ސީ ބެޑެއްގައި އޮޔާ ދިޔަ ދިވެއްސަކު ފުލުހުން ސަލާމަތްކޮށްފި

ތ. ގުރައިދޫގައި މޫދަށް އެރި އުޅުނު އަންހެނަކު ސީ ބެޑެއްގައި އޮޔާ ދަނިކޮށް މިއަދު ސަލާމަތްކޮށްފި އެވެ.

ފުލުހުން ބުނީ ހެނދުނު 10:15 ހާއިރު ސީ ބެޑެއްގައި މޫދަށް ގޮސް އުޅެނިކޮށް ފުލުހުން ސަލާމަތް ކުރީ 19 އަހަރުގެ އަންހެނެއް ކަމަށެވެ. އޭނާ ސަލާމަތް ކުރީ ކަނޑުމަތީގައި އޮއްވައި ކަމަށް ފުލުހުން ބުންޏެވެ. އެމީހާ ސަލާމަތް ކުރީ ފުލުހުން ލޯންޗެއްގައި ގޮހެވެ.

މި ހާދިސާގައި އަންހެން މީހާ އަށް އެއްވެސް ގެއްލުމެއް ނުލިބެ އެވެ.

ފުލުހުން ބުނި ގޮތުގައި އެ އަންހެން މީހާ އޮޔާ ދިޔައީ ރަށު ފަންނާ ދިމާލުންނެވެ.

އެނގިފައިވާ ގޮތުގައި، އެ އަންހެން މީހާ މޫދަށް އެރުނީ ރައްޓެހި ބަޔަކާ އެކު ގޮހެވެ. އަދި އެ އަންހެން މީހާ އޮޔާ ދިޔަ ކަމުގެ މައުލޫމާތު ފުލުހުންނަށް ދިނީ މޫދަށް އެރި އުޅުނު ބައެކެވެ.