ހުޅުމާލެ ބީޗްގައި ކެފޭ ހިންގަނީ ހުއްދަ ނެތި

24 ޑިސެމްބަރ 2018

ހުޅުމާލޭ ބީޗުގައި ކެފޭތައް ހިންގަނީ އެޗްޑީސީގެ ހުއްދަ ނެތި ކަމަށާއި، އަންނަ މަހުގެ ނިޔަލަށް ބީޗު ސަރަހައްދު ހުސްކޮށް އެ ތަންތަން އާންމުންނަށް ބޭނުންކުރެވޭ ގޮތް ހަދަން އިކޮނޮމިކް މިނިސްޓްރީން އެޗްޑީސީގައި އެދެފި އެވެ.

ފާތިމަތު ޝަނާ މުހައްމަދު

އިކޮނޮމިކް މިނިސްޓަރު ފައްޔާޒް އިސްމާއިލް ކުރެއްވި ޓްވީޓެއްގައި ވިދާޅުވީ ހުޅުމާލެ ބީޗް ގައި ހިންގާ ކެފޭތަކުގެ މައްސަލަ ބެލި އިރު އެތަން ތަން ހިންގަނީ އެޗްޑީސީގެ ހުއްދަ ނެތިކަން އެނގިފައިވާ ކަމަށެވެ. އެހެންވެ، އަންނަ ޖެނުއަރީ 31 ގެ ކުރިން ބީޗު ހުސްކޮށް، އާންމުންނަށް އެ ތަން ފުރިހަމަޔަށް ބޭނުންކުރެވޭނެ ގޮތް ހަދަން ފައްޔާޒް ވަނީ އެދިވަޑައިގެންފަ އެވެ.

Hulhumale’ beachga hingaa cafe thakuge Mahsala belumahfahu ethanthan hinganee HDC ge huhdhaeh nethikan vanee saafuvefa.31 Jan 2019 ge kurin sarahahdhu aanmu raiyithunnah furihamagothuga beynunkureveynegothah inthizaamukurumah HDC ah @EconDevMv in miadhu ilthimaaskohfi
— Fayyaz Ismail (@faya_i) December 24, 2018

މިނިސްޓަ ފައްޔާޒު މިހެން ވިދާޅުވެފައި މި ވަނީ ހުޅުމާލެ ގެސްޓްހައުސްތަކުން ވިޔަފާރީގެ ބޭނުންތަކަށް ބީޗު ބޭނުންކުރާ މައްސަލަ ބޮޑުވެ އާންމުންގެ ޝަކުވާ ބޮޑުވެފައި ވަނިކޮށެވެ.

ފާޑުކިޔާ މީހުން ބުނަނީ ބީޗް ސަރަހައްދު މިހާރު ވަނީ ކެފޭތަކާއި ރެސްޓޯރެންޓްތަކުން ހިސޯރުކޮށްފައި ކަމަށާއި ބީޗު ސަރަހައްދަކީ އެންމެންނަށް އެއް ހަމައެއްގައި ބޭނުންކުރެވޭ ތަނަކަށް ހަދަންޖެހޭ ކަމަށެވެ.

އަނެއް ބަޔަކު ވަނީ ބީޗުގައި ހުރި ގަސްތައް ނަގައި އެތަން ސާފުކޮށްގެން ވިޔަފާރިއަށް ބޭނުންކުރުމަކީ ބަލައި ގަނެވޭނެ ކަމެއް ނޫން ކަމަށް ބުނެފަ އެވެ.

އާންމުންގެ ޝަކުވާ ބޮޑުވިޔަސް މިކަމާ އެޗްޑީސީން އަދި އެއްވެސް އެއްޗެއް ނުބުނެ އެވެ.

Comments