ބައެއް ރަށްރަށަށް އުދަ އަރާނެ: މެޓް

ކުރިއަށް އޮތް 24 ގަޑިއިރު ތެރޭގައި ރާއްޖެއަށް އުދައެރުން އެކަށީގެންވާ ކަމަށް މެޓް އޮފީހުން މިއަދު ބުނެފި އެވެ.

މެޓް އޮފީހުގެ އެސިސްޓަންޓް މީޓިއޮރޮލޮޖިސްޓް ތަހުމީނާ އަބްދުލް ކަރީމް "މިހާރު" އަށް ވިދާޅުވީ، އަރަބި ކަނޑުގައި "ކިޔާރު" ކިޔާ ބާރުގަދަ ތޫފާނެއް މި ވަގުތު ވަނީ އުފެދިފައި ކަމަށެވެ. އެ ތޫފާނުގެ ސަބަބުން ދިޔަވަރު ބޮޑުވާ ވަގުތު، ރާއްޖޭގެ ރަށްރަށަށް އުދައެރުން އެކަށީގެންވާ ކަމަށް ވިދާޅުވި އެވެ.

މީގެ އިތުރުން ކުރިއަށް އޮތް 48 ގަޑިއިރު މުޅި ރާއްޖެ އަށް މޫސުން ގޯސް ވާނެ ކަމަށް ވެސް އޭނާ ލަފާކުރެއްވި އެވެ. އެއީ ރާއްޖެ އާއި ލަންކާއާ ދެމެދު އުފެދިފައިވާ ކޮޅިގަނޑެއްގެ ސަބަބުން ކަމަށާއި ކުރިއަށް އޮތް 24 ގަޑިއިރު ތެރޭގައި އެ ކޮޅިގަނޑު މިހާރަށް ވުރެ ބާރު ގަދަވާނެ ކަމަށް ވެސް އޭނާ ވިދާޅުވި އެވެ. އެހެން ނަމަވެސް ބުރާސްފަތި ދުވަހުގެ ކުރިން އެ ކޮޅިގަނޑު ރާއްޖެ ސަރަހައްދުން ދުރަށް، އަރަބި ކަނޑާ ދިމާއަށް ދަތުރުކުރާނެ ކަމަށް އޭނާ ވިދާޅުވި އެވެ.

އެ ކޮޅިގަނޑުގެ ސަބަބުން ކުރިއަށް އޮތް ދެ ދުވަހު މުޅި ރާއްޖެ އަށް ބޯކޮށް ވާރޭ ވެހި، ގުގުރުން އެކަށީގެންވާ ކަމަށް ތަހުމީނާ ވިދާޅުވި އެވެ. މޫސުން އެންމެ ގޯސްވާނެ ކަމަށް އޭނާ ލަފާކުރެއްވީ އުތުރާއި މެދު ރާއްޖޭގެ ސަރަހައްދުތަކަށެވެ. އެ ސަރަހައްދަށް ވައި ގަދަވެ ކަނޑު ގަދަ ވާނެތީ، ކަނޑުދަތުރުކުރާ މީހުން އެކަމަށް ސަމާލުކަން ދޭން އޭނާ އިލްތިމާސްކުރެއްވި އެވެ.

މިއަދުގެ ހެނދުނު 7:00 އިން 11:00 އާ ހަމައަށް މެޓް އޮފީހުން ވަނީ ހއ. އިން ވ. އަތޮޅާ ދެމެދަށް ޔެލޯ އެލާޓް ވެސް މެޓް އޮފީހުން ނެރުނެވެ.

ކުރިއަށް އޮތް 24 ގަޑިއިިރު އުތުރާއި މެދު ރާއްޖޭގެ އަތޮޅުތަކަށް ގަޑިއަކު 10-20 މޭލާ ދެމެދުގެ ބާރުމިނުގައި ވައި ޖެހޭނެ އެވެ. އަދި ދެކުނުގެ އަތޮޅުތަކަށް ފަސް މޭލުގެ ބާރުމިނުގައި ވައިޖެހޭ ކަމަށާއި ވިލާގަނޑުގައި ވައި ޖެހޭނީ 40 މޭލުގެ ބާރުމިނުގައި ކަމަށް މެޓް އޮފީހުން ބުންޏެވެ.