އިނގިރޭސިވިލާތުގައި "ސްނިކާޒް" ޗޮކްލެޓް "މެރަތަން" ގެ ނަމުގައި ވިއްކަނީ

ސްނިކާޒް ޗޮކްލެޓަކީ ގިނަ ބައެއްގެ މެދުގައި ވަރަށް މަގުބޫލު ބްރޭންޑެކެވެ. މި ޗޮކްލެޓަކީ އެމެރިކާގެ މާސް އިން 1930 ގައި އުފައްދަން ފެށި އެއްޗެކެވެ. އެކަމަކު އިނގިރޭސިވިލާތުގައި "ސްނިކާޒް" އެންމެ ފުރަތަމަ ވިއްކީ މެރަތަންގެ ނަމުގަ އެވެ.

މެރަތަންގެ ނަމުގައި އެ ޗޮކްލެޓް ވިއްކީ ސެޕްޓެމްބަރު 9، 1990 އާ ހަމައަށެވެ. އޭގެ ފަހުން މިހާރު 30 ވަނަ އަހަރަށް އެޅީ އެވެ. އެހެންވެ އެކަން ފާހަގަކުރުމުގެ ގޮތުން އިނގިރޭސިވިލާތުގައި މިހާރު އަންނަނީ "ސްނިކާޒް" ޗޮކްލެޓް "މެރަތަން" ގެ ނަމުގައި ވިއްކަމުންނެވެ.

ތިން މަސް ދުވަހުގެ މުއްދަތަކަށް ވިއްކާ މި ލިމިޓެޑް ޗޮކްލެޓަކީ ރެޓްރޯ އެޑިޝަންގައި ނަމުގައި ނެރުނު އެއްޗެކެވެ. "މެރަތަން" ލިބޭނީ އިނގިރޭސިވިލާތުގެ މޮރިސަންސްގެ ސުޕަމާކެޓްތަކުން އެކަންޏެވެ.

މިކަމާ ބެހޭ ގޮތުން މާސްގެ ބްރޭންޑް ޑިރެކްޓަރު ގެމާ ބަގިންސް ވިދާޅުވީ ސްނިކާޒްގެ އަސްލު އިނގިރޭސިވިލާތުގައި "މެރަތަން" ގެ ނަމުގައި ނެރެން ނިންމީ ކުރީގެ ހަނދާންތައް އާކުރުމުގެ ބޭނުމުގައި ކަމަށެވެ.

"ހަމަމިއާ އެކު މިއީ މާސްގެ އުފެއްދުންތައް އިނގިރޭސިވިލާތުގައި ވިއްކާތާ 85 އަހަރު ފުރުން ވެސް ފާހަގަކުރަން ކުރި ކަމެއް. މެރަތަންގެ ނަމުގައި ނެރުނު ސްނިކާޒް ޗޮކްލެޓަކީ މި ގައުމުގައި ވަރަށް މަގުބޫލު އެއްޗެއް،" އޭނާ ވިދާޅުވި އެވެ. "އެ ނަމުގައި ސްނިކާޒް ނެރުމަކީ އެތައް ހަނދާންތަކެއް އާކޮށްދޭނެ ކަމެއް."

ސްނިކާޒް އަކީ އިނގިރޭސިވިލާތުގައި ދެވަނަ އަށް އެންމެ މަގުބޫލު ޗޮކްލެޓެވެ. އެ ގައުމުގައި އެންމެ މަގުބޫލު ޗޮކްލެޓަކީ ކެޑްބަރީ ޑެއިރީ މިލްކެވެ.