އަރިއަންގެ ހައްޔަރުން މަންމަ ގޯރީގެ ހިތްހަލާކު

މަސްތުވާތަކެތީގެ މައްސަލައެއްގައި ޝާހްރުކް ޚާންގެ ދަރިފުޅު އަރިއަން ހައްޔަރު ކުރުމުން އޭނާގެ މަންމަ ގޯރީ ޚާން ހިތް ހަލާކުވެފައިވާ ކަމަށް ރިޕޯޓްތައް ބުނެފި އެވެ.

އޭނާގެ ގާތް ބައެއް މީހުންނާ ހަވާލާދީ ބައެއް މީޑިއާތަކުން ބުނީ ދަރިފުޅު ހައްޔަރުކުރި ފަހުން ލިބުނު ހިތާމައިގެ ސަބަބުން ގޯރީ މިހާރު އެއްގޮތަކަށް ވެސް ފޮނި އެއްޗެއް ނުކާ ކަމަަށެވެ. އަދި އޭނާ ހުރީ ދަރިފުޅު މިނިވަންގެ ގެއަށް އެނބުރި އައުމުން ނޫނީ ފޮނި އެއްޗެހި ހަރާންކޮށްގެން ކަމަށް ވެސް ބުންޏެވެ. މި ސަބަބާ ހުރެ މި މަހުގެ 8 ގައި ގޯރީގެ 51 ވަނަ އުފަން ދުވަސް ފާހަގަކުރުން ކެންސަލްކޮށް، ކުރިއަށް އޮތް ދުވަސްތަކުގައި އާއިލާ އިން އެއްވެސް ސެލެބްރޭޝަނެއް ނުބާއްވަން ވެސް ވަނީ ނިންމައިފަ އެވެ.

"މިހާރު ގޯރީ ރަނގަޅަށް ނުއެއްކައި. އަބަދު ކަމަކީ ރުއިން. މީހަކާ ވާހަކައެއް ވެސް ނުދައްކާ. ގިނަ ވަގުތު އޭނަ ހޭދަކުރަނީ ދަރިފުޅު ސަލާމަތްވޭތޯ ދުއާ ކުރުމުގައި." ބޮލީވުޑް ހަންގާމާ އަށް ވާހަކަ ދެއްކި ގޯރީގެ އެކުވެރިޔަކު ބުނެފައިވެ އެވެ.

އޭނާ ބުނީ ގޮތުގައި އަރިޔަން ހައްޔަރުކުރި ހިސާބުން ވަރަށް ގިނަ ރައްޓެހިންނާއި އާއިލާގެ އެކި މީސްމީހުން ގޯރީ އަށް ހިތްވަރުދެމުން ދިޔަ ނަމަވެސް އޭނާ މިހާރު ބޮޑަށް އުޅެނީ އެކަހެރިވެ، މޮޅިވެރިކަމުގެ ސާލު ލައިގެންނެވެ.

އަރިޔަންް ހައްޔަރުކުރި ދަނޑިވަޅާ ދިމާކޮށް ގޯރީ އާއި ޝާހްރުކްގެ ގެ، މަންނަތަށް ވަރަށް ގިނަ ރައްޓެހިން ޒިޔާރަތްކޮށް ދެމަފިރިންނަށް ހިތްވަރު ދީފައިވެ އެވެ. އެކަމަކު ފަހުން ޝާހްރުކް ވަނީ ގެއަށް އެހާ ގިނައިން މީހުން ޒިޔާރަތް ނުކުރަން އެދިފަ އެވެ. އަދި ފޭނުން ވެސް އޭނާ އަށް ހިތްވަރުދޭން ގެ ކައިރި އަށް ޖަމާނުވުމަށް އެދިފައިވެ އެވެ.

ދޮށީ ދަރިފުޅުގެ ހައްޔަރާ އެކު ޝާހްރުކް ކުރަމުން ދިޔަ ފިލްމީ މަސައްކަތްތައް ވެސް ވަނީ މެދުކަނޑާލައިފަ އެވެ. ގިނަ ދުވަސްތަކެއް ވަންދެން ބަންދުގައި ބެހެއްޓުމަށްފަހު ކޯޓުން އިއްޔެ ވަނީ އަރިއަން ކަފާލާތުގެ ދަށުން ދޫކޮށްލަން ނިންމައިފަ އެވެ.

މި އަހަރުގެ މެއި މަހުގެ ތެރޭގައި އެމެރިކާގެ ޔުނިވަސިޓީއަކުން ގްރެޖްއޭޓްވި އަރިޔަން، 23، ނާކޮޓިކްސް ކޮންޓްރޯލް ބިއުރޯ (އެންސީބީ) އިން ހައްޔަރުކުރީ މަސްތުވާތަކެއްޗާ އެކު ކްރޫޒް ލައިނާއެއްގައި ޕާޓީކުރާ ކަމަށް ބުނެ ލިބުނު ރިޕޯޓަކާ ގުޅިގެން މި މަހުގެ 2 ވަނަ ދުވަހުގެ ރޭގަ އެވެ. އޭނާއާ އެކު އިތުރު 7 މީހަކު ވެސް ހައްޔަރުކުރި އެވެ. އަދި މި މައްސަލަގަނޑުގެ ތެރެއިން މިހާރު ވަނީ ޒުވާން ބަތަލާ އަނަންޔާ ޕާންޑޭއާ ވެސް ޑްރަގާ ގުޅުން އޮތް ކަމަށް ބެލެވި ތަހުގީގު ފަށައިފަ އެވެ.