ހުރަވަޅި ރިސޯޓް ހުޅުވައިފި، މި މަހު 50 ޕަސެންޓް ޑިސްކައުންޓް ދެނީ

ކަނޑުއަޑީގެ ދުނިޔޭގެ އެންމެ ބޮޑު ރެސްޓޯރަންޓް ގާއިމްކޮށްފައިވާ ޅ. ހުރަވަޅި އައިލެންޑް ރިސޯޓް މިއަދު ހުޅުވައިފި އެވެ.

ޗަމްޕާ ލާސް ހޮލްޑިން އިން ތަރައްގީކުރި ހުރަވަޅި ރިސޯޓުން ބުނި ގޮތުގައި އެ ރިސޯޓް ހުޅުވުން ފާހަގަކުރުމަށް، 50 ޕަސެންޓުގެ ބޮޑު ޑިސްކައުންޓެއް ލިބޭ އޮފާއެއް ވަނީ ތައާރަފްކޮށްފަ އެވެ. އެ ގޮތުން، މި މަހުގެ ތެރޭގައި މަދުވެގެން ހަ ރޭ އެ ރިސޯޓުގައި ތިބޭ ފަރާތްތަކަށް މި ޕްރޮމޯޝަންގެ ދަށުން ދޭ ޑިސްކައުންޓް ލިބޭނެ ކަމަށް އެ ތަނުން ބުންޏެވެ.

ސީޕްލޭންގައި މާލޭން ފުރައިގެން 40 މިނެޓުން ދެވޭ މި ރިސޯޓުގައި 60 އޯޝަން ވިލާ އާއި 30 ބީޗް ވިލާ ހިމެނެ އެވެ. ކޮންމެ ކޮޓަރިއެއް ވެސް ބައްޓަންކޮށްފައިވަނީ އިރު އަރާ ނުވަތަ އިރުއޮއްސޭ މަންޒަރު ފެންނަ ގޮތަށެވެ.

މި ރިސޯޓަކީ ތިމާވެށްޓާ ރައްޓެހި ވަސީލަތްތައް ބޭނުންކުރާ އެންމެ މަތީ ފެންވަރުގެ ރިސޯޓެކެވެ. އެ ގޮތުުން، އެކި ކަންކަމުން އުކާލާ ފެނުގައި އެކުލެވޭ ހަކަތަ ބޭނުންކޮށްގެން ފިނި ފެން ހޫނު ފެނަަށް ބަދަލުކުރުމާއި ސޯލާ ޕެނަލް ބޭނުންކުރުމާއި އެ ރަށުގައި ހުންނަ ޕްލާންޓަކުން ފެންފުޅި ބަންދުކުރުމުގެ އިތުރަށް، އެ ރަށުގައި މެރިން ބަޔޮލޮޖިސްޓެއް ވެސް ހުރެ އެވެ.

ހުރަވަޅި ރިސޯޓުގެ އެންމެ ހާއްސަ ކަމަކީ ކަނޑުއަޑީގެ ދުނިޔޭގެ އެންމެ ބޮޑު ރެސްޓޯރަންޓް މި ރަށުގައި ގާއިމްކޮށްފައިވުމެވެ. "5.8 އަންޑަސީ"ގެ ނަން ދީފައިވާ މި ރެސްޓޯރަންޓުގައި މުޅިން ވެސް ހުންނަނީ ދެ މީހުންނަށް ތިބެވޭ ގޮތަށް ގޮނޑި އަތުރާފައިވާ މޭޒުތަކެވެ. އެއީ، ރާއްޖޭގެ ކަނޑުއަޑީގެ މުއްސަނދިކަމާއި ރީތިކަން ބަލަމުން، ވީހާ ވެސް އެކަހެރި މާހައުލެއްގައި މީރު ކެއުމަކަށް އިންސާފް ކުރުމުގެ ފުރުސަތު ދިނުމަށެވެ.

ހުރަވަޅި ރިސޯޓް ހުޅުވި އިރު، މި އަހަރުގެ ތެރޭގައި ރާއްޖޭގައި ގިނަ ރިސޯޓުތަކެއް ހުޅުވާފައިވެ އެވެ. އޭގެ ތެރޭގައި، މި ފަހުން ހުޅުވި ސޮނޭވާގެ އާ ރިސޯޓް، ސޮނޭވާ ޖާނީ އާއި ސެއިންޓް ރެޖިސް ވޮށްމުލި ރިސޯޓް ހިމެނެ އެވެ. އަދި މި މަހުގެ ތެރޭގައި ވެސް ބައެއް ރިސޯޓުތައް ހުޅުވަން އަންނަނީ ތައްޔާރުވަމުންނެވެ.

މީގެ އިތުރުން، އަންނަ އަހަރު 20 އާ ރިސޯޓް ހުޅުވާނެ ކަމަށް ސަރުކާރުން ބުނެފައިވެ އެވެ.