ހަމަދު ސްކޫލްގެ ކެޑޭޓުން ހުވާކޮށްފި

ލ. ގަމު ހަމަދު ބިން ހަލީފާ އާލް ސާނީ ސްކޫލުގެ 35 ކެޑޭޓަކު ރޭ މަގާމުގެ ހުވާކޮށްފި އެވެ.

ގަމުގައި ހުންނަ ހަމަދު ސްކޫލުގައި ބޭއްވި ހާއްސަ ހަފުލާއެއްގައި 35 ދަރިވަރަކު ކެޑޭޓުކަމުގެ ހުވާކުރިއިރު، އޭގެ ތެރެއިން 11 ކުއްޖަކާ ހަތިޔާރު ހަވާލުކުރުން ވެސް އޮތެވެ.

މި ރަސްމިއްޔާތު ޝަރަފުވެރިކޮށްދެއްވީ މެލޭޝިއާގެ ޔުނިޓަ އިންޓަނޭޝަނަލް ޔުނިވަސިޓީގެ ވައިސް ޗާންސެލަރު ޝަކީނާ ސޯފިއާ އެވެ. އޭނާ ލ. އަތޮޅަށް ވަޑައިގެން އުޅުއްވަނީ ސްކޫލުތަކުގެ އިސްވެރިންނަށާއި ބައެއް ޓީޗަރުންނަށް ސްލޫލް ލީޑަޝިޕާ ގުޅޭ ވޯކްޝޮޕެއް ހިންގުމަށެވެ.

ހަމަދު ސްކޫލުގެ ކެޑޭޓް ހަރަކާތުގެ އިންޗާޖް މުހައްމަދު ޝަރީފް ވިދާޅުވީ ދުވަސްކޮޅެއްގެ މެދުކެނޑުމަކަށް ފަހު ސްކޫލުގައި ކެޑޭޓް ހަރަކާތްތައް އަލުން ފެށިއިރު، މިހާރު 72 ކެޑޭޓުން އެބަތިބި ކަމަށެވެ.

"ކެޑޭޓު ހަރަކާތުގެ ސަބަބުން، ކުދިންގެ އަޚުލާގު ރަނގަޅުވެ، ކަންކަމަށް އިސްނެގުމުގެ ގާބިލްކަން ވަރަށް ބޮޑަށް އިތުރުވެފައިވާކަން ފާހަގަކުރެވޭ. ކެޑޭޓު ހަރަކާތުގެ ފޮނިމީރުކަން މިދަނީ ފެންނަމުން،" އޭނާ ވިދާޅުވި އެވެ.