ޕޯޓޯ އިން ޔުވެންޓަސް ކަޓުވާލައިފި

ޓިއުރިން (މާޗް 10) - ޔުއެފާ ޗެމްޕިއަންސް ލީގުގެ ދެ ވަނަ ބުރުގައި ރޭ ޕޯޗުގަލްގެ ޕޯޓޯ އިން އިޓަލީގެ ޗެމްޕިއަން ޔުވެންޓަސް ކަޓުވާލައިފި އެވެ.

ރޭގެ މެޗުން ޔުވެންޓަސް ވަނީ 3-2 އިން 10 ކުޅުންތެރިންނާ އެކު މެޗު ނިންމާލި ޕޯޓޯ ބަލިކޮށްފަ އެވެ. ޕޯޓޯ ދަނޑުގައި އެ ޓީމު ފުރަތަމަ ލެގުން ވަނީ 2-1 އިން މޮޅުވެފަ އެވެ. ރޭގެ މެޗުން ބަލިވި ނަމަވެސް ޕޯޓޯ އިން ކުއާޓާ ފައިނަލުގެ ޖާގަ ހޯދީ އެގްރިގޭޓް 4-4 އިން އެއްވަރުވިއިރު، ރަށުންބޭރުގައި ޖެހި ގޯލުން ކުރިހޯދައިގެންނެވެ.

ޔުވެންޓަސް ދަނޑުގައި ރޭ ކުޅުނު މެޗު ފަށައިގެން 19 ވަނަ މިނިޓްގައި ޕޯޓޯ އަށް ލީޑުނަގައިދިނީ ޕެނަލްޓީ އަކުން ސާޖިއޯ އޮލިވޭރާ އެވެ. މިއީ އޭރިއާތެރެއިން ޕޯޓޯގެ އިރާން ފޯވާޑް މަހުދީ ތަރޭމީ އަށް ޔުވެންޓަސްގެ ތުރުކީ ޑިފެންޑަރު މެރީހް ޑެމައިރަލް ކުރި ފައުލަކަށް ރެފްރީ ދިން ޕެނަލްޓީ އެކެވެ. ދެ ވަނަ ހާފްގެ ކުޅުން ފެށިގެން ހަތަރު މިނިޓް ތެރޭ އޭރިއާތެރެއިން ޔުވެންޓަސްގެ ކްރިސްޓިއާނޯ ރޮނާލްޑޯ ކޮންޓްރޯލް ކޮށްލި ބޯޅައެއް ހޯދައި ފެޑެރީކޯ ޗިއޭސާ ވަނީ ގޯލެއް ޖަހައި އެ ޓީމަށް ނަތީޖާ ހަމަހަމަކޮށްދީފަ އެވެ.

މެޗުގެ 54 ވަނަ މިނިޓްގައި ތަރޭމީ އަށް ދެއްކި ދެ ވަނަ ރީނދޫ ކާޑާ އެކު ރަތް ކާޑެއް ދެއްކި އެވެ. ޕޯޓޯގެ އެއް ކުޅުންތެރިއަކު މަދުވުމުގެ ފައިދާނަގައި ޔުވެންޓަސް އިން ވަނީ މެޗުގެ 63 ވަނަ މިނިޓްގައި ޗިއޭސާގެ ގޯލުން ލީޑުނަގައިފަ އެވެ. ޔުވެންޓަސް އަށް މެޗުގެ ފުރިހަމަ ވަގުތު ހަމަވުމުގެ ކުރިން އިތުރު ގޯލެއް ޖަހަން ރޮނާލްޑޯ ފޮނުވާލި ބޯޅައެއް ބޭރަށް ދިޔައިރު، މެޗުގެ ފަހު ވަގުތު ހުއާން ކުއަޑްރާޑޯ ފޮނުވާލި ހަމަލާ އަމާޒުވީ ގޯލުގެ ހުރަސްދަނޑިއަށެވެ.

