އިންފްލުއެންޒާ ވެކްސިން ޖަހަން އެޗްޕީއޭއިން އިލްތިމާސްކޮށްފި

ކުރިއަށް އޮތް ތަނުގައި އިންފްލުއެންޒާ ރޯގާ ފެތުރުން އާއްމުވާނެ ކަމަށް ލަފާ ކުރެވޭތީވެ، އިންފްލުއެންޒާ ވެކްސިން ޖަހަން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިއަދު އިލްތިމާސްކޮށްފި އެވެ.

އެ އޭޖެންސީ އިން ނެރުނު އިއުލާނެއްގައި ބުނެފައި ވަނީ ވޭތުވެދިޔަ ދެ އަހަރުގެ ތަފާސް ހިސާބުތަކަށް ބަލާއިރު މި އަހަރުގެ ވެސް ކުރިއަށް އޮތް ދުވަސްތަކުގައި އިންފްލުއެންޒާ ރޯގާ ފެތުރުމުގެ ބިރު ބޮޑު ކަމަށެވެ. އެ ބަލިން ރައްކާތެރިވާން އަހަރަކު އެއްފަހަރު ވެކްސިން ޖަހަން ޖެހޭނެ ކަމަށް އެޗްޕީއޭ އިން ބުންޏެވެ.

އެ ބަލި ފަތުރާ ވައިރަސް އަކީ ކޮންމެ އަހަރަކު ވެސް ކޮންމެވެސް ވަރެއްގެ ބަދަލުތަކެއް އަންނަ ވައިރަސް އެއް ކަމަށް ވުމުން، އެ ބަލިން ރައްކާތެރިވާން ޖަހާ ވެކްސިނަށް ވެސް ކޮންމެ ހަ މަހަކުން ބަދަލު ގެނެ އެވެ.

މި ބަލީގެ ސަބަބުން އެންމެ ބޮޑަށް އަސަރުކުރާނެ މީހުން

- މާބަނޑު މީހުން

- ދާއިމީ ބައްޔަކަށް ފަރުވާ ހޯދަމުން އަންނަ މީހުން

- ކެންސަރަށް ފަރުވާ ހޯދަމުން އަންނަ ނުވަތަ ފަރުވާ ނިމިފައިވާ މީހުން

- ޑައަލިސިސް ހަދަމުން އަންނަ މީހުން

- ނޭވާލާ ނިޒާމުގެ ބަލިތަކަށް ފަރުވާކުރާ އުމުރުން ތިން އަހަރުން މަތީގެ ކުދިން

- 65 އަހަރުން މަތީ މީހުން

- އުމުރުން ހަ މަހާއި ހަ އަހަރާއި ދެމެދުގެ ކުޑަކުދިން

އެޗްޕީއޭ އިން ބުނިގޮތުގައި މި ބަލީގެ ސަބަބުން ފުރާނަ އަށް ނުރައްކާވާނެ މީހުން ވެކްސިން ޖަހަން އިސްކަން ދޭން ޖެހެ އެވެ. އަދި މި ވެކްސިން ޖަހާ، ހަ މަހާއި ހަ އަހަރާ ދެމެދުގެ ކުދިން، ފުރަތަމަ ޑޯޒް ޖަހާތާ އެއް މަސް ފަހުން ދެ ވަނަ ޑޯޒެއް ޖަހަން ޖެހޭނެ ކަމަށް ވެސް އެތަނުން ބުންޏެވެ.

މި ބަލިން ސަލާމަތްވާން ބޭނުންވާ އިންފްލުއެންޒާ ވެކްސިން އޭޑީކޭ ފާމަސީ އާއި އެސްޓީއޯ ފާމަސީން ލިބޭނެ އެވެ.

މަދިރީގެ ޒަރިއްޔާއިން ފެތުރޭ ޗިކުންގުންޔާ އާއި ޑެންގީ ހުން އާންމުވާނެ ކަމަށް ލަފާކުރެވޭތީވެ، އެ ބަލިތަކާ ދެކޮޅަށް ކެމްޕެއިނެއް ވެސް އެޗްޕީއޭ އިން ވަނީ ހޯމަ ދުވަހު ފަށައިފަ އެވެ.