ވަކީލަކު ހަމަނުޖެހުމުން ނާޒިމްގެ މައްސަލަ ކުރިއަށް ނުގެންދެވުނު

ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ހަމަލާ ދިން މައްސަލައިގެ ތުހުމަތުގައި ޓެރަރިޒަމްގެ ދައުވާ ލިބޭ މުހައްމަދު ނާޒިމަށް ވަކީލަކު ހަމަނުޖެހުމުން ޝަރީއަތް ކުރިއަށް ނުގެންދެވި، ވަކީލަކު ހަމަޖައްސަން އޭނާއަށް އިތުރު ފުރުސަތެއް ދީފި އެވެ.

ނަޝީދަށް ހަމަލާ ދިން ދުވަހާ ޖެހިގެން އައި ދުވަހު، އެ ހަމަލާ ދިން ކަމަށް އިއުތިރާފު ވެފައިވާ އަދުހަމް އަހުމަދު ރަޝީދު ގޮވައިގެން ހުޅުމާލެ އަށް ދިޔަ އއ. މާޅޮހު އަސަރީގޭ ނާޒިމްގެ މައްޗަށް އެ ހަމަލާގެ ކުރިން ވެސް އޮތީ ޓެރަރިޒަމްގެ އެހެން ދައުވާއެއް ކޮށްފަ އެވެ. އެއީ ޓެރަރިސްޓު ޖަމާއަތަކަށް ތާއީދުކުރާކަން ދޭހަވާ ފަދަ ލިޔުމެއް ގެންގުޅުމުގެ ކުށުގެ ދައުވާ އެވެ.

މިއަދު އެ މައްސަލައިގައި ބޭއްވި އޮންލައިން އަޑުއެހުމަށް ނާޒިމް ހާޒިރުވީ ވަކީލަކާ ނުލަ އެވެ. ނާޒިމް ބުނީ އޭނާ ތަހުގީގު މަރުހަލާގައި ހަމަޖެއްސި ވަކީލު އެ މައްސަލައިގައި ވެސް ވަކާލާތު ކުރާ ގޮތަށް ހަމަޖެހުނު ކަމަށެވެ. އަދި މައްސަލައާ ގުޅޭ ލިޔުންތައް ވެސް ވީ އެ ވަކީލުގެ އަތުގައި ކަމަށް ބުންޏެވެ.

އެ ވަކީލާ ގުޅުމުގެ ފުރުސަތު މާފުށީ ޖަލުގައި ހުރެގެން އަޑުއެހުމުގައި ބައިވެރިވި ނާޒިމަށް ޝަރީއަތުން ދިނެވެ. އެކަމަށް އަޑުއެހުން ފަސް ވަރަކަށް މިނެޓަށް މެދުކަނޑާ ވެސް ލި އެވެ. އެކަމަކު، ނާޒިމަށް އޭނާއަށް ގުޅޭ ގޮތެއް ނުވުމުން އެކަން ޝަރީއަތަށް އެންގި އެވެ.

ވަކީލާ ގުޅޭ ގޮތް ނުވުމުން އޭނާ އެދުނީ ވަކީލަކު ހަމަޖައްސަން 10 ދުވަހުގެ ފުރުސަތެއް ދިނުމަށެވެ. ގާޒީ ނިންމެވީ އޭނާއަށް ހަތް ދުވަހުގެ ފުރުސަތެއް ދިނުމަށެވެ. އިތުރު ފުރުސަތެއް ދިނުމަށް ދައުލަތުން ވެސް ދެކޮޅެއް ނުހަދަ އެވެ. އެހެންކަމުން އެ ފުރުސަތު ދީފައި މިއަދުގެ އަޑުއެހުން ނިންމާލީ އެވެ.

ސެޕްޓެމްބަރު 21 ގައި ބޭއްވި ބޮމުގެ ހަމަލާގެ ޝަރީއަތަށް ވެސް ނާޒިމް ހާޒިރުވީ ވަކީލަކާ ނުލަ އެވެ.

ހަމަލާގެ ތުހުމަތު ނާޒިމަށް ކުރީ އެ ހަމަލައާ ގުޅިގެން، ޓެރަރިޒަމާ ދެކޮޅަށް ފުލުހުން ހިންގި އޮޕަރޭޝަނުގެ ތެރެއިން އޭނާ ހައްޔަަރު ކުރުމަށް ފަހު އެވެ. އެ މައްސަލައިގައި އޭނާގެ މައްޗަށް ކުރީ ޓެރަރިޒަމްގެ އަމަލެއް ކުރުމަށް ރޭވުމުގެ ކުށުގެ ދައުވާ އެވެ.

ނާޒިމަކީ މީގެ ކުރިން ސީރިއާ ހަނގުރާމާގައިގައި ބައިވެރިވުމަށް އެގައުމަށް އެތެރެވާން މަސައްކަތް ކުރަނިކޮށް ހައްޔަރުކުރި މީހެކެވެ.