ނަތީޖާ ނެރެން އިތުރު ވަގުތުގެ ދެ ހާފް ކުޅެން ޖެހުނުއިރު، ފުރަތަމަ ގޯލު ޖެހީ ޕޯޓޯ އިންނެވެ. މެޗުގެ 115 ވަނަ މިނިޓްގައި ޕޯޓޯގެ އޮލިވޭރާ ހިލޭ ޖެހުމަކުން ތިރިތިރިން ފޮނުވާލި ބޯޅަ ރޮނާލްޑޯގެ ފައި ދަށުން ގޮސް ގޯލަށް ވަނީ ޔުވެންޓަސްގެ ކީޕަރު ވޮޒްޝިއޭ ޝެޒްނީ އަތުގައި ޖެހިފަ އެވެ. އޭގެ ދެ މިނިޓް ފަހުން އެޑްރިއަން ރަބިއޯ ވަނީ ބޮލުން ގޯލެއް ޖަހައި ޔުވެންޓަސް އަށް އުއްމީދެއް ހޯދައިދީފަ އެވެ. އެކަމަކު އިތުރު ގޯލެއް ޖަހައި ކުއާޓާ އިން ފުރުސަތު ހޯދަން ކުރި މަސައްކަތް ޔުވެންޓަސް އަށް ކާމިޔާބެއްނުވެ މުބާރާތުން ކެޓީ އެވެ.

މިދިޔަ ސީޒަނުގެ ޗެމްޕިއަންސް ލީގުން ވެސް ޔުވެންޓަސް ކެޓީ ދެ ވަނަ ބުރުންނެވެ. އެ ފަަހަރު ފްރާންސްގެ ލިޔޯނުން ޔުވެންޓަސްގެ މައްޗަށް ކުރިހޯދީ ވެސް ރަށުންބޭރުގައި ޖެހި ގޯލުންނެވެ.

ޔުވެންޓަސްގެ ކޯޗު އަންދްރެއާ ޕިރްލޯ ބުނީ ދެ ލެގަށް ބަލާއިރު ޔުވެންޓަސް އިން ހެދި ބޮޑު ހަތަރު ގޯހެއްގެ ފައިދާ ޕޯޓޯ އިން ނެގި ކަމަށާއި އެ ކަންކަމަށް ބަލާއިރު އެ ޓީމު މުބާރާތުން ކެޓުމުން ކުރެވޭނެ ޝަކުވާއެއް ނެތް ކަމަށެވެ.

"އަހަރެމެން ސިކުނޑިން މި ނާކާމިޔާބީ ފޮހެލަން ދުވަސްތަކެއް ނަގާނެ. އެކަމަކު އަހަރެމެން ޕްރޮފެޝަނަލުންގެ ވިސްނުމުގައި ރަނގަޅު އެޓިޓިއުޑެއްގައި ހުރުން މުހިއްމު. މިއީ އަދި މާޗް. އަހަރެމެން އިޓާލިއަން ލީގު ކާމިޔާބުކުރަން ކުރާ މަސައްކަަތް ހުއްޓާލައިގެން ނުވާނެ،" ޕިރްލޯ ބުންޏެވެ.

މިއީ މިދިޔަ 17 އަހަރު ތެރޭ ޗެމްޕިއަންސް ލީގުގެ ނޮކައުޓް ބުރުގައި ފުރަތަމަ ލެގުން މޮޅުވުމަށް ފަހު ދެ ވަނަ ލެގުގައި ނަތީޖާއެއް ނެރެގެން ޕޯޓޯ އަށް ކުއާޓާ ފައިނަލުން ފުރުސަތު ލިބުނު ފުރަތަމަ ފަހަރެވެ. ޕޯޓޯ އެންމެ ފަހުން ނޮކައުޓް ބުރު މޮޅަކުން ފަށައިގެން ކުއާޓާ ފައިނަލުގައި ކުޅުނީ 2004 ވަނަ އަހަރު އެވެ. އެ ފަހަރު ހޯސޭ މޮރީނިއޯގެ ކޯޗުކަމުގައި އެ ޓީމުން ވަނީ ޗެމްޕިއަންސް ލީގު ކާމިޔާބުކޮށްފަ އެވެ.