މިއީ ގެންނަން އުޅުނު އެންމެ ނުރައްކާތެރި ބަޣާވާތް: ރައީސް

ސުޕްރީމް ކޯޓުން ކުރިން ނެރުނު އަމުރަކީ މިހާތަނަށް ރާއްޖެ ގެންނަން އުޅުނު އެންމެ ނުރައްކާތެރި ބަޣާވާތް ކަމަށާއި އެ އަމުރާ ދެކޮޅަށް ނިކުތުމަކީ ފަސޭހަ ކަމަކަށް ނުވި ކަމަށް ރައީސް އަބްދުﷲ ޔާމީން މިރޭ ވިދާޅުވެއްޖެ އެވެ.

ޕީޕީއެމުން މިރޭ ބޭއްވި ޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވީ އެންމެ މަތީ ކޯޓުން ނިންމާ ނިންމުމަކީ އަބަދުވެސް އެންމެ ފަހުގެ ނިންމުން ކަމަށްވާތީ، ސުޕްރީމް ކޯޓުގެ ނިންމުމަކާ ދެކޮޅަށް މަސައްކަތް ކުރުމަކީ އެމަނިކުފާނަށް ކުރައްވަން ފަސޭހަ ކަމަކަށް ނުވި ކަމަށެވެ. އޭގެ މައިގަނޑު ސަބަބަކީ އެ އަމުރު ތަންފީޒު ކުރަން ބޭރު ގައުމުތަކާއި ޖަމްއިއްޔާތަކުން ސަރުކާރަށް އަންނަމުން ދިޔަ ޕްރެޝަރުތައް ކަމަށް ރައީސް ވިދާޅުވި އެވެ. ކޯޓުތަކުން ގާނޫނާ ޚިލާފް ކަމެއް ނިންމަފާނެ ކަމަށް ވިސްނައި ދިނުމަކީ ފަސޭހަކަށް ނުވި ރައީސް ޔާމީން ވިދާޅުވި އެވެ.

"އަޅުގަނޑުމެންނަށް ފަސޭހައެއް ނުވި ދައުލަތުން މި އަމުރަށް ގޮންޖަހާލަން ޖެހުނީ ނުވަތަ ތަންފީޒުކޮށް ނުދެވުނީ ކީއްވެގެން ކަމެއް. ބޭރު ދުނިޔޭގެ ފަރާތްތަކުން ބަލާކަށް ބޭނުމެއް ނުވޭ މި އަމުރުގެ ތެރޭގައި ހުރީ ކޮންކޮން މައްސަލަތަކެއް ކަމެއް. އެއީ އެ މީހުންގެ ވިސްނުމުގެ މީޒާނަކަށް ނާދޭ ސުޕްރީމް ކޯޓުން އެ ގައުމުތަކުގައި އެވަރުގެ ނުރައްކާތެރި ކަމެއް ކޮށްފާނެ ކަމަކަށް. އެވަރުގެ ޖައްބާރު ކަމެއް ކޮށްފާނެ ކަމެއް، އެއީ އެ މީހުންގެ ޚިޔާލަށް ގެންނާނެ ކަމެއް ނޫނޭ،" ރައީސް ޔާމީން ވިދާޅުވި އެވެ

"އެންމެ ފުރަތަމަ ވެސް ނިންމާނީ ސުޕްރީމް ކޯޓުން ނިންމާ ނިންމުމެއް ތަންފީޒު ނުކުރާނީ ވަރަށް ގޮތް ދޫނުކުރާ ވަރަށް ޖައްބާރު ސަރުކާރެކޭ." ރައީސް ވިދާޅުވި އެވެ.

އެ އަމުރު ތަންފީޒު ކުރި ނަމަ ރާއްޖެ އޮންނާނީ މުޅި އުމުރަށް ހިތާމަ ކުރުމުގައި ކަމަށް ރައީސް ވިދާޅުވި އެވެ.

ރައީސް ވިދާޅުވި ގޮތުގައި "އާ ކައިވެންޏަކަށް ބްރައިޑް ތައްޔާރު ކުރާހެން" ސުޕްރީމް ކޯޓު ތައްޔާރު ކޮށްފައި އޮތީ އެމަނިކުފާނުގެ މަގާމުން ދުރުކުރާށެވެ. އެކަމުގައި ބައިވެރިވީ އިއްޒަތްތެރި ބޭފުޅުންތަކެއް ކަން ފާހަގަ ކުރައްވައި، ރައީސް ސިފަ ކުރެއްވި ގޮތުގައި އެއީ ގެންނަން އުޅުނު "އިއްޒަތްތެރި ބަޣާވާތެކެވެ."

