ސިނަމާތަކަށް ފަރުހާންގެ "ތޫފާން" ނާންނާނެ

މިދިޔަ އަހަރު އިންޑިއާގެ ސިނަމާތަކަށް އައި ފަޅުކަމަށް ފަހު މި އަހަރު ސިނަމާތަކުގައި އަޅުވާ ފިލްމުތަކުގެ ތާރީހުތައް ފުލުފުލުން އިއުލާންކުރަމުން ދިޔަ ނަމަވެސް އަހަރުގެ އެންމެ އުންމީދީ ފިލްމުތަކުގެ ތެރެގައި ހިމެނޭ، ފަރުހާން އަޚްތަރުގެ "ތޫފާން" ސިނަމާތަކަށް ނުގެންނާނެ ކަމަށް ރިޕޯޓްތައް ބުނެފި އެވެ.

އޯމް ޕްރަކާޝް މެހެރާ ޑައިރެކްޓްކޮށްފައިވާ މި ސްޕޯޓްސް ޑްރާމާ އަކީ ކުރިން މިދިޔަ އަހަރުގެ އޮކްޓޯބަރު މަހުގެ ކުރީކޮޅު ރިލީޒްކުރަން ތާވަލުުރި ފިލްމެކެވެ. ފިލްމީ ޚަބަރުތައް ގެނެސްދޭ ނޫސްތަކުން ބުނީ "ތޫފާން" ގެ ޓީމުން މިހާރު ނިންމާފައި އޮތީ ސިނަމާތަކުގައި ފިލްމު އެޅުވުމުގެ ބަދަލުގައި އެމެޒޯން ޕްރައިމް ވީޑިއޯ އިން ޕްރިމިއާކުރަން ކަމަށެވެ.

ނަމަވެސް މިކަން އަދި ރަސްމީކޮށް ކަށަވަރެއް ނުވެ އެވެ. އެކަމަކު މިއީ ތެދަކަށްވެއްޖެ ނަމަ އެ ޕްލެޓްފޯމަށް "ތޫފާން" އާދައިގެ އަގަކަށް ދޫކޮށްލާނެ ކަމަކަށް ނުބެލެވެ އެވެ. ސްޓްރީމިން ޕްލެޓްފޯމްތަކުން މިހާރު ބޮޑު އަގުގައި މަޝްހޫރު ތަރިންގެ ފިލްމުތަކުގެ ޑިޖިޓަލް ރައިޓްސް ހޯދުމަކީ އިންޑިއާގައި އާންމުވެފައި އޮތް ވިޔަފާރިއެކެވެ.

ޝޫޓިން ނިމި ޕޯސްޓް-ޕްރޮޑަކްޝަން މަރުހަލާގައި އޮތް "ތޫފާން" ގައި ފަރުހާން ކުޅެފައި ވަނީ ބޮކްސިން ތެޅުންތެރިއެއްގެ ރޯލެވެ. އަދި މި ފިލްމަކީ އޭނާ 2013 ގައި ކުޅުނު ކާމިޔާބު ފިލްމު "ބާގް މިލްކާ ބާގް" އަށް ފަހު މެހެރާއާ އެކު މަސައްކަތްކުރި ދެވަނަ ފިލްމެވެ. އެ ފިލްމަކީ އިންޑިއާގެ ކުރީގެ އެތުލީޓް މިލްކާ ސިންގްގެ ވާހަކަ ކިޔައިދިން ބައޮގްރަފިކަލް ޑްރާމާއެކެވެ.

ފަރުހާން ވަރަށް ބޮށް ދަލާއި ލޭ އޮހުރުވައިގެން އެ ފިލްމަށް ތައްޔާރުވި ގޮތަށް "ތޫފާން" އަކީ ވެސް ހަށިގަނޑަށް ވަރަށް ބޮޑު ބަދަލެއް ގެނައި ފިލްމެކެވެ.

މި ފިލްމުގެ ކާސްޓްގައި މުރްނާލް ތާކޫރާއި ޕަރޭޝް ރާވަލް ވެސް ހިމެނެ އެވެ.

ސިނަމާތަކުގައި ނާޅުވަން ނިންމައި މި އަހަރު ޑިޖިޓިލް ޕްރިމިއާއަކަށް ދާން ނިންމި އެންމެ ފާހަގަކޮށްލެވޭ އެއް ފިލްމަކީ ކާތިކް އާރިޔަންގެ "ދަމާކާ" އެވެ. ރާމް މަދުވާނީ ޑައިރެކްޓްކުރި ފިލްމު ގެނެސްދޭނީ ނެޓްފްލިކްސްއިންނެވެ.