ރައީސް ދެއްކެވި ވާހަކަފުޅުތައް އިދިކޮޅު ޕާޓީތަކުން ކުށްވެރިކޮށްފި

ޕީޕީއެމްގެ ޖަލްސާއެއްގައި މިދިޔަ ހޯމަ ދުވަހުގެ ރޭ ރައީސް އަބްދުﷲ ޔާމީން ފަނޑިޔާރުންނާ ބެހޭ ގޮތުން ދެއްކެވި ވާހަކަފުޅުތައް އިދިކޮޅު ޕާޓީތަކުން ކުށްވެރިކޮށްފި އެވެ.

އިދިކޮޅު ޕާޓީތަކުން މިއަދު ނެރުނު ބަޔާނެއްގައި ބުނީ ރައީސް ޔާމީން ފަނޑިޔާރުންނަށް ނިސްބަތްކުރައްވައި، އާންމު ތަންތަނުގައި ދައްކަވަމުން ގެންދަވާ ވާހަކަފުޅުތަކަކީ ޕާޓީތަކުން އިންތިހާ އަށް އިއުތިރާޒުކުރާ ވާހަކަތަކެއް ކަމަށެވެ. އެމަނިކުފާނު އެގޮތަށް ވާހަކަފުޅު ދައްކަވަނީ ފަނޑިޔާރުންނަށް ކަންކަން މަޖުބޫރު ކުރުވައިގެން ފަނޑިޔާރުން މެދުވެރިކޮށް ވެރިކަމުގައި ހުންނެވުމަށް ކަމަށް ވެސް ބަޔާނުގައިވެ އެވެ.

"ރައީސްއަކީ ދައުލަތުގެ އެންމެ މަތީ ވެރިޔާ ކަމުގައިވީ ނަމަވެސް، އެ ހައިސިއްޔަތުން ވިޔަސް ޝަރުއީ ކޯޓުތަކުގައި ހިނގާ މައްސަލަތަކަށް ނުފޫޒު ފޯރުވައި، މައްސަލަ ބައްލަވާ ފަނޑިޔާރުންނަށް އަމާޒުކޮށް އިންޒާރު ދިނުމުގެ އެއްވެސް ބާރެއް ރައީސްއަކަށް ގާނޫނު ލިބިދީފައެއް ނުވެ އެވެ،" އެމްޑީޕީގެ ބަޔާނުގައިވެ އެވެ.

ޝަރުއީ ކޯޓުތަކަކީ މިނިވަންކަމާ އެކު މަސައްކަތްކުރުމުގެ މާހައުލު ލިބިފައި އޮންނަން ޖެހޭނެ ތަންތަން ކަމުގައި ވުމީ ގާނޫނުއަސާސީ ތަސައްވުރު ކޮށްފައިވާ ގޮތް ކަމަށް ވެސް އެ ބަޔާނުގައިވެ އެވެ.

އެހެންކަމުން، ރައީސް ޔާމީން ސުޕްރީމް ކޯޓުގެ ފަނޑިޔާރުންނަށް ބިރު ދެއްކެވުމުގެ ގޮތުން ވާހަކަފުޅު ނުދެއްކެވުމަށް ސިޔާސީ ޕާޓީތަކުން ވަނީ އެމަނިކުފާނަށް ގޮވާލައިފަ އެވެ.

މީގެއިތުރުން ގާނޫނުއަސާސީގެ ބޭރުން ރައީސް ޔާމީން ކުރައްވަމުން އެ ގެންދަވާ ކަންކަން ހުއްޓުވައި، ރައީސް ޔާމީންގެ ވެރިކަން ހަމަމަގަށް އެޅުވުމަށް ކުރަންޖެހޭ ކޮންމެ ކަމެއް ކުރުމަށް ދައުލަތުގެ އެންމެހައި މުއައްސަސާތަކާ އެކު ސާބިތުކަމާ އެކު ދެމި ތިބޭނެ ކަމަށް ވެސް އެ ބަޔާނުގައިވެ އެވެ.

މިދިޔަ ހޯމަ ދުވަހު ޕީޕީއެމްގެ ރުމާލު 2 ޖަގަހައިގައި ވާހަކަފުޅު ދައްކަވަމުން ރައީސް ވިދާޅުވީ ސުޕްރީމް ކޯޓު މަގުން ކައްސާލާ ނަމަ، އެ ކޯޓު ހިނގާކަން ރައްޔިތުންނަށް ކަށަވަރުކޮށްދޭން ހުރި މީހަކީ އެ އިރަކު ހުންނަވާ ރައީސަކު ކަމަށެވެ. އަދި ސަރުކާރުން ވިޔަސް ގާނޫނާ ހިލާފު ކަމެއް ކުރާ ނަމަ، ހިނގާނެ މަގަކުން ހިނގާފައި، ބޭނުން މުއައްސަސާއަކަށް ދިއުމުގެ އިހްތިޔާރު އެބައޮތް ކަމަށް ވެސް ރައީސް ވިދާޅުވި އެވެ.