ޖައްވީ ސްޓޭޝަން މިހާރު ދަނީ ހަލާކުވަމުން

މި ބިމުން ފެށިގެން 437 ކިލޯމީޓަރު އުހުގައި ޖައްވުގެ ތެރޭގައި މި ބިމުގެ ވަށައިގެން ބުރުޖަހަމުން އަންނަ، ބައިނަލްއަގުވާމީ ޖައްވީ ސްޓޭޝަން (އައިއެސްއެސް) މިހާރު އަންނަނީ ވަރަށް ބޮޑަށް ހަލާކުވަމުން ކަމަށް، ރަޝިޔާގެ ކަމާ ބެހޭ އޮފިޝަލުން ވިދާޅުވެއްޖެ އެވެ.

ރަޝިޔާގެ ޖައްވީ އިދާރާގެ އޮފިޝަލަކު އިއްޔެ ވިދާޅުވި ގޮތުގައި، ޖައްވީ ސްޓޭޝަންގައި ހިމެނޭ ރަޝިޔާގެ ބައިގެ ވަރަށް ގިނަ އާލާތްތައް މިހާރު ހުރީ ދުވަސްވެ މުސްކުޅިވެފަ އެވެ. އަދި ވަރަށް ގިނަ ސޮފްޓްވެއާ ވެސް މިހާރު ހުރީ މުސްކުޅިވެފަ އެވެ.

ޖައްވީ ސްޓޭޝަންގެ ބައިތައް އުފައްދާ ރަޝިޔާގެ ކުންފުނި އެނާޖިއާގެ ޗީފް އިންޖިނޭރު ލަޑިމިއާ ސޮލްވޮޔޯވް ވިދާޅުވި ގޮތުގައި ދުވަސްވެފައިވާ ސާމާނުތަކާއި ސޮފްޓުވެއާތައް، އާ ތަކެއްޗަށް ބަދަލުނުކުރާ ނަމަ، އަލުން މަރާމާތުކޮށްގެން ބޭނުން ނުކުރެވޭ ވަރުގެ ގެއްލުންތަކެއް، ޖައްވީ ސްޓޭޝަނަށް ލިބިދާނެ އެވެ. ރަޝިޔާ އިން އުފައްދާފައިވާ ބައިގައި ބޭނުންކުރާ ސޮފްޓްވެއާތަކާއި އެހެން އާލާތްތަކުގެ ގާތްގަނޑަކަށް 80 ޕަސެންޓް މިހާރު ހުރީ ދުވަސްވެފައި ކަމަށް ވެސް އޭނާ ވިދާޅުވި އެވެ.

އޭގެ އިތުރުން ޖައްވީ ސްޓޭޝަންގެ ބައެއް ތަންތަނުގައި ކުދިކުދި ރެނދު ލާފައި އެބަހުއްޓެވެ. ދުވަސްވަމުން ދާ ވަރަކަށް އެ ރެނދުތައް ބޮޑެތިވެ، މުޅި ޖައްވީ ސްޓޭޝަނަށް ބޮޑެތި ގެއްލުންތަކެއް ލިބުމުގެ ފުރުސަތު އެބަ އޮތެވެ. ޖައްވީ ސްޓޭޝަންގައި ހިމެނޭ، ރަޝިޔާގެ ކޮސްމަނޯޓުން ނިދާ ބައި، ޒްވެޒްޑާ ސާވިސް މޮޑިއުލް އިން ވައި ލީކް ވުމުގެ މައްސަލަތަކެއް 2019 ވަނަ އަހަރު ވަނީ ކުރިމަތިވެފަ އެވެ.

މީގެ ކުރިން ވެސް ރަޝިޔާ އިން ވަނީ، ޖައްވީ ސްޓޭޝަންގެ ބައެއް ހާޑްވެއާތަކުގައި މައްސަލަތައް ހުރިކަމަށް ބުނެފަ އެވެ. އަދި އެކަމަށް އަވަސް ހައްލެއް ނުހޯދިއްޖެ ނަމަ، 2025 ވަނަ އަހަރުގެ ތެރޭގައި ޖައްވީ ސްޓޭޝަންގެ އެބައި ދޫކޮށްލަންޖެހިދާނެ ކަމަށް ވެސް ރަޝިޔާގެ އޮފިޝަލުން ކުރިން ވިދާޅުވެފައިވެ އެވެ.

ރަޝިޔާ، އެމެރިކާ، ޖަޕާން ކެނެޑާގެ އިތުރުން ވިލާތުގެ ބައެއް ގައުމުތައް ގުޅިގެން މަޝްރޫއެއްގެ ދަށުން، ޖައްވީ ސްޓޭޝަން އުފެއްދީ 1998 ވަނަ އަހަރުގެ ތެރޭގަ އެވެ. އޭރު ޖައްވީ ސްޓޭޝަން އުފެއްދީ 15 އަހަރު ދުވަހަށް ބޭނުންކުރެވޭނެ ކަމަށް ބަލައިގެންނެވެ. ނަމަވެސް މިހާރު ޖައްވީ ސްޓޭޝަންގެ އުމުރުން 23 އަހަރުވީ އެވެ.

ޗީފް އިންޖިނޭރު ލަޑިމިއާ ވިދާޅުވި ގޮތުގައި މިހާރު ރެނދުތަކެއް ފެންނަން ހުރީ ޖައްވީ ސްޓޭޝަންގެ ޒަރްޔާ މޮޑިއުލް އިންނެވެ. އެއީ 1998 ވަނަ އަހަރު ޖައްވަށް ގެންދިޔަ މޮޑިއުލެކެވެ. އަދި ޖައްވީ ސްޓޭޝަންގެ ބައިތަކުގެ ތެރެއިން އެންމެ ދުވަސްވީ އެއް ބައެވެ. މިހާރު އެ މޮޑިއުލް ބޭނުންކުރަނީ، ގުދަނެއްގެ ގޮތުގަ އެވެ.

ރަޝިޔާގެ ޖައްވީ އިދާރާ ރޮސްކޮސްމޮސް އިން މިދިޔަ އަހަރު ބުނި ގޮތުގައި ޖައްވީ ސްޓޭޝަނަށް މިހާރު ލިބެމުންދާ ގެއްލުންތަކަށް ބަލާއިރު، 2030 ވަނަ އަހަރަށް ފަހު، ޖައްވީ ސްޓޭޝަން ބޭނުމެއް ނުކުރެވޭނެ އެވެ. ރަޝިޔާގެ ޖައްވީ ޕްރޮގްރާމް މިދުވަސްކޮޅު މަޑުޖެހިލާފައި އޮތީ، ފައިސާގެ ދަތިކަމާ ހުރެ އެވެ. އޭގެ އިތުރުން މިދިޔަ އަހަރުތަކުގައި ޖައްވީ އިދާރާގެ ތެރޭގައި ހިނގި ކޮރަޕްޝަންގެ މައްސަލަތަކުގެ ސަބަބުން ވެސް ޖައްވީ ޕްރޮގްރާމަށް ހަރަދުކުރުމުގައި ދަތިތަކެއް ވަނީ ކުރިމަތިވެފަ އެވެ.