ހާލުގައި ޖެހުނު ލަންކާ ހަތް މަސްވެރިޔަކު ސަލާމަތްކޮށް، މާލެއަށް

އިންޖީނު ހުއްޓިގެން ހާލުގައި ޖެހުނު ސްރީ ލަންކާގެ މަސްބޯޓުގައި ތިބި ހަތް ފަޅުވެރިން ސަލާމަތްކޮށް، މިއަދު މާލެ ގެނެސްފި އެވެ.

"ސިންދޫރު 2" ނަމަކަށް ކިޔާ ލަންކާ މަސް ބޯޓު ހާލުގައި ޖެހުނީ، އެމްއެންޑީއެފުން ބުނި ގޮތުގައި، އޭގެ އިންޖީނުގެ ބެޓަރީ ހުއްޓުމުންނެވެ. އެމީހުން ހާލުގައި ޖެހިފައި ތިއްބާ ފެނުނީ ރާއްޖޭގެ މަސް ދޯންޏެއް ކަމަށް ވާ "ދިރުން" އަށް، ގއ. ވިލިނގިއްޔާ ދިމާއިން ބޭރުންނެވެ.

ބޯޓުގެ ހާލަތު އިއްޔެ ހެނދުނު 11 ޖަހާކަންހާ އިރު ކޯސްޓް ގާޑަށް އެންގުމުގެ އިތުރުން ދިވެހި މަސްވެރިން ވަނީ، އެމްއެންޑީއެފުން ބުނި ގޮތުގައި، އޭގެ ފަޅުވެރިންނަށް ފެނާއި ކާބޯތަކެތި ވެސް ފޯރުކޮށްދީފަ އެވެ.

"ސިންދޫރު 2" ކައިރިއަށް ގޮސް ކޯސްޓް ގާޑުން އެހީތެރިކަން ފޯރުކޮށްދޭން ފެށީ ހަވީރު 5:30 ހާއިރު ކަމަށް އެމްއެންޑީއެފުން ބުނެ އެވެ. ފަޅުވެރިން ސަލާމަތްކޮށް އެންމެ ފުރަތަމަ ގެންދިޔައީ ގދ. ތިނަދުއަށެވެ. އެ މީހުން މާލެ ގެނައީ މިއަދު ހެނދުނެވެ. އެ އެންމެންގެ ހާލު ވެސް ރަނގަޅު ކަމަށްވެ އެވެ.