ޖޯން ބޮލީވުޑަށް ނެރުނު ބަޓް ކޭމްޕްގެ ފިލްމަކަށް އަލުން އޭނާ ދަނީ

މީގެ 18 އަހަރު ކުރިން ފިލްމު "ޖިސްމް" އިން ޖޯން އަބްރަހަމް ބޮލީވުޑަށް ނެރުނު ބަޓް ކޭމްޕްގެ ފިލްމަކަށް އޭނާ އަލުން ގެންނަން މަޝްވަރާތައް ފަށައިފި އެވެ.

މީޑިއާތަކުން ރިޕޯޓް ކޮށްފައިވާ ގޮތުގައި މި ފިލްމަކީ ޕްރޮޑިއުސަރު/ޑައިރެކްޓަރު މަހޭޝް ބަޓްގެ ކޮއްކޮ މުކޭޝް ބަޓްގެ ފިލްމު ކުންފުނި ވިޝޭޝް އިން ހަދަން ނިންމާފައިވާ ރޮމޭންޓިކް ތުރިލާއެކެވެ. ބޮލީވުޑް ހަންގާމާ އިން ބުނިގޮތުގައި ނަން އިއުލާން ނުކުރާ ފިލްމުގައި ޖޯންއާ އެކު ބަތަލާގެ ރޯލު ކުޅެން ހުށަހަޅާފައި ވަނީ މި މަހުގެ 25 ގައި ރިލީޒްކުރާ އޭނާގެ ފިލްމު "ސަތިއަމޭވް ޖަޔަތޭ 2" ގެ ބަތަލާ ދިވްޔާ ކޯސްލާ ކުމާރަށެވެ. އޭނާ އަކީ އިންޑިއާގެ މަޝްހޫރު މިއުޒިކް/ފިލްމު ކުންފުނި ޓީ ސީރީޒްގެ ވެރިޔާ ބުޝަން ކުމާރުގެ އަންހެނުންނެވެ.

ފިރިމީހާ ޕްރޮޑިއުސް ކޮށްފައިވާ "ސަތިއަމޭވް ޖަޔަތޭ 2" ގައި ދިވްޔާ ބަތަލާގެ ރޯލު ކުޅެފައި މި ވަނީ ފިލްމެއްގެ ލީޑް ނުކުޅޭތާ ވަރަށް ގިނަ ދުވަސްތަކެއް ފަހުންނެވެ.

އޭނަގެ ފުރަތަމަ އަދި އެންމެ ފަހުން ކުޅުނު ބޮލީވުޑްގެ ބޮޑު ފިލްމަކީ 2004 ގެ "އަބް ތުމާރޭ ހަވާލޭ ވަތަން ސާތިއޯ" އެވެ. އެ ފިލްމުގެ ފަހުން އެކްޓިންއާ ވަރަށް ބޮޑަށް ދުރުވުމަށްފަހު ދިވްޔާ ފަހުން ފަހުން އައިސް އުޅުނީ ޑައިރެކްޝަންގަ އެވެ.

އޭނާ މިހާތަނަށް ދެ ފިލްމު ހަދާފައިވެ އެވެ. އެއީ 2016 ގެ "ސަނަމް ރޭ" އާއި 2014 ގެ "ޔާރިޔާން" އެވެ.

ބަޓްގެ ކޭމްޕްގެ އާ ފިލްމަކަށް ޖޯން އާއި ދިވްޔާ ގެންނަން އުޅޭ ވާހަކައާ ބެހޭ ގޮތުން މުކޭޝް ބުނީ މަޝްވަރާތައް ކުރިއަށްދާ ކަމަށާއި ކާސްޓުން އަދި ފައިނަލް ނުކުރާ ކަމަށެވެ.

"ސްކްރިޕްޓްގެ ފައިނަލް ޑްރާފްޓް ވެސް އަދި އެއްކޮށް ނިންމައެއް ނުލެވޭ. އެކަމަކު ކާސްޓްގެ ވާހަކަ އެބަ ދެކެވޭ. ސްކްރިޕްޓް ފައިނަލްވުމާ އެކު ފިލްމު އިއުލާން ކުރާނަން." އާޝިގީ އާއި ރާޒް އަދި މާޑާ ފްރެންޗައިޒް ފަދަ ކާމިޔާބު ފިލްމުތައް ގެނެސްދިން މުކޭޝް ބުންޏެވެ.

ކުރީގެ ލޯބިވެރިޔާ ބިޕާޝާ ބާސޫއާ އެކު ކުޅުނު 2003 ގެ "ޖިސްމް" އަށް ފަހު، ޖޯން، ބަޓްގެ ކޭމްޕްގެ "ސާޔާ" އާއި "ޕާޕް" ވެސް ކުޅުނެވެ.