ރަސޫލާ އަށް ފުރައްސާރަކުރުމަކީ ހުރިހާ މުސްލިމުންނަށް ފުރައްސާރަކުރުން: ރޫހާނީ

ތެހެރާން (އޮކްޓޯބަރު 29) - ކީރިތި ރަސޫލާ އަށް ފުރައްސާރަ ކުރުމަކީ ދުނިޔޭގެ ހުރިހާ މުސްލިމުންނަށް ފުރައްސާރަ ކުރުން ކަމަށް އީރާނުގެ ރައީސް ހަސަން ރޫހާނީ ވިދާޅުވެއްޖެ އެވެ.

ގައުމީ ޓީވީން ވަގުތުން ދެއްކި ކެބިނެޓުގެ ބައްދަލުވުމެއްގައި ރޫހާނީ ވިދާޅުވީ ކީރިތި ރަސޫލާ އަށް ފުރައްސާރަކޮށް ކާޓޫން ކުރެހުމާއި އެކަމަށް ހުޅަނގުން ތާއީދު ކުރުމަކީ އެކަން ކުރި މީހުންގެ އެއްވެސް ގޮތެއް ނެތްކަން ދައްކުވައިދޭ ކަމެއް ކަމަށެވެ. ރޫހާނީ ވިދާޅުވީ މިނިވަންކަމަކީ އެހެން މީހުންނަށް އިހްތިރާމް ކުރުން ކަމަށެވެ.

"ހުޅަނގުގެ ގައުމުތަކަށް ރަނގަޅަށް އެނގެންޖެހޭނެ ކީރިތި ރަސޫލާ ދެކެ ދުނިޔޭގެ އެންމެހާ މުސްލިމުން ލޯބިވާ މިންވަރު. ރަސޫލާ އަށް ކުރާ ކޮންމެ ފުރައްސާރަ އަކީ އެންމެހާ މުސްލިމުންނަށް ކުރާ ފުރައްސާރަ. އަހަރެމެންގެ ނަބިއްޔާ އަށް ފުރައްސާރަ ކުރުމަކީ އެންމެހާ ރަސޫލު ބޭކަލުންނަށް ފުރައްސާރަ ކުރުން. އިންސާނީ ކަރާމަތަށް އަރައިގަތުން. އަދި އެއީ އެކަން ކުރާ ބައެއްގެ އެއްވެސް ގޮތެއް ނެތްކަން ހާމަވާ ކަމެއް،" ރޫހާނީ ވިދާޅުވި އެވެ.

ކީރިތި ރަސޫލާ އަށް ފުރައްސާރަކޮށް އާއްމުކޮށް ކާޓޫން ކުރަހާ ޝާއިއު ކުރަނީ ފްރާންސްގެ މަޖައްލާއެއް ކަމަށްވާ ޝާލީ އެބްދޫންނެވެ. އެ މަޖައްލާގެ އޮފީހަށް 2015 ވަނަ އަހަރު ވަނީ ހަމަލާދީ 12 މީހުން މަރާލައިފަ އެވެ.

ޚިޔާލުފާޅު ކުރުމުގެ މިނިވަންކަމާ ގުޅޭ ގޮތުން ކުލާހުގައި ކުރި މަޝްވަރާއެއްގައި ދަރިވަރުންނަށް ރަސޫލާގެ ކާޓޫން ދެއްކި ފްރާންސްގެ ޓީޗަރަކު ވަނީ މި މަހު 6 ވަނަ ދުވަހު މަރާލައިފަ އެވެ.

ރަސޫލަށް ކާޓޫން ކުރެހުން ދިފާއުކޮށް ފްރާންސްގެ ރައީސް އެމަނުއެލް މެކްރޮން ވަނީ އެއީ ޚިޔާލުފާޅުކުރުމުގެ މިނިވަންކަން ކަމަށް ދޭހަވާ ގޮތަށް ވާހަކަ ދައްކަވައިފަ އެވެ. އެއާ އެކު އިސްލާމީ ގައުމުތަކުގެ ރުޅިވެރިކަން އިތުރުވެ ފްރާންސްގެ އުފެއްދުންތައް ބޮއިކޮޓް ކުރުމަށް ވަނީ ގޮވާލައިފަ އެވެ.