ސަލީމް-ޖާވިދުގެ ޑޮކިއުމަންޓަރީ އަށް ނެޓްފްލިކްސް ޝައުގުވެރިކަން ފާޅުކޮށްފި

ބޮލީވުޑްގެ ކުރީގެ ވަރުގަދަ ދެ ސްކްރީން ރައިޓަރު ކަމަށްވާ ސަލީމް-ޖާވިދުގެ ވާހަކަ ކިޔައިދޭ ޑޮކިއުމަންޓަރީ އަށް ނެޓްފްލިކްސް ޝައުގުވެރިކަން ފާޅުކޮށްފި އެވެ.

ބޮލީވުޑްގެ ޚަބަރުތައް ގެނެސްދޭ ނޫސްތަކުން ބުނި ގޮތުގައި މި ޑޮކިއުމަންޓަރީ އަކީ ޅެންވެރިއެއްގެ ގޮތުގައި މިހާރު މަސައްކަތްކުރާ ޖާވިދު އަޚްތަރުގެ އަންހެން ދަރިފުޅު ޑައިރެކްޓަރު ޒޯޔާ އަޚްތަރު އެކްޒެކެޓިވް ޕްރޮޑިއުސަރެއްގެ ގޮތުގައި ހަދަން ނިންމާފައި އެއްޗެކެވެ.

އާ ޑައިރެކްޓަރަކާ ހަވާލުކޮށްގެން ހަދާ ޑޮކިއުމަންޓްރީ ގެނެސްދޭނީ ޒޯޔާގެ ކޮއްކޮ އެކްޓަރު/ޑައިރެކްޓަރު/ޕްރޮޑިއުސަރު ފަރުހާން އަޚްތަރާއި ޕްރޮޑިއުސް ރިތޭޝް ސިދުވާނީގެ ފިލްމު ކުންފުނި އެކްސެލް އެންޓަޓައިންމަންޓްގެ ތައްގަނޑުގަ އެވެ.

ފިލްމުފެއާ އިން ބުނި ގޮތުގައި ސަލީމް-ޖާވިދުގެ ޑޮކިއުމަންޓަރީއެއް ހަދަން އުޅޭކަން އެނގުމާ އެކު، އެކަމަށް ޝައުގުވެރިކަން ފާޅުކޮށް ނެޓްފްލިކްސް އިން އަންނަނީ އޭގެ ޓީމާ އެކު މިހާރު ވަޝްވަރާތައް ކުރަމުންނެވެ. އެކަމަކު މިއާ ބެހޭ އެއްވެސް މައުލޫމާތެއް އަދި ރަސްމީކޮށް ޒޯޔާ ހާމައެއްނުކުރެ އެވެ.

ކުރިން މީޑިއާތަކުން ބުނެފައިވާ ގޮތުގައި ސަލީމް-ޖާވިދުގެ ޑޮކިއުމަންޓަރީ ގެނެސްދޭ އިރު، އެ މީހުންނާ އެކު އެކްޓަރު އަމީތާބް ބައްޗަންގެ ހާއްސަ އިންޓަވިއުތަކެއް ވެސް ހިމަނާނެ އެވެ. އަމީތާބަކީ ސަލީމް-ޖާވިދުގެ ސްކްރީންޕްލޭތަކަށް ހެދި ކާމިޔާބު ގިނަ ފިލްމުތަކެއް ކުޅުނު އެކްޓަރެކެވެ.

ސަލްމާން ޚާންގެ ބައްޕަ ސަލީމާއި ފަރުހާންގެ ބައްޕަ ޖާވިދު އެކީގައި މަސައްކަތްކުރީ 1970-1980 ގެ ތެރޭގަ އެވެ. އެގޮތުން ދެ މީހުން އެކީގައި ލިޔުނު ފިލްމުތަކުގެ ތެރޭގައި އަންދާޒު (1971)، ސީތާ އޯރް ގީތާ (1972)، ޒަންޖީރު (1973)، ދީވާރު (1975)، ޝޯލޭ (1975)، ޓުރިޝޫލް (1978)، ޑޮން (1978)، ކާލާ ޕައްތަރު (1979)، ދޯސްތާނާ (1980)، ޝަކްތީ (1982) އަދި މިސްޓަ އިންޑިއާ (1987) ފަދަ ފިލްމުތައް ހިމެނެ އެވެ.

އެކީގައި ގިނަ ފިލްމުތަކެއްގެ ސްކްރީންޕްލޭ ލިޔުމުގެ އިތުރަށް، ވަކިވަކިން ވެސް ސަލީމާއި ޖާވިދު ސްކްރީންޕްލޭ ލިޔުނެވެ.