ވިންޓަ ތީމް ޕާކް ބަލަހައްޓައިދޭނެ ބަޔަކު ހޯދަން އިއުލާންކޮށްފި

ފިނި މޫސުމުގެ އިހްސާސްތައް ކުރެވޭ ގޮތަށް ރަސްރަނި ބަގީޗާގައި ހަދާ ވިންޓަ ތީމް ޕާކް ބަލަހައްޓައިދޭނެ ފަރާތެއް ހޯދުމަށް ހައުސިން މިނިސްޓްރީން އިއުލާންކޮށްފި އެވެ.

ހައުސިން މިނިސްޓްރީން ކުރި އިއުލާނެއްގައި ބުނީ ރަސްރަނި ބަގީޗާގައި ހަދާ ވިންޓަ ތީމް ޕާކް ބަލަހައްޓާ ފަރާތުން އެ ތަނުގައި ކެފޭއެއް ހަދައި ހިންގަން ޖެހޭނެ ކަމަށެވެ.

މި މަސައްކަތް ކުރުމަށް ޝައުގުވެރިވާ ފަރާތްތަކުން އަންނަ އާދިއްތަ ދުވަހުގެ ކުރިން މައުލޫމާތު ސާފު ކުރުމަށް ފަހު، މި މަހުގެ 29 ވަނަ ދުވަހުގެ 11:30 ގެ ކުރިން އީމެއިލް މެދުވެރިކޮށް އަގު ހުށަހެޅުމަށް އިއުލާނުގައިވެ އެވެ.

ޓީވީއެމްގެ "ރާއްޖެ މިއަދު" ޕްރޮގްރާމްގައި ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވީ ވިންޓަ ތީމް ޕާކް އަންނަ އީދު ދުވަހު ހުޅުވަން މަސައްކަތް ކުރަމުން އަންނަ ކަމަށެވެ. އެތަން ނުނިމި ލަސްވަނީ އެ ތަނަށް ބޭނުންވާ ކޭބަލްތައް އެޅުމުގައި ދިމާވި ލަސްތަކެއްގެ ސަބަބުން ކަމަށް އޭނާ ވިދާޅުވި އެވެ.

މުއިއްޒު ވިދާޅުވި ގޮތުގައި ރަސްރަނި ބަގީޗާގައި ކެފޭ ހިންގާ ފަރާތުން، ވިންޓަ ތީމް ޕާކް ހިންގަން ޖެހޭނެ ކަމަށެވެ. އެ ގޮތަށް ނިންމީ، ދައުލަތުގެ ބަޖެޓުން އެ ޕާކަށް އެއްވެސް ހަރަދެއް ނުކޮށް ހިންގޭނެ ގޮތެއް ރޭވުމުގެ ބޭނުމުގައި ކަމަށް ވެސް މިނިސްޓަރު މުއިއްޒު ވިދާޅުވި އެވެ.

"އެ ތަނުގެ ކަރަންޓާ އެ ތަނުގެ ފެނާ އެ ހުރިހާ މެއިންޓަނަންސް ހަރަދެއް ބަލަހައްޓަން ޖެހޭނީ ކެފޭ ނަގާ ފަރާތުން. އެހެންވީމަ ސަރުކާރުގެ ބަޖެޓަކަށް ނާންނާނެ އެއްވެސް ބުރައެއް ވިންޓަ ބިލްޑިން ހިންގާކަށް،" ޓީވީއެމްގެ ޕްރޮގްރާމްގައި ވާހަކަ ދައްކަވަމުން މުއިއްޒު ވިދާޅުވި އެވެ.

މިނިސްޓަރު ވިދާޅުވި ގޮތުގައި ރޭވިފައި އޮތީ ޕާކަށް ވަނުމަށް ފީއެއް ނަގާ ގޮތަށެވެ. އަދި އެ ތަނުގެ ތެރޭގައި ސްލައިޑް ކުރާނެ ވަސީލަތްތަކާއި އައިސް ސްކޭޓް ކުރެވޭނެ ރިންގެއް ހުންނާނެ ކަމަށް އޭނާ ވިދާޅުވި އެވެ.

ސަލްޓަން ޕާކްގެ ނަން ބަދަލުކޮށް، ރަސްރަނި ބަގީޗާގެ ނަމުގައި އެ ޕާކު ހުޅުވާފައިވަނީ ވަރަށް ބޮޑެތި ބަދަލުތަކަކާ އެކު އެވެ.

އެ ގޮތުން އެންމެ ފާހަގަ ކޮށްލެވޭ އެއް ތަނަކީ ބިމުން ފެށިގެން 12 ވަރަކަށް ފޫޓު އުހުގައި ހަދާފައި ހުންނަ "ރަސްރަނި ވިއު" ކިޔާ ތަނެކެވެ. އެ ތަނުގައި އެންމެ ޒަމާނީ ވަސީލަތްތަކާއެކު ދަރިވަރުންނަށް ކިޔެވޭ ގޮތަށް ކްލާސްރޫމުތަކަކާއި ކުރެހުމުގެ ހުނަރު ދައްކާލުމަށް އާޓް ޑެކެއް ހަދާފައި ހުރެ އެވެ.

މީގެ އިތުރުން ވެސް ދެބުރިއަކަށް ވާ ގޮތަށް ހުންނަ ބޮޑު ފެންއަރުވާވަޑާމަކާއި ޓްރީ ހައުސް ބްރިޖެއް އަދި ޕާކުގެ ފެހިކަން ފެންނަ ގްރީން ޓަނަލަކާއި ވާޓިކަލް ބަގީޗާއެއް ވެސް މިތަނުގައި އޮވެ އެވެ.