އިބޫގެ ވައުދުތަކަށް ރައީސްގެ ރައްދު: "ތިއީ އަޅުގަނޑު ފުރިހަމަކޮށްދީފައި ހުރި ކަންކަން"

ރިޔާސީ އިންތިޚާބުގެ ކެމްޕޭންގައި އިދިކޮޅު ޕާޓީތަކުގެ ކެންޑިޑޭޓު، އިބްރާހިމް މުހައްމަދު ސޯލިހް ރައްޔިތުންނަށް ވެވަޑައިގަންނަވަނީ މި ސަރުކާރުން ރައްޔިތުންނަށް ފުރިހަމަކޮށްދީފައި ހުރި ޚިދުމަތްތަކަށް ކަމަށް ރައީސް އަބްދުﷲ ޔާމީން މިއަދު ގދ. މަޑަވެލީގައި ވިދާޅުވެއްޖެ އެވެ.

މަޑަވެލީގެ ބަނދަރު ހެދުމާއި ގޮނޑުދޮށް ހިމާޔަތްކުރުމުގެ ނިމުން ފާހަގަކުރުމުގެ ރަސްމިއްޔާތުގައި ރައީސް ވިދާޅުވީ އެމަނިކުފާނުގެ ސަރުކާރުން ނުކުރާ ކަމެއް ކުރައްވަން އިދިކޮޅުގެ ކެންޑިޑޭޓު ވައުދުވެވަޑައިނުގަންނަވާ ކަމަށެވެ. މިސާލެއް ދައްކަވަމުން، ރައީސް ވިދާޅުވީ އެމަނިކުފާނު ބަނދަރު ހެއްދެވުމުން އެ ބަނދަރުން ރަށަށް އަރާވަޑައިގެން އެ ރަށުގައި ބަނދަރު ހައްދަވައި ދެއްވާނެ ކަމަށް އިބޫގެ ކެމްޕޭންގައި ވިދާޅުވާ ކަމަށެވެ.

ރައީސް، އިބޫ އަށް ފާޑު މި ވިދާޅުވީ، ތ. ވޭމަންޑޫގައި ނަރުދަމާގެ މަސައްކަތް މި ސަރުކާރުން ކުރަމުން އަންނަނިކޮށް، ވެރިކަމާ ހަވާލުވެވަޑައިގެން އެ ރަށުގައި ނަރުދަމާ ގާއިމުކޮށްދެއްވަން ވައުދުވެވަޑައިގަތުމުންނެވެ. އެއީ، މި ސަރުކާރުން ކުރިއަށް ގެންދާ 30 މިލިއަން ރުފިޔާގެ މަޝްރޫއެއް ކަމަށް ވިދާޅުވެ، މި ސަރުކާރުގެ ވަޒީރުން ވެސް ގެންދަވަނީ އިބޫގެ އެ ވައުދަށް ފާޑުވިދާޅުވަމުންނެވެ.

ރައީސް ޔާމީން ވިދާޅުވި ގޮތުގައި އެމަނިކުފާނު ތަރައްގީގެ ގިނަ ކަންކަން ފުރިހަމަކޮށްދީފައި އޮތުމުން، އިދިކޮޅުން އިތުރަށް ކުރާނެ ވައުދު ވަނީ ހުސްވެފަ އެވެ.

"އަޅުގަނޑު [ވާހަކަ ދައްކާފައި] ފައިބާ ތަނުން، އިދިކޮޅު ކެންޑިޑޭޓު ވެސް މި ރަށަށް ވަޑައިގަންނަވާނެ ކަންނޭނގެ. އަޅުގަނޑުގެ ސަރުކާރުން ހަދައިދިން ބަނދަރުން އެމަނިކުފާނު ވެސް މި ރަށަށް އަރުއްވާނީ. މި ރަށުގެ ރައްޔިތުންގެ ނަސީބު ރަނގަޅިއްޔާ ހަމަ ވިދާޅުވާނެ ބަނދަރެއް ހައްދަވައި ދެއްވާނަމޭ. މިއީ، އަޅުގަނޑުމެންގެ ކަންކަން ހުރި ވަރު،" ރައީސް ވިދާޅުވި އެވެ.

އެމަނިކުފާނު ވިދާޅުވީ މި ސަރުކާރުން ބޯހިޔާވަހިކަމުގެ ދަތިކަމަށް ހައްލު ހޯދައިދޭން ތަފްސީލާއެކު ބޮޑު މަޝްރޫއެއް އިއުލާން ކުރެއްވުމުން، އެކަން ކޮށްދޭނެ ކަމަށް އިދިކޮޅުން ވެސް ބުނަމުން އަންނަ ކަަމަށެވެ. ބަނދަރާއި ނަރުދަމާ ގާއިމްކުރުން ފަދަ މަޝްރޫއުތައް އެމަނިކުފާނު ނިންމުމުން، އެކަން ތަކުރާރުކޮށް ވައުދުވުމަކީ އިދިކޮޅު މީހުންނަށް ކުރެވެން އޮތް ވަރު ކަމަށް ރައީސް ވިދާޅުވި އެވެ.

