ގައުމީ ޓީމުގެ ޒުވާން ޑިފެންޑަރު ހައިޝަމް މާޒިޔާ އަށް

ގައުމީ ޓީމުގެ ޒުވާން ޑިފެންޑަރު ހައިޝަމް ހަސަން (ބިޑި) މާޒިޔާ އަށް ސޮއިކޮށްފި އެވެ.

ރާއްޖޭގެ ޓީމުގައި އެންމެ ރަނގަޅު ކުޅުމެއް ދެއްކި ހައިޝަމް މާޒިޔާ އަށް ސޮއިކުރީ ތިން އަހަރުގެ މުއްދަތަށެވެ. މާޒިޔާއިން އިއްޔެ ވަނީ ގައުމީ ކެޕްޓަން އަކްރަމް އަބްދުލް ގަނީ ވެސް ސޮއި ކުރުވައިފަ އެވެ. ހައިޝަމް އަކީ އަންނަ ސީޒަނަށް މާޒިޔާ އަށް ސޮއިކުރުވި ތިންވަނަ ކުޅުންތެރިޔާ އެވެ. އޭނާ އާއި އަކްރަމްގެ ކުރިން މާޒިޔާއިން ވަނީ ނޭޕާލްގެ ގައުމީ ޓީމުގެ ކީޕަރު ކިރަން ޝެމޮޝޮން ސޮއިކުރުވައިފަ އެވެ.

އުފަން ރަށް. ބ. އޭދަފުށީ ޓީމުން މިނިވަން ޗެމްޕިއަންޝިޕް 2017 ގައި ވިދާލި ހައިޝަމް މިދިޔަ ތިން ސީޒަންގައި ކުޅުނީ ކްލަބު އީގަލްސް އަށެވެ. ގައުމީ ޓީމަށް އޭނާ ކުޅެން ފެށީ 2019 ގައި ކުރީގެ ކޯޗޫ ޕީޓާ ޝެގަޓްގެ ކޯޗުކަމުގެ ދަށުންނެވެ.

މިދިޔަ މަހު ބޭއްވި އޭޝިއަން ކަޕް 23 އަހަރުން ދަށުގެ ކޮލިފައިންގައި ރާއްޖޭގެ ޒުވާން ޓީމުގެ ކެޕްޓަންކަން ވެސް ކުރީ ހައިޝަމް އެވެ. ސާފް ޗެމްޕިއަންޝިޕްގައި އޭނާ ދެއްކި މޮޅު ކުޅުމުގެ ސަބަބުން ބޮޑު މަގުބޫލުކަމެއް އޭނާ އަށް ލިބުނެވެ.

ޒުވާން ގައުމީ ޓީމުން ހައިޝަމަށް ޖާގަ ލިބުނީ އޭދަފުށީ ޓީމުގެ ކުޅުންތެރިޔާ މުހައްމަދު ފާސިރު (ފާއްޓޭ) ގެ އެހީތެރިކަމާއެކުގަ އެވެ. ފާއްޓެގެ ސިލެކްޝަން އޭރު 19 އަހަރުން ދަށުގެ ގައުމީ ޓީމާ ހަވާލުވެ ހުރި ކޯޗު އިހުސާން އަބްދުލް ގަނީ (ސާންތި) އަށް ކަމުދިޔައީ އެވެ. ހައިޝަމްގެ އެންމެ ފުރަތަމަ ކޯޗަކީ، ފުރަތަމަ ޑިވިޝަންގައި އޭދަފުށީ ޒުވާނުންގެ ޖަމިއްޔާ އަށް ކުޅުނު މުހައްމަދު ޒާހިދު (ބައްޓޭ) އެވެ. އޭނާ 2017 ގައި ބުނެފައި ވަނީ ރާއްޖޭގެ ފުޓްބޯޅައިގެ އުންމީދަކަަށް ހައިޝަމް ވާނެ ކަމަށެވެ.