ބީއެމްއެލުން 'ސޭވް ދަ ބީޗް' އަށް 30،000ރ. ދީފި

ދުނިޔޭގެ މި އަހަރުގެ ތިމާވެށީގެ ދުވަހާ ގުޅުވައިގެން ބޭންކް އޮފް މޯލްޑިވްސް (ބީއެމްއެލް) ގެ މުވައްޒަފުން 'ޓްރޭޝްޓެގްއެމްވީ' ގެ ނަމުގައި ފެށި ކެންޕެއިންގެ ބައިވެރިންގެ ފަރާތުން އަމިއްލަ ޖަމިއްޔާއެއް ކަމަށްވާ 'ސޭވް ދަ ބީޗް' އަށް 30،000ރ. މިއަދު ދީފި އެވެ.

ތިމާވެށި ރައްކާތެރިކޮށް، ރާއްޖޭގެ ގޮނޑުދޮށްތައް ސާފުކޮށް، ބަލަހައްޓާ ސޭވް ދަ ބީޗު ޖަމިއްޔާ އަށް ފައިސާގެ އެހީ ދިނީ ވިލިމާލޭގައި ބީއެމްއެލުން ބޭއްވި ހަފުލާއެއްގަ އެވެ.

ބީއެމްއެލްގެ ޕަބްލިކް ރިލޭޝަންސް މެނޭޖަރު މުހައްމަދު ސައީދު ވިދާޅުވީ، ޓްރޭޝްޓެގް ޗެލެންޖަށް ގިނަ ބައެއްގެ ފަރާތުން ތަރުހީބު ލިބުނު ކަމަށެވެ.

"މިއަދު އަޅުގަނޑުމެން ފޯރުކޮށްދޭ އެހީތެރި ކަމަކީ ދެމެހެއްޓެނިވި ގޮތެއްގައި ތިމާވެށްޓަށް ފައިދާކުރުވަނިވި ހަރަކާތްތަކެއް ހިންގުމަށް ދެވޭ އެހީތެރިކަމެއް. ޒުވާނުން އިސް ނަގައިގެން މިފަދަ މުހިންމު މަސައްކަތެއް ކުރާ ޖަމިއްޔާއަކަށް ބީއެމްއެލްގެ ނަމުގައި އެހީތެރިކަން ފޯރުކޮށްދެވޭ ކަމީ އަޅުގަނޑުމެންނަށް ލިބޭ ވަރަށް ބޮޑު އުފަލެއް ވެސް މެ،" އޭނާ ވިދާޅުވި އެވެ.

ރާއްޖޭގެ އެކި ސަރަހައްދުތަކުގައި މަސައްކަތް ކުރާ ބީއެމްއެލްގެ މުވައްޒަފުންނާއި މިދިޔަ ފިތުރު އީދު ބަންދަށް އެކި ރަށްރަށަށް ދިޔަ މުވައްޒަފުން އިސްނަގައިގެން ފެށި 'ޓްރޭޝްޓެގްއެމްވީ' ގައި ވަނީ ރަށްރަށް ސާފުކޮށް، ގެނެސްފައިވާ ރީތިކަން ހުށަހަޅައިދީފަ އެވެ. ސާފުކުރުމުގެ ކުރިން މާހައުލު އޮތް ގޮތް އަދި އެ އަށް ފަހު ނަގާފައިވާ ފޮޓޯތައް #ޓްރޭޝްޓެގްއެމްވީ މެދުވެރިކޮށް ސޯޝަލް މީޑިއާ ގައި ބީއެމްއެލް އިން ވަނީ ހިއްސާކޮށްފަ އެވެ.

މި ހަރަކާތް ތިމާވެއްޓާ ބެހޭ މިނިސްޓަރު ޑރ. ހުސައިން ރަޝީދު ހަސަން ވެސް ވަނީ އެންޑޯސް ކުރައްވައިފަ އެވެ.