ރައީސްގެ ވާހަކަފުޅުގެ ޚުލާސާ:

- އެމްޑީޕީގެ ސަރުކާރުގައި މަޑަވެއްޔަށް ކޮށްދިން ކަމެއް، ކުރި ޚަރަދެއް ނެތް. މި ސަރުކާރުގެ ފަސް އަހަރުގެ ތެރޭގައި 139 މިލިއަނަށް ވުރެ ގިނަ ރުފިޔާގެ މަޝްރޫއު ހިންގި.

- ބަނދަރާއި ގޮނޑުދޮށް ހިމާޔަތް ކުރުމުގެ މަޝްރޫއު ނިމި، ދެން އޮތީ ނަރުދަމާ ގާއިމްކުރުން. އެ މަޝްރޫއު ނިމޭއިރު މި ރަށަށް ކުރި ޚަރަދު 150 އަށް ވުރެ އިތުރުވާނެ.

- މަޑަވެއްޔާއި ހޯނޑެއްދޫ ކޯޒްވޭއަކުން ގުޅުވައިދިނީ ދެ ރަށުގެ ރައްޔިތުންގެ ފަސޭހައަކަށް.

- މަޑަވެލިން، 2013 ގައި އަޅުގަނޑަށް، 70 ޕަސެންޓު ލިބުނު. މި އިންތިޚާބުގައި 90 ޕަސެންޓް ނުދޭންވީ ސަބަބެއް ނެތް.

- ހޯނޑެއްދޫގެ ބަނދަރު ހަދަން ބޭނުންވާ ފައިސާ ހަމަޖެހިއްޖެ. އެ ރަށުގެ ނަރުދަމާގެ ވެސް ފައިސާ އޮތީ ކަށަވަރުވެފައި. ނަރުދަމާ އަޅަން ޕްލޭންކޮށްފައިވާ 20 ރަށުގެ ތެރޭގައި ހޯނޑެއްދޫ ހިމެނޭ.

- ޓޫރިޒަމަށް އެނދުތައް އިތުރުކޮށް، ޖީބުތައް ތަނަވަސްކޮށްދޭނަން.

- އިދިކޮޅުގެ ޖަޒީރާ ކޮންސެޕްޓުން ރައްޔިތުންނަށް ވާނެ ފައިދާއެއް ނެތް. ތަރައްގީ އޮތީ، އެސްޓީއޯ އާއި އެމްޓީސީސީ ފަދަ ސަރުކާރުގެ ކުންފުނިތައް ބާރުވެރިކޮށްދީގެން މަޝްރޫއުތައް ހިންގަން ފުރުސަތުދީގެން.

- ކަންކަން ހައްލުކުރުމަކީ ރޮކެޓް ސައިންސެއް ނޫން، މާލޭގެ ކުނިގޮނޑު މައްސަލަ ވެސް އެ އޮތީ ހައްލު ހޯދައި ދީފައި. މި ސަރުކާރަކީ ވައުދު ފުއްދައިދޭނެ ސަރުކާރެއް.

ރައީސް ޔާމީން ވިދާޅުވި ގޮތުގައި އިދިކޮޅުގެ އެމްޑީޕީގެ ވެރިކަމުގައި ކަން ހިނގި ގޮތް ރައްޔިތުން ތަޖުރިބާކޮށްފި އެވެ. އެ ވެރިކަމުގައި، އެމްޑީޕީން ދަސްކޮށްދިނީ، ހައްގުތައް ނިގުޅައިގަނެ ރައްޔިތުންނަށް ބިރުވެރިކަން އުފައްދައިގެން ކަންކަން ހާސިލްކުރަން ކަމަށް ވިދާޅުވި އެވެ.

ރައީސް ވިދާޅުވީ އެމްޑީޕީން ޓެރަރިޒަމްގެ ހަރަކާތްތަކެއް ހިންގިއިރު، އެންމެ ބިރުދެއްކި އެއް ބޭފުޅަކީ އެމަނިކުފާނު ކަމަށެވެ. ގާނޫނާ ޚިލާފުން އެތައް ކަމެއް ހިންގި ކަމަށާއި އެކަންކަން ހުއްޓުވީ މި ސަރުކާރުން ކަމަށް ވިދާޅުވި އެވެ.