ނޭޕާލް އެއާޕޯޓަށް ބޯޓު ވެއްޓުނީ ޕައިލެޓް ހާސްވެފައި އިނުމުން: ރިޕޯޓް

ކަތުމަންޑޫ (އޮގަސްޓް 28) - ނޭޕާލުގެ ކަތުމަންޑޫ އެއާޕޯޓަށް ޖައްސަން އުޅެނިކޮށް މިދިޔަ މާޗް މަހު ޔޫއެސް-ބަންގްލާ އެއާލައިނުގެ ބޯޓު ވެއްޓުނީ ޕައިލެޓް އާބިދު ސުލްތާން މާބޮޑު ހާސްވެފައި އިނުމުން ކަމަށް ތަހުގީގު ޓީމުން ތައްޔާރުކުރި ރިޕޯޓުގައި ބުނެފި އެވެ.

މާޗް 12 ވަނަ ދުވަހު ކަތުމަންޑޫގެ ޓްރިބުވަން އިންޓަނޭޝަނަލް އެއާޕޯޓަށް ޖައްސަން އުޅުނު ބޯޓު ވަނީ ރަންވޭ މަތިން ކަހާލައިގެން ގޮސް ޖެހިގެން އޮތް ފުޓުބޯޅަ ދަނޑަކަށް ވެއްޓިފަ އެވެ. ބޯޓުގައި އަލިފާން ރޯވެ މަރުވި 51 މީހުންގެ ތެރޭގައި ޕައިލެޓާއި ކޯ-ޕައިލެޓް ވެސް ހިމެނެ އެވެ. އެ ހާދިސާ އިން ވަނީ 20 މީހުން ސަލާމަތްވެފަ އެވެ. ސަލާމަތްވި މީހުންގެ ތެރޭގައި ނޭޕާލުގައި ޑޮކްޓަރުކަން ކިޔާ ދިވެހި ކުއްޖަކު ވެސް ހިމެނެ އެވެ.

ތަހުގީގު ރިޕޯޓުގައި ބުނެފައި ވަނީ ޔޫއެސް-ބަންގްލާ އެއާލައިންސްގެ ކެޕްޓަންގެ ގާބިލްކަމާ މެދު އަންހެން ޕައިލެޓް ވެސް ސުވާލު އުފެއްދި ކަމަށެވެ. އޭގެ ފަހުން ޕައިލެޓް އާބިދު ސުލްތާން ވަރަށް ބޮޑަށް ހާސްވެ ޖަޒްބާތު ކޮންޓްރޯލް ނުކުރެވިގެން އުޅުނު ކަމަށް ބުނެފައިވެ އެވެ.

"ނަތީޖާއެއްގެ ގޮތުން އޭނާ ހާސްވެ ކޮކްޕިޓްގައި ސިނގިރޭޓް ވެސް ބޮއިފައިވޭ. އަދި އޭނާ ހާސްވެގެން ރޮއި އެތައް ފަހަރަކު ކިނބިހި އަޅައިފައިވޭ،" ރިޕޯޓުގައި ބުނެފައިވެ އެވެ.

ޑާކާ އިން ކަތުމަންޑޫ އަށް ކުރި ކުރު ދަތުރުގައި ޕައިލެޓް އާބިދު ސުލްްތާން ހުއްޓާނުލައި ވާހަކަ ދެއްކުމުގެ ސަބަބުން ކޯ ޕައިލެޓް ޕްރިތޫލާ ރާޝިދަށް އުނދަގޫތަކެއް ކުރިމަތިވި ކަމަށް ބުނެފައިވެ އެވެ. ކަތުމަންޑޫ އެއާޕޯޓަށް ރާޝިދު ކުރިން ބޯޓެއް ޖައްސައިފައެއް ނުވެ އެވެ.

ބޮމްބާޑިއާ ޑޭޝް 8 މަރުކާގެ ބޯޓު އެއާޕޯޓަށް ޖައްސަން ގޮސް ކުއްލިއަކަށް ރޫޓް ބަދަލުކުރި ކަމަށާއި އަދި ސްޕީޑް ވެސް ދަށް ނުކުރާ ކަމަށް ބުނެފައިވެ އެވެ. މީގެ އިތުރުން ލޭންޑިން ޗެކްސް ވެސް ނަހަދާ ކަމަށް ރިޕޯޓުގައި ބުނެފައިވެ އެވެ.

ބޯޓު ވެއްޓުނު ދުވަސްވަރު ހާމަކުރި ބައެއް ރިޕޯޓުތަކުގައި ބުނެފައި ވަނީ އެ ހާދިސާ ހިނގީ ޕައިލެޓާއި ކޮންޓްރޯލް ޓަވަރުގެ މުވާސަލާތު ކުރުމުގެ އޮޅުންތަކަކުން ކަމަށެވެ.

ވެއްޓުނު ކެނެޑާގެ ބޮމްބާޑިއާ ކުންފުނީގެ 76 ގޮނޑީގެ ޑޭޝް 8 ކިޔޫ400 ބޯޓަށް ވަނީ 17 އަހަރުވެފަ އެވެ.