ގިނަ ބަޔަކާއެކު ހދ. އަތޮޅު ފެރީ ފަރަށް އަރައިފި

ހދ. އަތޮޅުގެ ފަސް ރަށަކުން މީހުން އަރުވައިގެން އެ އަތޮޅު ކުޅުދުއްފުއްޓަށް ދަތުރު ކުރި ހދ. އަތޮޅު ފެރީގެ އިންޖީނު ހުއްޓި، ފަރަކަށް އަރައިފި އެވެ.

މިއަދު ހެނދުނު، ހދ. އަތޮޅުގެ ވެރިރަށަށް ދަތުރު ކުރި ފެރީ އެ އަތޮޅުގެ ކުރިނބީ ފަރަށް އެރިއިރު، އޭގައި ފަސް ރަށުގެ، 70 އަށް ވުރެ ގިނަ މީހުން ތިއްބެވެ. އޭގެ ތެރޭގައި ކުރިނބީ މީހުންގެ އިތުރުން ހިރިމަރަދު އާއި ނާވައިދު އާއި ނެއްލައިދު އަދި ފިނޭގެ މީހުން ހިމެނެ އެވެ.

ކުރިނބީ ކައުންސިލްގެ ރައީސް މުހައްމަދު އަފްރާހް މިއަދު ވިދާޅުވީ ހެނދުނު އަށެއް ޖަހާކަންހާއިރު "ހދ. އަތޮޅު- ކުރިނބީ ރޫޓް" ފެރީ ފަރަށް އެރީ އެ ރަށުން މީހުން ނަގައިގެން، ކުޅުދުއްފުއްޓަށް ނައްޓާލިތާ މާގިނަ އިރުތަކެއް ނުވަނީސް އިންޖީނު ހުއްޓިގެން ކަމަށެވެ.

"އިންޖީނު ހުއްޓުމުން އޮޔާ އައިސް މި ރަށު ފަރަށް އެރީ. ދެން އަޅުގަނޑުމެން، މި ރަށުގެ އެކި އުޅަނދުތައް ގޮސް އެ ފެރީން މީހުން ބާލުވައިގެން ރަށަށް ގެނައީ،" އަފްރާހް ވިދާޅުވި އެވެ.

އޭނާ ވިދާޅުވި ގޮތުގައި ހާލުގައި ޖެހުނު މީހުން ކުރިނބީގައި ދެ ގަޑިއިރެއްހާއިރު ތިއްބެވެ. އެ މީހުން އަނބުރާ ކުޅުދުއްފުއްޓަށް ދިޔައީ މިއަދު ހެނދުނު 10 ޖަހާކަންހާއިރު، އެހެން ފެރީއެއްގަ އެވެ.

ފަރަށް އެރި ފެރީ މިހާރު ފުންކޮށްފައިވާ ކަމަށް ކުރިނބީ ކައުންސިލުން ބުންޏެވެ.