ޕޯޗުގަލްގައި ރަސްމީ ނޫން ގަޑިތަކުގައި މުވައްޒަފުން ލައްވައި މަސައްކަތް ކުރުވުން މަނާކޮށްފި

މަސައްކަތްތަކާ ގުޅުން ހުރި ކަންކަން ރަސްމީ ގަޑި ނޫން އެހެން ގަޑިތަކުގައި މުވައްޒަފުން ލައްވައި ކުރުވުން ޕޯޗްގަލްގައި ގާނޫނަކުން މަނާކޮށްފި އެވެ.

އެ ގާނޫނަށް މިހާރު އަމަލު ކުރަން ފަށާފައިވާ އިރު ކުންފުނިތަކުގައި މަސައްކަތްކުރާ މުވައްޒަފުންނަށް އެ މީހުންގެ ރަސްމީ ގަޑި ނޫންތަކުގައި ވެރިން މަސައްކަތްތައް ހަވާލުކުރަން މެސެޖުންނާއި އީމެއިލުން ވެސް މުއާމަލާތް ކުރުމަކީ މަނާ ކަމެކެވެ. އަދި 10 ގިނަ މުވައްޒަފުން ތިބޭ ހުރިހާ ކުންފުންޏަކަށް މި ގާނޫނު ހިނގާނެ އެވެ. އަދި އެއާ ހިލާފުވާ ނަމަ ޖޫރިމަނާ ކުރާނެ އެވެ.

ގާނޫނުން މުވައްޒަފުންނަށް މިފަދަ ލުއެއް ހޯދައި ދީފައި މި ވަނީ ކޮވިޑާ ހެދި މިދިޔަ އަހަރުން ފެށިގެން ވަރަށް ގިނަ ކުންފުނިތަކުގެ މަސައްކަތުގެ ވައްޓަފާޅި އަށް ގެންނަން ޖެހުނު ބަދަލާ އެކު ވަރަށް ގިނަ ބަޔަކު މިހާރު ގޭގައި ތިބެގެން މަސައްކަތް ކުރާތީ އެވެ. އަދި މިއީ ރަސްމީ މަސައްކަތްތަކާއި މީހާގެ ޒާތީ އާންމު ދިރިއުޅުން ބެލެންސް ކުރަން ވެސް ބާރު އެޅުމުގެ ގޮތުން ގެނައި ބަދަލެކެވެ.

ޕޯޗްގަލް އިން އަމަލުކުރަން ފެށި އާ ގާނޫނު ބުނާގޮތުން އުމުރުން 8 އަހަރުން ދަށުގެ ކުދިންނަށް ތިބޭ މުވައްޒަފުންނަށް އިތުރު ހުއްދައެއް ހޯދުމަކާ ނުލައިއ ގޭގައި މަސައްކަތް ކުރުމުގެ ފުރުސަތު އޮންނާނެ އެވެ. އަދި އެ މީހަކު ކުރަން ޖެހޭ މަސައްކަތަކަށް ގޭގެ ކަރަންޓާއި އިންޓަނެޓް ފަދަ ވަސިލަތްތައް ބޭނުންކުރާ ނަމަ އެކަމަށް މުވައްޒަފުންނަށް އެލަވަންސް ވެސް ދޭން ޖެހޭނެ އެވެ.

މަސައްކަތުގެ ރަސްމީ ގަޑި ފިޔަވައި އެހެން ގަޑިތަކުގައި މަސައްކަތް ހަވާލު ކުރުން ގާނޫނު މަނާކޮށްފައި ވިޔަސް، ރަސްމީ ގަޑީގެ ބޭރުން ވެސް، އެއްވެސް ގޮތަކަށް ވެރިންނަށް މުވައްޒަފުންނާ މުއާމަލާތް ނުކުރެވޭ ގޮތަށް ފޯނު ނިއްވާލައިގެން އުޅުމުގެ ފުރުސަތު ގާނޫނުން ތަނެއް ނުދެ އެވެ.

ޕޯޗްގަލްގެ ލޭބާ އެންޑް ސޯޝަލް ސެކިއުރިޓީ މިނިސްޓަރު އަނާ މެންޑޭޒް ވިދާޅުވި ގޮތުގައި މިހާރު އެ މީހަކު އެ ވަގުތަކު ހުރި ތަނެއްގައި ހުރެގެން މަސައްކަތް ކުރުމުގެ ޓްރެންޑާ އެކު "ޓެލެވޯކަކީ ވަރަށް ބޮޑު ބަދަލަކަށް ވާނެ" އެވެ. އެކަމަކު މިކަން ރެގިއުލޭޓް ކުރެވޭނެ ހަރުދަނާ ނިޒާމުތަކެއް ވެސް ވަރަށް މުހިންމު ކަމަށް ވިދާޅުވި އެވެ.

"އަހަރެމެން ބޭނުންވޭ ޑިޖިޓަލް މި ޒަމާނުގައި ޕޯޗްގަލްް އަކީ މަސައްކަތްތެރިންގެ ހައްގުތައް ވަރަށް ފުރިހަމަ އަށް ރައްކާތެރި ކޮށްދޭ ގައުމަކަށް ވާން،" މިނިސްޓަރު ވިދާޅުވި އެވެ. "މީގެ ސަބަބުން ޕޯޗްގަލްގައި މަސައްކަތް ކުރަން ޝައުގުވެރިވާ ބިދޭސީން ވެސް އިތުރުވެގެން ދާނެ ކަމަށް ގަބޫލުކުރެވޭ."

ޕޯޗްގަލަކީ މިހާރު ވެސް ވަގުތީ ރެޒިޑެންޓް ވިސާ ދޫކުރާ ގައުމެކެވެ.