކަން ކުރެއްވީސް ކަމަށް އާދަމް ޝަރީފް ވިދާޅުވި އެވެ.

ނަމަވެސް ސަރުކާރާއި އެމްޑީޕީން މި މައްސަލަ ދެކެނީ އެހެނެއް ނޫނެވެ. މާފަންނު މެދު ދާއިރާގެ އެމްޑީޕީގެ މެމްބަރު އިބްރާހިމް ރަޝީދު (ބޮންޑޭ) "މިހާރު" އަށް ވިދާޅުވި ގޮތުގައި ރާޑަރުތައް އޮން ކުރުމަކީ އިންޑިއާ ސިފައިން ބޭތިއްބުމެއް ނޫނެވެ. އަދި އިންޑިއާ ކަނޑު ބެލެހެއްޓުމަކީ ވެސް އިންޑިއާ ސިފައިން ތިބުމެއް ނޫނެވެ. ސިފައިން ތިބުމަކީ ހަތިޔާރު ހިފައިގެން ތިބުން ކަމަށާއި އެގޮތަށް ތިބި އެކަކު ވެސް ނުފެންނަ ކަމަށް އޭނާ ވިދާޅުވި އެވެ.

"މިތަނުން ނުފެނޭ އިންޑިޔާގެ އަސްކަރީ ބޭސްތައް ހަދައިގެން ހަތިޔާރު އެޅި ސިފައިން ތިބޭ ތަނެއް."

އިންޑިއާ އާ ގާތް ގުޅުމެއް ބޭއްވުމަކީ ޔުނައިޓަޑް ނޭޝަން ޑްރަގް އެންޑް ކްރައިމްގައި މަސައްކަތް ކުރާ ގައުމުން ގުޅިގެން ކުރާ މަސައްކަތެއް ކަމަށް ބޮންޑޭ ވިދާޅުވި އެވެ. އަދި ކަނޑު ބަލަހައްޓަން އިންޑިއާ އިން އެހީވުމަކީ ސަލާމަތާއި ރައްކާތެރި ކަމަށް ބޮޑު ކުރިއެރުމެއް ލިބޭ ކަމެއް ކަމަށް އޭނާ ވިދާޅުވި އެވެ.

"އިންޑިއާ މި ސަރަހައްދު ބެލުމަށްޓަކައި މަސައްކަތް ކުރުމަކީ ލިބޭ ބޮޑު އެހީތެރިކަމެއް. އިންޑިއާ ކަނޑުގައި ޑްރަގް ވެއްދުމަށް މަސައްކަތް ކުރޭ. އިންޑިއާ އައުޓް ގޮވުމުގެ ބޭނުމަކީ އެ ފަރާތްތަކާ ބައިވެރިވެގެން ވެރިކަން ވައްޓާލުން،" ބޮންޑޭ ވިދާޅުވި އެވެ.

ރާއްޖެ އަށް އިންޑިއާގެ ޑްރަގް އިންޓެލިޖަންސް ލިބުން ހުއްޓި، ކަނޑުގެ ސަރަހައްދު ބަލަހައްޓަން އެއްވެސް އެހީތެރިކަމެއް ނުލިބި ރާޑަރުތައް ވެސް ނަގައިފި ނަމަ އޭގެ ގެއްލުން އިންޑިއާ އަށް ވާނެ ކަން ކަށަވަރެވެ. އެކަމަކު ރާއްޖެ އަށް ވެސް އޭގެ ފައިދާ އަށް ވުރެ ބޮޑީ ގެއްލުން ކަން ޔާމީނަށް ވެސް އެނގިވަޑައިގަންނަވާނެ ކަމަށް ތަޖުރިބާކާރުން ވިދާޅުވެ އވެެ.

އިންޑިއާ މިލިޓަރީ މި ގައުމުން ބޭރު ކުރިޔަސް އިންޑިއާގެ އެހީތެރިކަން ޔާމީން ކުރިން ވިދާޅުވި "ނެއިބާހުޑް ފަސްޓް - އިންޑިއާ ފަސްޓް" ޕޮލިސީއެއްގެ ދަށުން ރާއްޖެ އަށް ވަރަށް މުހިންމެވެ. ދިވެހިން ބޭނުން ވިޔަސް ނުވިޔަސް އިންޑިއާ ފަސްޓް ޕޮލިސީއަކީ މި ގައުމު ޖިއޮގްރަފީ ގޮތުން އޮތް ތަނާއި އުފެދިފައި އޮތް ގޮތުގެ ސަބަބުން މުހިންމު ޕޮލިސީއެއް ކަމަށް ޑިޕްލޮމެޓުން އިއްތިފާގުވެ އެވެ.

ނަމަވެސް ފެންނަނީ 2023 ގެ އިންތިހާބަކަށް ވާދަ ކުރައްވާ ޔާމީންގެ ސިޔާސަތު އިންޑިއާ ފަސްޓް ޕޮލިސީން އިންޑިއާ އައުޓް ޕޮލިސީއަކަށް ބަދަލުވާ ތަނެވެ. އަދި އެއީ ހަމައެކަނި ސިފައިން ތިބޭތީއެއް ވެސް ނޫނެވެ. ސިޔާސީ އެތައް ސަބަބެއް އޭގެ ފަހަތުގައި އޮތް ކަން އިދިކޮޅުގެ ވާހަކަތަކުން އެބަ އެނގެ އެވެ. މާދަމާ ދަނޑިމާރު އަޅައިގެން އިންޑިޔާ ސިފައިން ނެރުނަސް، އިންޑިއާ ނެތް ހާރިޖީ ސިޔާސަތެއް ގެންގުޅޭ ނަމަ ދެން ވާނީ ކިހިނެއް ހެއްޔެވެ؟