އެމްއެޗް370 ހޯދުން ވަގުތީ ގޮތުން ހުއްޓާލަނީ

ކުއާލަ ލަމްޕޫރު (ޖުލައި 22) - ގެއްލިފައިވާ މެލޭޝިއަން އެއާލައިންސްގެ ފްލައިޓް އެމްއެޗް370 ހޯދަން ކަނޑުއަޑިން މިހާރު ބަލަމުންދާ ސަރަހައްދުން ބޯޓާ ގުޅޭ އެއްވެސް އެއްޗެއް ނުފެނިއްޖެ ނަމަ ބޯޓު ހޯދުމުގެ މަސައްކަތް ވަގުތީ ގޮތުން ހުއްޓާލާނެ ކަމަށާއި ނަމަވެސް އެއީ ދާއިމީކޮށް އެ މަސައްކަތް ހުއްޓާލުން ނޫން ކަމަށް އޮފިޝަލުން ބުނެފި އެވެ.

ބޯޓު ހޯދުމުގެ މަސައްކަތް ކުރިއަށް ގެންދާ މެލޭޝިއާ، ޗައިނާ އަދި އޮސްޓްރޭލިއާ އިން ކުރިން ނިންމާފައި ވަނީ ބޯޓު ހޯދުމަށް އިންޑިއާ ކަނޑުގެ ދެކުން މިހާރު ބަލަމުންދާ ސަރަހައްދުން ބޯޓާ ގުޅޭ އެއްވެސް މައުލޫމާތެއް ނުލިބިއްޖެ ނަމަ އެ މަސައްކަތް ހުއްޓާލުމަށެވެ. ނަމަވެސް ބޯޓުން ދަތުރު ކުރި ގިނަ މީހުންގެ އާއިލާތަކުން ވަނީ ބޯޓު ފެންނަންދެން އެ މަސައްކަތް ކުރިއަށް ގެންގޮސް ދިނުމަށް އެދިފަ އެވެ.

އެމްއެޗް370 ހޯދުމުގެ މަސައްކަތް ސަސްޕެންޑްކުރާކަން އިއުލާން ކުރީ ތިން ގައުމުގެ މިނިސްޓަރުން މެލޭޝިއާގައި ބޭއްވި ބައްދަލުވުމަކަށް ފަހު އެވެ.

ކުއާލަ ލަމްޕޫރުން ފުރައިގެން 239 މީހުންނާ އެކު ބެއިޖިންގަށް ދަތުރު ކުރަނިކޮށް އެމްއެޗް370 ގެއްލުނީ މާޗް، 2014 ގަ އެވެ.

ބޯޓު ހޯދުމަށް ކަނޑައެޅި ސަރަހައްދުން ކަނޑުއަޑި ނުބަލާ މިހާރު އޮތީ ގާތްގަނޑަކަށް 10،000 އަކަ ކިލޯމީޓަރުގެ ސަރަހައްދެކެވެ. ކަނޑު އަޑީގެ ޑްރޯން އާއި ސޯނާ އާލާތްތައް ބޭނުންކޮށްގެން ބަލަމުން ދަނީ ބޯޓު ވެއްޓިފައިވާނެ ކަމަށް ބެލެވޭ ސަރަހައްދުގެ ކަނޑުގެ އަޑިން 120،000 އަކަ ކިލޯ މީޓަރުގެ ސަރަހައްދެކެވެ. އެކަމަކު އެ ސަރަހައްދުން ބޯޓާ ގުޅޭ އެއްވެސް އެއްޗެއް އަދި މިހާތަނަށް ފެނިފައެއް ނުވެ އެވެ. ބޯޓު ހޯދުމުގެ މަސައްކަތަށް މިހާތަނަށް ވަނީ 135 މިލިއަން ޑޮލަރު ޚަރަދުކޮށްފަ އެވެ. މިއީ މަތިންދާ ބޯޓެއް ހޯދުމަށް ވައިގެ ދަތުރުފަތުރުގެ ތާރީޚުގައި ކުރި އެންމެ ބޮޑު ހޭދަ އެވެ. ބޯޓު ހޯދަން ކުރިން ކަނޑައެޅި ސަރަހައްދު ބަލާ ނިމޭނެ ކަމަށް ލަފާކޮށްފައި ވަނީ ޖުލައި ނުވަތަ އޮގަސްޓް މަހު އެވެ. ނަމަވެސް މޫސުން ގޯސްވުމާ އެކު އެ މަސައްކަތް އިތުރަށް ދިގުލައިގެން ހިނގައިދާނެ ކަމަށް އޮފިޝަލުން ވަނީ ބުނެފަ އެވެ.

އެމްއެޗް370 އާ ގުޅޭ އެއްވެސް އެއްޗެއް ކަނޑުއަޑިން ފެނިފައި ނުވި ނަމަވެސް ބޯއިން 777 ގެ ބޯޓުގެ ބައިތައް ކަމަށް ބެލެވޭ ތަކެތި ވަނީ ބައެއް ގައުމުތަކަށް ލައްވެފައި ވަނިކޮށް ފެނިފަ އެވެ. އެމްއެޗް370 އަކީ ގެއްލުނު ބޯއިން 777 ގެ ހަމައެނި ބޯޓެވެ.