އެންދަމަން އުޅުމުގެ ތެރޭގައި ގެނބިގެން މީހަކު މަރުވެއްޖެ

އެންދަމަން އުޅުމުގެ ތެރޭގައި ދޯންޏެއްގެ ފަޅުވެރިއަކު ގެނބިގެން މިއަދު މަރުވެއްޖެ އެވެ.

ފުލުހުންގެ މީޑިއާ އޮފިޝަލަކު ވިދާޅުވީ، ދޯނީގައި ބޭނުންކުރާ ބޮއެ އޮޔާދާތީ އެ ބަލާ ފަތާފައި ގޮސް އެނބުރި އަންނަނިކޮށް އުމުރުން 45 އަހަރުގެ ފިރިހެނެއްގެ ހަރަކާތް ހުއްޓިގެން ދޯންޏަށް ނަގައި ބެލިއިރު، އަނގައިން ފޮނު އަރާފައިވާ ކަމަށެވެ.

އަދި އޭނާ ވަގުތުން ގއ. ވިލިނގިލީ ހޮސްޕިޓަލަށް ގެންދިޔަ ކަމަށާއި އެކަމަކު އޭރު ވެސް އޭނާ މަރުވެފައިވާ ކަމަށް ޑޮކްޓަރުންނާ ހަވާލާދީ ފުލުހުން ބުންޏެވެ.

އެ ހާދިސާ ހިނގައިގެން ފުލުހުންނަށް ރިޕޯޓް ކުރީ ހެނދުނު 10:00 ހާއިރު ކަމަށް ފުލުހުން ބުނެ އެވެ.

"މި ހާދިސާގައި ބަލަންޖެހޭ ކަންކަން ފުލުހުން ދަނީ ބަލަމުން،" ފުލުހުންގެ މެސެޖުގައި ވެ އެވެ.