ހަންގޭރީގެ ސަރުކާރުން ރާއްޖެ އަށް 60 ސްކޮލާޝިޕް ދެނީ

ހަންގޭރީ ސަރުކާރުން ހަތަރު އަހަރުގެ ތެރޭގައި ރާއްޖެ އަށް 60 ސްކޮލާޝިޕް ދިނުމަށް ހަޔާ އެޑިއުކޭޝަން މިނިސްޓްރީއާ އެކު މިއަދު އެއްބަސްވުމުގައި ސޮއިކޮށްފި އެވެ.

މި އެމްއޯޔޫގެ ބޭނުމަކީ ދެ ގައުމުގެ ދެމެދުގައި އޮތް އެކުވެރިކަމުގެ ގުޅުން ބަދަހިކޮށް، މަތީ ތައުލީމާ ބެހޭ ކަންކަމުގައި ގުޅިގެން މަސައްކަތް ކުރުމާއި ތައުލީމީ މުޖުތަމައެއް ބިނާކުރުމަށް މަސައްކަތް ކުރުން ކަމަށް ހަޔާ އެޑިއުކޭޝަން މިނިސްޓްރީން ބުންޏެވެ،

އެ މިނިސްޓްރީން ބުނިގޮތުގައި، މި އެމްއޯޔޫގެ ދަށުން ހަތަރު އަހަރު ވަންދެން ކޮންމެ އަހަރަކު ވެސް 15 ސްކޮލާޝިޕް ރާއްޖެ އަށް ލިބޭނެ އެވެ. މި އެއްބަސްވުމުގެ ދަށުން، ފުރަތަމަ ޑިގްރީ އާއި މާސްޓަސް، ޕީއެޗްޑީ އަދި ކުރު މުއްދަތުގެ ތަމްރީނު ހެދުމުގެ ފުރުސަތު ލިބޭނެ އެވެ.

މިނިސްޓްރީން ބުނީ މި އަހަރު ލިބޭނީ ފުރަތަމަ ޑިގްރީގެ ހަ ފުރުސަތަކާއި މާސްޓާސް ޑިގްރީގެ ހަތް ފުރުސަތެއްގެ އިތުރުން ޕީއެޗްޑީގެ ދެ ފުރުސަތެއް ކަމަށެވެ. އޭގެ ތެރޭގައި އެގްރިކަލްޗާ ސައިންސް، އާޓްސް އެންޑް ހިއުމެނިޓީޒް، ސޯޝަލް ސައިންސް އަދި ޓީޗިން ޓްރެއިނިން އާއި ސްޕޯޓް ސައިންސް އަދި ނޭޗަރަލް ސައިންސް ފަދަ ދާއިރާތަކުން ކޯސްތައް ހިމެނެ އެވެ.

ހަޔާ އެޑިއުކޭޝަން މިނިސްޓްރީން ބުނިގޮތުގައި މި ސްކޮލާޝިޕްތަކަށް ހޮވޭ ދަރިވަރުންގެ ދެކޮޅު ޓިކެޓް ފިޔަވައި ހުރިހާ ހަރަދެއް ހަމަޖައްސާނީ ހަންގޭރީގެ ސަރުކާރުންނެވެ. އެ ދަރިވަރުންނަށް ދެކޮޅު ޓިކެޓް ދޭނީ ދިވެހި ސަރުކާރުންނެވެ.

މި އަހަރަށް ކަނޑައަޅާފައިވާ ސްކޮލާޝިޕްތަކަށް މި މަހުގެ ފަހުކޮޅު ހުޅުވާލާނެ އެވެ.