"ތަހުޒީބީ މުޖްތަމައުތަކުގައި ކަންކަން އޮންނަ ގޮތަށް އަދި ނާތަހުޒީބްކޮށް ކަންކަން ކުރަން އޮންނަ ގޮތަށް އެކަން ކާމިޔާބު ނުވީމަ ދެން އަޅުގަނޑުގެ ނަފްސަށް ނުވަތަ ޖިސްމަށް އަނިޔާކުރަން ދިމާކުރީ ދެއްތޯ؟. މިފަހަރު ބައްލަވާ، ކުށެއް ނެތިގެން ދޫކޮށްލާ މީހުންގެ ތެރޭގައި އަޅުގަނޑުމެންގެ ލޯންޗް ގޮއްވާލި މީހާ ވެސް އެބަ ދޫކޮށްލައޭ. އެ ކީއްކުރަންތޯ؟. އިތުރަށް މަގުމަތި ހަލަބޮލިކޮށް، އެތައް ބަޔަކަށް ގެއްލުން ދޭންތޯ؟،" ކުރީގެ ނައިބު ރައީސް އަހުމަދު އަދީބު ދޫކޮށްލަން ސުޕްރީމް ކޯޓުގެ އަމުރުގައި އޮތްކަން ފާހަގަ ކުރައްވައި، ރައީސް ޔާމީން ވިދާޅުވި އެވެ.

ރައީސް ވިދާޅުވި ގޮތުގައި ސުޕްރީމް ކޯޓުގެ އަމުރު ތަންފީޒު ނުކުރުމުން އެ ދަނޑިވަޅުގައި ބަންޑާރަ ނައިބު މުހައްމަދު އަނިލް މަގާމުން ދުރުކޮށްފި ނަމަ، އެމަނިކުފާނު ހުންނެވީ ކޯޓުން އަނިލް ގެންދަވާ ތަނަކަށް ވަޑައިގަންނަވަން ތައްޔާރަށެވެ. އަނިލް މަގާމުން ދުރުކުރަން ދެ ފަނޑިޔާރަކު މަސައްކަތް ކުރެއްވި ކަމަށާއި އެއީ ވެސް ކުރިމަތިވެފައި އޮތް އެންމެ ބޮޑު ބިރު ކަމަށް ރައީސް ވިދާޅުވި އެވެ. އެހާ ނުތަނަވަސް ދަނޑިވަޅެއްގައި ބަންޑާރަ ނައިބު ވަކިކޮށްފި ނަމަ ގާނޫނީ ލަފާ ދޭނެ ފަރާތެއް ނުހުންނާނެ ކަން ރައީސް ޔާމީން ފާހަގަ ކުރެއްވި އެވެ.

"ހަށިގަނޑު ހުރެދާނެ. ބޯ ކަނޑާލެވިދާނެ. އަތްފައި، ކަނޑާލެވިދާނެ، އެކަން ކުރައްވަން އުޅުއްވީ. އެ ހިސާބުން އަޅުގަނޑު ދެންނެވި ބަންޑާރަ ނައިބު ވަކިކުރާ ކަމަށް ވަންޏާ އެ ބޭފުޅާ ވަޑައިގަންނަވާ ތަނަށް އަޅުގަނޑު ވެސް ދާނަމޭ. އޭރުން އަޅުގަނޑު އަޒުލެއް ނުވާނެ. އަޅުގަނޑު މަަގާމުގައި ހުންނާނެ. އެކަމަކު ސަރުކާރު ހިންގާކަށް އަޅުގަނޑަށް ފުރުސަތެއް ނޯންނާނެ. އެއީ އޭރުން އަޅުގަނޑު ހުންނާނީ ހައްޔަރެއްގައި،" ރައީސް ޔާމީން ވިދާޅުވި އެވެ.

ރައީސް ޔާމީން ވިދާޅުވި ގޮތުގައި ދައުލަތް ގޮތް ހުސްވާ ހާލަތަކަށް ގެންގޮސް، ރާއްޖެއަށް ގެއްލުން ދޭން އުޅުމަކީ ބޮޑެތި އަދަބު އެކަމަށް ދޭންޖެހޭ ކަމެކެވެ.