ކަސްޓަމްސް ވަގުތީ ގޮތުން ހިންގަވާނީ އަބްދުﷲ ޝަރީފް

ކޮމިޝަނާ ޖެނެރަލް އޮފް ކަސްޓަމްސްގެ މަގާމަށް ރައީސް އިބްރާހިމް މުހައްމަދު ސޯލިހު، ބޭފުޅަކު އައްޔަން ކުރައްވަންދެން އެ އިދާރާ ހިންގަވާނީ، ކުރިން ވެސް ހަމަޖެހިފައިވާ ގޮތަށް ޑެޕިއުޓީ ކޮމިޝަނަރު އަބްދުﷲ ޝަރީފް ކަމަށް ކަސްޓަމްސް އިން މިއަދު ބުނެފި އެވެ.

ކަސްޓަމްސްގެ ކޮމިޝަނަ ޖެނެރަލް ނެތް ހިނދެއްގައި އިދާރާގެ ހިންގުމާ ހަވާލުވެ ވަޑައިގަންނަވާނީ ޑެޕިއުޓީ ކޮމިޝަނަރު ކަމަށް ކަސްޓަމްސްގެ ގާނޫނުގައި އޮވެ އެވެ. އަދި ޑެޕިއުޓީ ދެ ކޮމިޝަނަރުން ތިއްބަވާ ނަމަ ކޮމިޝަނަރު ނެތް ހާލަތެއްގައި ޒިންމާތަކާ ހަވާލުވެ ވަޑައިގަންނަވާނެ ޑެޕިއުޓީ ކޮމިޝަނަރަކު، ކުރިން ކަނޑައަޅާފައި ބޭއްވުން ވެސް ގާނޫނު ލާޒިމްކުރެ އެވެ.

އެހެންވެ، ކަސްޓަމްސް އަށް މިދިޔަ އަހަރުގެ ޖުލައި 8 ގައި ދެ ޑެޕިއުޓީ ކޮމިޝަނަރުން އައްޔަން ކުރެއްވިއިރު، ރައީސް އިބްރާހިމް މުހައްމަދު ސޯލިހް ނިންމަވާފައި ވަނީ ކޮމިޝަނަރު ނެތް ހިނދެއްގައި އޭނާގެ ޒިންމާތަކާއި މަސްއޫލިއްޔަތުތަކާ ހަވާލުވެ ވަޑައިގަންނަވާނީ އަބްދުﷲ ޝަރީފް ކަމަށެވެ. އަބްދުﷲ ޝަރީފްގެ އިތުރުން ކަސްޓަމްސްގެ ޑެޕިއުޓީ ކޮމިޝަނަރަކަށް އެ ދުވަހު ދެން އައްޔަން ކުރެއްވީ މުހައްމަދު މާނިއު އެވެ.

،ކަސްޓަމްސްގެ އެންމެ އިސްވެރިޔާގެ މަގާމުގައި ޑިސެމްބަރު 11، 2018 ން ފެށިގެން ހުންނެވި އަހުމަދު ނުއުމާން މިދިޔަ އަންގާރަ ދުވަހުގެ ރޭ އަވަހާރަވެ، އެ މަގާމު ހުސްވުމުން، ކަސްޓަމްސް ވަގުތީ ގޮތުން ހިންގަވާނީ އަބްދުﷲ ޝަރީފް ކަމަށް އެ އިދާރާ އިން މިއަދު ކުރި ޓުވީޓެއްގައި ބުނީ ސިޓީތައް އެޑްރެސް ކުރާ ފަރާތްތަކަށް އެކަން ސާފުކޮށްދީ، އެ މީހުންގެ ފަސޭހަ އަކަށެވެ.

ނުއުމާން އަވަހާރަވީ، އިންޑިއާގެ ބެންގަލޫރުގައި އާލާސްކަންފުޅަކަށް ފަރުވާ ހޯއްދަވަމުން ގެންދަވަނިކޮށެވެ.

އާލާސްކަންފުޅަށް ފަރުވާ ހޯއްދެވުމަށް މީގެ ހައެއްކަ މަސް ކުރިން ނުއުމާން 47، އިންޑިއާ އަށް ފުރާވަޑައިގަތުމުން ވެސް ދުވަހުން ދުވަހަށް އެ އިދާރާގެ ކަންކަން ނިންމެވުމުގައި އިސްވެ ހުންނެވީ އަބްދުﷲ ޝަރީފެވެ.

އޭނާ އަކީ މީގެ 26 އަހަރު ކުރިން ކަސްޓަމްސްގެ ޚިދުމަތާ ގުޅިވަޑައިގެންނެވި ބޭފުޅެކެވެ.