ވެކްސިން ފުރިހަމަ ކޮށްފައި ތިބި މީހުންނަށް ކަރަންޓީން ނުވެ ސިންގަޕޫރަށް ދެވޭގޮތް ހަދައިފި

ކޮވިޑް-19ގެ ވެކްސިންގެ ދެ ޑޯޒު ފުރިހަމަ ކޮށްފައި ތިބި މީހުންނަށް ކަރަންޓީން ނުވެ ރާއްޖޭން ސިންގަޕޫރަށް ދެވޭ ގޮތަށް ވެކްސިނޭޓެޑް ޓްރެވަލް ލޭނެއް ހަދައިފި އެވެ.

މި ޓްރެވަލް ލޭން ހަދާފައިވަނީ ރާއްޖޭގެ ޓްރާންސްޕޯޓް މިނިސްޓްރީ އާއި ފޮރިން މިނިސްޓްރީ އާއި ހެލްތު މިނިސްޓްރީ އަދި ސިންގަޕޫރުގެ ޓްރާންސްޕޯޓް މިނިސްޓްރީއާއެކު މިއަދު ކުރިއަށްގެންދިޔަ މަޝްވަރާ ބައްދަލުވުމުގަ އެވެ.

ޓްރާންސްޕޯޓް މިނިސްޓްރީން ނެރުނު އިއުލާނުގައި ބުނެފައިވާ ގޮތުގައި ދެ ގައުމުގެ ދެމެދުގައި ވެވުނު އެއްބަސްވުމުގެ ދަށުން އަންނަ ބުރާސްފަތި ދުވަހުން ފެށިގެން ވެކްސިން ފުރިހަމަ ކޮށްފައި ތިބި މީހުންނަށް އެ ގައުމަށް ދަތުރު ކުރެވޭނެ އެވެ. މިގޮތަށް ދަތުރު ކުރެވޭނީ ޓްރެވަލް ލޭނުގެ ދަށުން ހާއްސަ ކޮށްފައިވާ ފްލައިޓުތަކުންނެވެ.

ވެކްސިން ފުރިހަމަ ކޮށްފައި ތިބި މީހުން ސިންގަޕޫރަށް ދަތުރު ކުރާއިރު ބޭނުންވާނީ ވެކްސިން ފުރިހަމަ ކޮށްފައިވާ ސެޓްފިކެޓާއި ނެގެޓިވް ޕީސީއާރު ނަތީޖާ އެވެ.

ސިންގަޕޫރުގެ އާބާދީގެ ބޮޑު ބައެއް ވަނީ ވެކްސިންގެ ދެ ޑޯޒު ފުރިހަމަ ކޮށްފައެވެ. ނަމަވެސް އެ ގައުމުގައި ކޮވިޑު ފެތުރުން އަދިވެސް ކޮންޓްރޯލް ނުވާތީ ކޮވިޑާ ގުޅިގެން އަޅާފައިވާ ފިޔަވަޅުތަކަށް އަދިވެސް ލުޔެއް ނުދެ އެވެ.

ކޮވިޑުގެ އާވެރިއަންޓް، އޮމިކްރޮންއާ ގުޅިގެން ދުނިޔޭގެ ބައެއް ގައުމުތަކުން ވަރުގަދަ ފިޔަވަޅުތައް އަޅާފައިވާއިރު ސިންގަޕޫރަކީ މިދިޔަ ހަފުތާގައި އެމެރިކާއިން ނެރުނު، ކޮވިޑުގެ ނުރައްކާ އެންމެ ބޮޑު މަންޒިލްތަކުގެ ތެރޭގައި ވެސް ހިމެނޭ އެއް ގައުމެވެ.