ތައިލެންޑުގެ ބޮޑުވަޒީރު ނޫސްވެރިން ގަޔަށް ސެނިޓައިޒާ ޖަހައިފި

ބެންކޮކް (މާޗް 10) - ވަގުތުން ދައްކަމުން ދިޔަ ނޫސްވެރިންގެ ބައްދަލުވުމެއްގެ ތެރޭން ތައިލެންޑުގެ ބޮޑުވަޒީރު ޕްރަޔުތު ޗަން-އޮޗާ ޕޯޑިއަމް ދޫކުރައްވައި ވަޑައިގެން ނޫސްވެރިން ގަޔަށް ސެނިޓައިޒާ ސްޕްރޭ ކޮށްފި އެވެ.

ބެލެވޭ ގޮތުގައި ބޮޑުވަޒީރު އެކަން ކުރެއްވީ އުނދަގޫ ސުވާލުތައް ނުކުރުމުގެ ގޮތުން ނޫސްވެރިން ބިރު ދެއްކުމަށެވެ. ޕްރަޔުތު ކޯފާ އިސްކުރެއްވީ ކެބިނެޓަށް ގެންނާނެ ބޭފުޅުންނާ ގުޅޭ ގޮތުން ނޫސްވެރިން ސުވާލު ކުރަން ފެށުމުންނެވެ. މީގެ ހަތް އަހަރު ކުރިން ކުރި މުޒާހަރާތަކަށް ހިތްވަރު ދިނުމުގެ ކުށުގައި ތިން މިނިސްޓަރަކު މިދިޔަ ހަފުތާގައި ވަނީ ޖަލަށްލައިފަ އެވެ.

"ދެން ނެތްތަ އަހާނެ އެހެން ވާހަކައެއް،" ޕޯޑިއަމްގައި ހުންނަވައި ޕްރަޔުތު ވިދާޅުވި އެވެ.

އެހެން ވިދާޅުވެ، ޕޯޑިއަމް ދޫކުރައްވައި ވަޑައިގެން ސެނިޓައިޒާ ފުޅިއެއް ނަންގަވައި ނޫސްވެރިން ކައިރިން ހިންގަމުން ސެނިޓައިޒާ ސްޕްރޭ ކުރަން ފެއްޓެވި އެވެ.

އަސްކަރީ ބަޣާވާތަކަށް ފަހު 2014 ވަނަ އަހަރުން ފެށިގެން ތައިލެންޑުގެ ބޮޑުވަޒީރުކަން ކުރައްވައި ޕްރަޔުތު މީގެ ކުރިން ވެސް ވަނީ ނޫސްވެރިންނަށް ތަފާތު ގޯނާތައް ކުރައްވައިފަ އެވެ. މީގެ ކުރިން އެއް ފަހަރަކު ވަނީ ނޫސްވެރިއެއްގެ ކަންފަތުގައި ވެސް ހިތްޕަވައިފަ އެވެ. އަދި އެއް ފަހަރެއްގައި ވަނީ ބޮޑުވަޒީރުގެ އިސްކޮޅާ އެއްވަރަށް ހަދާފައިވާ ޕޯސްޓަރެއް ފިލައެއްގައި ހަރުކޮށްގެން، ގެނެސް ނޫސްވެރިންގެ ސުވާލުތަކަށް "ޖަވާބު" ދޭން ބަހައްޓައިފަ އެވެ.