އެސްއޯއެފްގެ ފައިސާގައި އަޅުގަނޑު ނުޖެހެން: އަސްވާޑު

އެމްއެމްޕީއާރްސީގެ ހިޔާނާތުގެ ރިޕޯޓުގައި ރައްޔިތުންގެ މަޖިލިސްގެ ނައިބު ރައީސް ރީކޯ މޫސާ މަނިކުގެ އެކައުންޓަށް ވަދެފައިވާ ފައިސާއަކީ ސަންގު ޓީވީގެ މެނޭޖިން ޑައިރެކްޓަރު އިބްރާހިމް ވަހީދު (އަސްވާޑް) ފޮނުވި ފައިސާއެއް ކަމަށް ރީކޯ މޫސަ ވިދާޅުވިޔަސް އެކަން އަސްވާޑު ދޮގުކޮށްފި އެވެ.

މިދިޔަ ހަފުތާގައި އެންޓި ކޮރަޕްޝަން ކޮމިޝަން (އޭސީސީ) އިން އާންމު ކުރި އެމްއެމްޕީއާރްސީގެ ހިޔާނާތުގެ ރިޕޯޓުގައި، މޫސަގެ އެކައުންޓަށް 100،000 ޑޮލަރު (1،542،000ރ.) ވަދެެފައިވާ ކަމަށް ދައްކަ އެވެ. އެކަމާ ގުޅޭ ގޮތުން އޭސީސީގެ ރައީސް ހަސަން ލުތުފީ އަށް ފޮނުވި ސިޓީއެއްގައި، އޭނާގެ އެކައުންޓަށް ޖަމާވެފައިވާ ފައިސާ އަކީ އަސްވާޑު ފޮނުވި ފައިސާތަކެއް ކަމަށް މޫސަ ވިދާޅުވި އެވެ. އަދި އެސްއޯއެފް އާ އެކު ވިިޔަފާރީގެ އެހެން މުއާމަލާތެއް ކޮށްފައި ނުވާނެ ކަަމަށް ވެެސް ވިދާޅުވެފައި ވެ އެވެ.

މި މައްސަލައާ ގުޅިގެން އަސްވާޑު ވިދާޅުވީ އެސްއޯފްގެ ފައިސާއެއްގައި އޭނާ ނުޖެހޭ ކަމަށެވެ. އަދި އޭނާގެ ނަން އޭސީސީ އިން ނެރުނު ރިޕޯޓުގައި ނެތްކަން ފާހަގަ ކޮށް، އެސްއޯއެފް އިން ދިން ޗެކެއްގައި ވެސް ހިފާފައި ނުވާނެ ކަމަށް ވިދާޅުވި އެވެ.

"އަޅުގަނޑުގެ އެކައުންޓަކުން ނުދައްކާނެ ދުވަހަކު ވެސް 100،000 ޑޮލަރު އެއްވެސް މީހަކަށް ފޮނުވާފައި ނުވަތަ ޖަމާވެފައިވާ ތަނެއް،" އަސްވާޑު ވިދާޅުވި އެވެ.

މީގެ އިިތުރުން އޭނާގެ ބޭންކު ސްޓޭޓްމަންޓުތަކުގެ ތަފްސީލު ވެސް އޭސީސީ އަށް ހިއްސާކުރާނެ ކަމަށް އޭނާ ވިދާޅުވި އެވެ.

އެހެން ނަމަވެސް މޫސަ ވިދާޅުވެފައި ވަނީ އޭނާގެ އެކައުންޓަށް ޖަމާކުރި ފައިސާ އަކީ މުދާ ގަންނަން ވެގެން ސިންގަޕޫރުން އެ ފައިސާ ނެގޭނެ ގޮތެއް ހޯދަން ވެގެން ޖަމާކުރި ފައިސާ ކަމަށާއި އެހެންވެ މޫސަގެ އެޗްއެސްބީސީ ސިންގަޕޫރު އެކައުންޓުން ހަތަރު ޗެކު މެދުވެރިކޮށް އަނބުރާ އަސްވާޑަށް ދީފައިވާ ކަމަށެވެ. މިއީ ޓީވީ ޗެނަލެއް އުފެއްދަން ބޭނުންވާ އާލާތްތައް ސިންގަޕޫރުން ގެނައުމަށް ބޭނުންވާ ފައިސާ އެ ގައުމުން ހޯދަން، އަސްވާޑު އާއި ވެލިދޫ ދާއިރާގެ މެމްބަރު ޔާމިން ރަޝީދު އެދުމުން ކުރި ކަމެއް ކަމަށް މޫސަ ވިދާޅުވެފައި ވެ އެވެ.

މޫސަގެ އިތުރުން އެސްއޯއެފްގެ ފައިސާ މަޖިލީހުގެ އެހެން ބައެއް މެންބަރުންގެ އެކައުންޓަށް ވަދެ އަދި އެ ބޭފުޅުންގެ މަސްލަހަތު އޮންނަ ކުންފުނިތަކަށް ވެސް ވަދެފައި ވެ އެވެ. އޭގެ ތެރޭގައި ވިލުފުށީ ދާއިރާގެ މެމްބަރު ރިޔާޒު ރަޝީދާއި ގަލޮޅު ދެކުނު ދާއިރާގެ ކުރީގެ މެމްބަރު އަދި މިހާރުގެ ޔޫތު މިނިސްޓަރު އަހުމަދު މަހުލޫފާއި ގުރައިދޫ ދާއިރާގެ މެމްބަރު ހުސެއިން މަނިކު ދޮންމަނިކު ހިމެނިވަޑައިގަންނަވަ އެވެ. މި މައްސަލައިގެ ތަހުގީގު ހިނގަންދެން މަހުލޫފު މިހާރު ވަނީ ސަސްޕެންޑް ކޮށްފަ އެވެ.